الماتىدا تۇرعىندار تولىق اقىسىن تولەگەن پاتەرلەردى كەپىل اۋىرتپالىعىنان بوساتۋ جۇمىستارى جانداندى
استانا. KAZINFORM - الماتىدا تۇرعىندار تولىق اقىسىن تولەگەن پاتەرلەردى كەپىل اۋىرتپالىعىنان بوساتۋ جۇمىستارى جانداندى. سوڭعى ەكى اپتادا 14 پاتەردىڭ كەپىلى الىنىپ، تاعى بەس پاتەر بويىنشا راسىمدەر جۇرگىزىلىپ جاتىر. سونىمەن قاتار بىرنەشە جىلدان بەرى شەشىمىن تاپپاي كەلە جاتقان 134 پاتەردىڭ ماسەلەسىن رەتتەۋ قولعا الىندى. بۇل تۋرالى «پروبلەمالىق كرەديتتەر قورى» اق حابارلادى.
قور پروكۋراتۋرا، قۇقىق قورعاۋ ورگاندارى جانە «Ondiris Building» ج ش س-نىڭ جاڭا باسشىلىعىمەن بىرلەسىپ، تۇرعىنداردىڭ قۇقىقتارىن قورعاۋ جانە پاتەرلەردى كەپىل اۋىرتپالىعىنان بوساتۋ باعىتىندا جۇمىس جۇرگىزىپ جاتىر.
قوردىڭ مالىمەتىنشە، 2025 -جىلى سەرىكتەستىكتىڭ مىندەتتەمەلەردى ورىنداۋى جۇيەلى تۇردە بۇزىلعاننان كەيىن بەرەشەكتى ءوندىرىپ الۋ شارالارى كۇشەيتىلگەن. اتاپ ايتقاندا، كومپانياعا بىرنەشە رەت رەسمي تالاپ جولدانىپ، 2025 -جىلعى 4-ماۋسىمدا تۇراقسىزدىق ايىبىن ءوندىرىپ الۋ تۋرالى سوتقا تالاپ ارىز بەرىلگەن.
سوتتىڭ قامتاماسىز ەتۋ شارالارى نەگىزىندە سەرىكتەستىكتىڭ بانكتىك شوتتارىنا تىيىم سالىنعان. كەيىن تاراپتار پاتەرلەردى كەپىلدەن بوساتۋ ءۇشىن قاراجات اۋدارۋ جونىندە قوسىمشا كەلىسىمدەر جاساسقان. كۇتىلگەن 241 ميلليون تەڭگەدەن استام قاراجاتتىڭ شامامەن 189 ميلليون تەڭگەسى قورعا تۇسكەن. بۇل 12 ساتىپ الۋشىنىڭ ماسەلەسىن قاراۋعا مۇمكىندىك بەرگەن. ال قالعان 52 ميلليون تەڭگەگە جۋىق قاراجات بەلگىلەنگەن مەرزىمدە اۋدارىلماعان.
«Ondiris Building» ج ش س-نىڭ باس ديرەكتورى ۆيكتوريا كراۆچەنكونىڭ ايتۋىنشا، ول كومپانيا باسشىلىعىنا 2026 -جىلعى 6-قاراشادا كىرىسكەن. العاشقى كۇندەرى قۇجاتتامانىڭ تولىق بەرىلمەۋى جانە بۋحگالتەرلىك جۇيەگە قولجەتىمدىلىكتىڭ بولماۋى جۇمىسقا كەدەرگى كەلتىرگەن.
- «پروبلەمالىق كرەديتتەر قورى» ا ق-نىڭ پروكۋراتۋرا جانە قۇقىق قورعاۋ ورگاندارىمەن بەلسەندى ءوزارا ءىس-قيمىلىنىڭ ارقاسىندا سەرىكتەستىكتىڭ وپەراتسيالىق قىزمەتىن قالپىنا كەلتىرىپ، جيناقتالعان ماسەلەلەردى جۇيەلى تۇردە شەشۋگە كىرىستىك. قازىر قۇجاتتاما قالپىنا كەلتىرىلىپ، كەلىپ تۇسكەن تولەمدەر سالىستىرىلىپ تەكسەرىلۋدە. وسىعان قاراماستان، ەكى اپتا ىشىندە 14 پاتەردى كەپىل اۋىرتپالىعىنان تولىق بوساتۋعا قول جەتكىزدىك. تاعى بەس پاتەر بويىنشا جۇمىس جۇرگىزىلىپ جاتىر، - دەدى ۆيكتوريا كراۆچەنكو.
ونىڭ سوزىنشە، تۇرعىنداردىڭ ءاربىر ءوتىنىشى جەكە قارالىپ، پاتەرلەردى رەسىمدەۋگە قاجەتتى قۇجاتتار قالپىنا كەلتىرىلىپ جاتىر.
قور 97,5 ميلليون تەڭگەنى بەرەشەكتى وتەۋگە باعىتتايدى
«پروبلەمالىق كرەديتتەر قورى» ا ق باسقارما ءتوراعاسىنىڭ ورىنباسارى تەمىرلان ساپارعاليدىڭ ايتۋىنشا، 2026 -جىلعى 11-قاراشادا پاتەر ساتىپ الۋشىلاردىڭ تولەمدەرى ەسەبىنەن تۇسكەن 97,5 ميلليون تەڭگەنى كومپانيانىڭ بەرەشەگىن وتەۋگە باعىتتاۋ تۋرالى شەشىم قابىلدانعان.
- ساتىپ الۋشىلاردىڭ تولەمدەرىن بولەك ەسەپكە الۋدى كوزدەيتىن قوسىمشا كەلىسىمدەر جاساسۋ جوسپارلانىپ وتىر. بۇل اقشا قاراجاتى قوزعالىسىنىڭ اشىقتىعىن جانە ونىڭ نىسانالى پايدالانىلۋىن قامتاماسىز ەتىپ، پاتەرلەردى كەپىل اۋىرتپالىعىنان جەدەلىرەك بوساتۋعا مۇمكىندىك بەرەدى، - دەدى ول.
سونداي-اق قور زاڭدى نەگىز بولعان جاعدايدا قارجىلىق شىعىندارعا اكەلۋى مۇمكىن شەشىمدەردى دە قاراستىرۋعا دايىن ەكەنىن جەتكىزدى.
قور وكىلدەرىنىڭ مالىمەتىنشە، 2026 -جىلعى قازاندا جانە قاراشادا تۇرعىنداردىڭ باستاماشىل توبى وكىلدەرىمەن كەزدەسۋ ءوتىپ، اقىسى تولىق تولەنگەن پاتەرلەردى كەپىلدەن بوساتۋ تەتىكتەرى تالقىلانعان. قازىر ازاماتتاردىڭ ءوتىنىشى جاۋاپتى ماماندار مەن مەملەكەتتىك ورگانداردى تارتا وتىرىپ، باسىم تارتىپپەن قارالىپ جاتىر.
الداعى ۋاقىتتا تاراپتار قۇجاتتامانى قالپىنا كەلتىرۋ، ساتىپ الۋشىلاردىڭ تولەمدەرىن سالىستىرۋ، قوسىمشا كەلىسىمدەر جاساۋ جانە 134 پاتەردى كەپىل اۋىرتپالىعىنان بوساتۋ تەتىكتەرىن پىسىقتاۋ جۇمىستارىن جالعاستىرادى.