الماتىدا سۋدى پايدالانۋعا قويىلاتىن تالاپتار كۇشەيتىلدى

«الماتى سۋ» مالىمەتىنشە، جاڭا سۋ كودەكسىندە سۋ رەسۋرستارىن ۇتىمدى پايدالانۋ، سۋ ۇنەمدەۋ تەحنولوگيالارىن ەنگىزۋ جانە اعىن سۋلاردىڭ لاستانۋىن ازايتۋ كوزدەلگەن. وسى باعىتتاعى شارالاردىڭ ءبىرى - سۋدى كوپ تۇتىناتىن نىسانداردا سۋدى قايتا پايدالانۋ جۇيەلەرىن ەنگىزۋ.

- جىل باسىنان بەرى الماتىداعى 300 اۆتوجۋۋ ورنى العاش رەت اينالىمدى سۋمەن جابدىقتاۋ جۇيەلەرىمەن جابدىقتالدى. سونىمەن قاتار ورتالىق كارىز جۇيەسىنە توگىلەتىن وندىرىستىك اعىن سۋلارعا جانە جەرگىلىكتى تازارتۋ قۇرىلىستارىن پايدالانۋعا قويىلاتىن تالاپتار كۇشەيتىلىپ جاتىر. ال قوعامدىق تاماقتانۋ ورىندارىندا، ياعني بارلىق مەيرامحانا مەن كافەدە مايۇستاعىشتاردى دۇرىس ءارى ۋاقىتىلى تازالاپ، تالاپقا ساي پايدالانۋدى قامتاماسىز ەتۋ قاجەت، - دەدى «الماتى سۋ» ساتۋ دەپارتامەنتىنىڭ ديرەكتورى سەرىك شاگيروۆ.

ونىڭ ايتۋىنشا، بۇل شارالار كارىز جۇيەسىنە تۇسەتىن جۇكتەمەنى ازايتىپ، اعىن سۋلاردى تازارتۋ ساپاسىن ارتتىرۋعا مۇمكىندىك بەرەدى.

الداعى ۋاقىتتا «الماتى سۋ» سۋ دايىنداۋ تەحنولوگيالىق ۇدەرىستەرىندە سۋدى قايتا پايدالانۋدى كەڭەيتۋدى جوسپارلاپ وتىر. سونداي-اق كارىز تازارتۋ قۇرىلىستارىن جاڭعىرتۋ اياسىندا اعىن سۋلاردى تازارتۋ ساپاسىن ارتتىرۋ كوزدەلگەن.

بۇعان دەيىن «الماتى سۋ» كومپانياسى 2026 -جىلعى 1-قازاننان باستاپ سۋ تاريفتەرى وزگەرەتىنىن حابارلادى.