الماتىلىقتار لىق تولعان اۆتوبۋستارعا شاعىمدانىپ جاتىر

قالا تۇرعىندارى ايالداما مەن قوعامدىق كولىك ىشىندەگى جاعدايلاردى الەۋمەتتىك جەلىدە جاريالاپ ءجۇر. اسىرەسە، قاربالاس ۋاقىتتا اۆتوبۋستارعا ءمىنۋ قيىندىق تۋدىراتىنى تۋرالى پىكىرلەر كوپ.

ماسەلەن، جەلى قولدانۋشىلارىنىڭ ءبىرى №38-باعىتتاعى لىق تولعان اۆتوبۋستىڭ بەينەجازباسىن جاريالاعان. وندا كولىك ىشىنە قيىندىقپەن كىرگەن ايەلدىڭ اياعى ەسىك جابىلعاندا سىرتتا قالىپ قويعانىن كورۋگە بولادى.

جازباعا پىكىر قالدىرعان ەلەنا كەگاي ەسىمدى تۇرعىن دا كولىك باعىتتارىنداعى اۆتوبۋستار سانى جەتكىلىكسىز ەكەنىن ايتقان.

- كەيدە كەلەسى اۆتوبۋستى 20 مينۋت كۇتۋ كەرەك بولادى. كەيدە ەكەۋى بىردەي كەلىپ، جارىسا جونەلەدى. بۇل مەگاپوليس ءۇشىن دۇرىس ەمەس، - دەپ جازدى ول.

اتالعان جاعدايعا بايلانىستى جول قوزعالىسىن ۇيىمداستىرۋ جانە جولاۋشىلار كولىگى باسقارماسى جاۋاپ بەردى.

- №38-اۆتوبۋس باعىتىنىڭ جۇمىسىن جاقسارتۋ ماقساتىندا بۇعان دەيىن قوزعالىس كەستەلەرى قايتا قارالىپ، رەيستەر سانى كوبەيتىلدى جانە اۆتوبۋستاردىڭ ايالدامادا تۇرۋ ۋاقىتى قىسقارتىلدى، - دەلىنگەن حابارلامادا.

ۆەدومستۆو وكىلدەرى جولدارداعى جۇكتەمەگە بايلانىستى، اسىرەسە قاربالاس ۋاقىتتا كەشىگۋلەر مەن كەستەدەن اۋىتقۋلار بولاتىنىن مالىمدەدى.

- بۇل ءوز كەزەگىندە قوزعالىس ينتەرۆالىنىڭ ۇلعايۋىنا جانە ايالدامالاردا جولاۋشىلاردىڭ جينالىپ قالۋىنا اكەپ سوقتىرادى، - دەپ ءتۇسىندىردى باسقارمادان.

ەسكە سالايىق، بۇعان دەيىن الماتىنىڭ قانداي كوشەلەرىندە بيىل ءبىرجاقتى قوزعالىس ەنگىزىلگەنىن جازعانبىز.

اۆتور

دوسبول اتاجان