الماتىدا ەسكى كولىكتەردى ساتىپ الۋ باعدارلاماسى تۋرالى نە بەلگىلى

الماتى اكىمدىگى بيىل ءساۋىر ايىندا ەكولوگيالىق كلاسى تومەن ەسكى اۆتوكولىكتەردى ساتىپ الىپ، كەيىن ولاردى كادەگە جاراتۋ ءۇشىن ارنايى كومپانيا قۇرۋ ماسەلەسى قاراستىرىلىپ جاتقانىن حابارلادى.

قالاداعى ەسكى كولىكتەردىڭ ۇلەسىن ازايتۋعا مۇمكىندىك بەرەتىن باعدارلاما الماتىلىقتار اراسىندا قىزىعۋشىلىق تۋردىردى.

وسى ورايدا، Kazinform اتالعان جوبانىڭ قانداي ساتىدا ەكەنىن ناقتىلاۋ ءۇشىن ءتيىستى ورگاندارعا ساۋال جولدادى.

الماتى قالاسى ەكولوگيا جانە قورشاعان ورتا باسقارماسىنىڭ وكىلدەرى ەسكى كولىكتەردى ساتىپ الۋ تەتىگى اتموسفەرالىق اۋا ساپاسىن جاقسارتۋ جونىندەگى 2026-2027-جىلدارعا ارنالعان ءىس-شارالار جوسپارىنا ەنگەنىن اتاپ ءوتتى.

- الماتى قالاسىنىڭ اتموسفەرالىق اۋاسىن قورعاۋ قاعيدالارىن ىسكە اسىرۋ شەڭبەرىندە «الماتى» الەۋمەتتىك-كاسىپكەرلىك كورپوراتسياسى» ا ق 2026-2028-جىلدارعا ارنالعان اۆتوكولىك قۇرالدارىن كادەگە جاراتۋ جونىندەگى وڭىرلىك باعدارلاماسىنىڭ جوباسىن ازىرلەدى. بۇگىنگى تاڭدا باعدارلاما پىسىقتاۋ ساتىسىندا، - دەپ حابارلادى باسقارمادان.

ال «الماتى» الەۋمەتتىك-كاسىپكەرلىك كورپوراتسياسى» ا ق باعدارلاماعا قاتىستى تۇسىنىكتەمە بەرىپ، ونىڭ ماقساتى مەن مىندەتىن ايقىندادى.

- الماتىدا اۋانىڭ لاستانۋىنا اۆتوكولىكتەردەن شىعاتىن زياندى زاتتار ەلەۋلى اسەر ەتەدى. سوندىقتان ەكولوگيالىق تالاپتارعا ساي كەلمەيتىن ەسكى كولىكتەردى ساتىپ الىپ، كەيىن كادەگە جاراتۋ تەتىگىن ەنگىزۋ جوسپارلانىپ وتىر. مۇنداي شارالار كولىكتى جاڭارتۋعا ىنتالاندىرىپ، ەسكى اۆتوكولىكتەردىڭ سانىن ازايتۋعا مۇمكىندىك بەرەدى. بۇل ءوز كەزەگىندە اتموسفەراعا تارايتىن زياندى زاتتاردىڭ كولەمىن تومەندەتۋگە ىقپال ەتەدى، - دەپ ءتۇسىندىردى «الماتى» ا ك ك».

كومپانيا مالىمەتىنشە، قازىرگى ۋاقىتتا باعدارلاما دايىندىق كەزەڭىندە جانە ونى ىسكە اسىرۋ تەتىگى ازىرلەنىپ جاتىر. ازىرگە وعان قاتىستۋ شارتتارى، ىسكە اسىرۋ ءتارتىبى جانە باعالاۋ جۇيەسى ناقتىلانباعان. الايدا باعدارلاما حالىقتان اۆتوكولىكتەردى تىكەلەي ساتىپ الۋدى كوزدەمەيدى. ونىڭ ورنىنا ساۋداعا اۆتوديلەرلەر مەن وتاندىق اۆتووندىرۋشىلەر تارتىلادى.

- قازىرگى ۋاقىتتا اۆتوديلەرلەر مەن اۆتوكولىك وندىرۋشىلەرىن جەڭىلدىكپەن قارجىلاندىرۋ تەتىگى قاراستىرىلۋ ۇستىندە. سوعان سايكەس، ەكولوگيالىق كلاسى تومەن اۆتوكولىك يەلەرىنە جاڭا اۆتوكولىك ساتىپ الۋ كەزىندە جەڭىلدىك سەرتيفيكاتتارىن بەرۋ كوزدەلەدى، - دەلىنگەن جاۋاپتا.

ەسكە سالايىق، 2026-2028-جىلدارعا ارنالعان قورشاعان ورتانى قورعاۋ جونىندەگى ءىس-شارالار جوسپارى 9 باعىت بويىنشا 43 ءىس-شارانى قامتيدى. ونىڭ ىشىندە 17 ءىس-شارا اتموسفەرالىق اۋانىڭ ساپاسىن جاقسارتۋعا باعىتتالعان.

جوسپاردىڭ باستى ەرەكشەلىگى - اۋانى لاستايتىن ءبىر عانا باعىتپەن ەمەس، ەنەرگەتيكا، جەكە سەكتور، اۆتوكولىك جانە ءوندىرىس كاسىپورىندارى سەكىلدى بارلىق ماسەلەلەرگە ءبىر مەزگىلدە ىقپال ەتەدى.

قۇجاتتا كورسەتىلگەن نەگىزگى جۇمىستار:

- ج ە و-2 جانە ج ە و-3 نىساندارىن گازعا اۋىستىرۋ؛

- اتموسفەرالىق اۋانى قورعاۋ قاعيدالارىن ىسكە اسىرۋ؛

- اۆتوكولىكتەردىڭ تۇتىندىگى مەن وتالۋىنا تۇراقتى مونيتورينگ جۇرگىزۋ؛

- تومەن ەميسسيالىق ايماقتاردى (LEZ) ەنگىزۋ؛

- ەكولوگيالىق تالاپتارعا سايكەس كەلمەيتىن كولىكتەردى كەزەڭ-كەزەڭمەن قىسقارتۋ؛

- ەكولوگيالىق رەيدتەردى وتكىزۋ جانە ت. ب.

اتالعان جوسپار ناتيجەسىندە 2028-جىلدىڭ سوڭىنا دەيىن الماتىدا اۋانى لاستانۋ دەڭگەيىن كەم دەگەندە 20 پايىزعا دەيىن تومەندەتۋ جوسپارلانعان.

ق ر ونەركاسىپ جانە قۇرىلىس مينيسترلىگىنىڭ مالىمەتىنشە، بيىل ەلدەگى اۆتوكولىكتەر سانى 5,9 ميلليون بولسا، ونىڭ 1,4 ميلليونى - 10-20 جىل ارالىعىنداعى، 2,4 ميلليونى 20 جىلدان اسقان اۆتوكولىكتەر.