الماتىلىق ايەل پوليتسەيگە ازىلدەگەنى ءۇشىن 130 مىڭ تەڭگەگە جۋىق ايىپپۇل تولەدى
استانا. قازاقپارات - الماتى تۇرعىنى پوليتسيا فورماسىن حەللوۋين مەرەكەسىنە ارنالعان كيىمگە تەڭەگەنى ءۇشىن 130 مىڭ تەڭگەگە جۋىق ايىپپۇل تولەدى، دەپ حابارلايدى turkystan.kz.
وقيعا 31-قازان كۇنى كەشكى ۋاقىتتا اربات جاياۋ جۇرگىنشىلەر كوشەسىندە بولعان. سول كۇنى ۋچاسكەلىك پوليتسيا ينسپەكتورى مەرەكەلىك ءىس-شارالار كەزىندە قوعامدىق ءتارتىپ پەن تۇرعىنداردىڭ قاۋىپسىزدىگىن قامتاماسىز ەتىپ جۇرگەن. وسى كەزدە وعان قولىنا كامەرا ۇستاعان ايەل كەلىپ، پوليتسەيدىڭ فورماسى حەللوۋين كوستيۋمى ەمەس پە دەپ ادەيى سۇراق قويعان.
پوليتسيا قىزمەتكەرى سابىر ساقتاپ، ءوزىن تانىستىرىپ، قىزمەتتىك كۋالىگىن كورسەتكەننەن كەيىن جۇمىسىن جالعاستىرعان. الايدا وقيعا تۇسىرىلگەن ۆيدەو الەۋمەتتىك جەلىدە جاريالانىپ، جاعداي جەلى قولدانۋشىلارىنىڭ نازارىنا ۇسىنىلدى.
بەينەجازبانىڭ اۆتورىن المالى اۋداندىق پوليتسيا باسقارماسىنىڭ قىزمەتكەرلەرى انىقتادى. ول الماتى قالاسىنىڭ 47 جاستاعى تۇرعىنى بولىپ شىقتى.
ايەل اكىمشىلىك جاۋاپكەرشىلىككە تارتىلدى. سوت شەشىمىمەن وعان 30 ا ە ك مولشەرىندە ايىپپۇل سالىندى.
