الماتىدا جىل باسىنان بەرى 6 ۇشەم دۇنيەگە كەلدى
الماتى. KAZINFORM - الماتىدا جىل باسىنان بەرى 603 ەگىز جانە التى ۇشەم دۇنيە ەسىگىن اشتى.
الماتى قالاسى دەنساۋلىق ساقتاۋ باسقارماسىنىڭ مالىمەتىنشە، جۋىردا 2-قالالىق پەريناتالدىق ورتالىقتا 27 جاستاعى الماتىلىق كەلىنشەك ۇشەم ۇلدى دۇنيەگە اكەلدى.
بۇل انانىڭ ەكىنشى جۇكتىلىگى ەكەن. ەندى ول ءتورت ۇلدىڭ اناسى اتاندى. ۇشەمنىڭ ءتورت جاستاعى اعاسى بار.
- جۇكتىلىك تريحوريالدى تريامنيوتيكالىق تۇردە وتكەن، ياعني، ءار ءسابيدىڭ جەكە پلاتسەنتاسى مەن ۇرىق قابى بولىپ، ۇشەۋى ءبىر-بىرىنەن بولەك دامىعان. سابيلەر كەسار تىلىگى ارقىلى دۇنيەگە كەلدى، - دەپ مالىمدەدى الماتى قالاسى دەنساۋلىق ساقتاۋ باسقارماسى.
نارەستەلەردىڭ سالماعى 1740 گرامنان 1978 گرامعا دەيىن، ال بويى 34-37 سانتيمەتر ارالىعىندا بولدى. اتا-اناسى ۇلدارىنا ومار، ميراس جانە ءمۇسلىم دەپ ات قويدى.
سابيلەردىڭ ءبىرى ەكى كۇن بويى وكپەنى جاساندى جەلدەتۋ اپپاراتىنا قوسىلدى. قازىر ءۇش نارەستە دە سيپاپ-تەراپيا الىپ جاتىر. ماماندار ولاردىڭ جاعدايىندا وڭ ديناميكا بايقالىپ وتىرعانىن اتاپ ءوتتى.
ۇشەمنىڭ اناسى ۇلدارىن العاش كورگەندە، قاتتى تولقىپ كەتكەنىن ايتتى.
- بالالارىمدى العاش كورگەندە قاتتى ۋايىمداپ، جىلاپ جىبەردىم. ويتكەنى ولار وتە كىشكەنتاي ءارى ءالسىز كورىندى. ءبىراق ورتالىق قىزمەتكەرلەرى ماعان ۇلكەن قولداۋ كورسەتتى. ولار مەديتسينالىق كومەكپەن قاتار، پسيحولوگيالىق تۇرعىدان دا دەمەۋ بولدى. دارىگەرلەر مەن ورتالىقتىڭ بارلىق قىزمەتكەرىنە قامقورلىعى، ىقىلاسى جانە قولداۋى ءۇشىن شىن جۇرەكتەن العىس ايتامىن، - دەدى ول.
سابيلەر 2-قالالىق پەريناتالدىق ورتالىق ماماندارىنىڭ تۇراقتى باقىلاۋىندا.
ەسكە سالساق، الماتىدا ءبىر ايدا ەكى ۇشەم دۇنيەگە كەلگەنىن حابارلادىق.
