الماتىدا جاڭاجىلدىق بەزەندىرۋگە قانشا قاراجات جۇمسالادى

قالاداعى اباي الاڭىن بەزەندىرۋگە، جاڭاجىلدىق ينستاللياتسيالار ورناتۋعا، مەرەكەلىك كونسەرت وتكىزۋگە جانە قالا كوشەلەرىن جارىقتاندىرۋ ارقىلى اسەمدەۋگە 512,3 ميلليون تەڭگەدەن استام قاراجات باعىتتاۋ جوسپارلانىپ وتىر. ءتيىستى حابارلاندىرۋلار مەملەكەتتىك ساتىپ الۋ پورتالىندا جاريالاندى.

شىعىنداردىڭ نەگىزگى بولىگى اباي الاڭىن بەزەندىرۋگە قاراستىرىلعان. ماسەلەن، الماتى مادەنيەت باسقارماسىنىڭ «الماتى اۋەندەرى» ك م ق ك جاڭا جىلعا وراي اباي الاڭىن بەزەندىرۋ بويىنشا جالپى سوماسى 288,7 ميلليون تەڭگەلىك ءتورت لوت جاريالادى. تەحنيكالىق ەرەكشەلىكتەرگە سايكەس، الاڭدا بيىكتىگى كەمىندە 13 مەتر بولاتىن جانە ءۇش قاباتتى، ونىڭ ءبىر قاباتى اينالاتىن جاڭاجىلدىق شىرشا ورناتىلادى. ونى قۇرىپ، ورناتۋعا 74,9 ميلليون تەڭگە بولىنبەك.

ودان بولەك 79,4 ميلليون تەڭگە 20 ساۋدا ۇيشىگى مەن بىرنەشە شاعىن ساۋلەت نىساندارىن ورناتۋعا باعىتتالادى. ولاردىڭ قاتارىندا «2027» ساندارى بار جارىقديودتى كومپوزيتسيا، شابادان، رەتروتەلەفون، اۋە شارى جانە راديوقابىلداعىش تۇرىندەگى فوتوايماقتار بار.

تاقىرىپتىق جاڭاجىلدىق ينستاللياتسيالارعا، ونىڭ ىشىندە سىيلىق، گراموفون، تەلەفون بۋدكاسى جانە تاتتىلەر تۇرىندەگى كومپوزيتسيالارعا 64,9 ميلليون تەڭگە قاراستىرىلعان. تاعى 69,4 ميلليون تەڭگە اباي الاڭى مەن رەسپۋبليكا سارايىنىڭ ماڭىنداعى كەمىندە 100 اعاشتى جارىقپەن بەزەندىرىپ، فونتانداردى جابۋ جانە دەكوراتيۆتى ەلەمەنتتەر ورناتۋ ءۇشىن بولىنەدى.

ساحنانى تەحنيكالىق جابدىقتاۋعا جانە جاڭاجىلدىق كونتسەرتتىك باعدارلامانى وتكىزۋگە تاعى 138,9 ميلليون تەڭگە قاراستىرىلعان.

ونىڭ تەحنيكالىق ەرەكشەلىكتەرىنە سايكەس، 69,4 ميلليون تەڭگەلىك ءبىرىنشى لوت ساحنانى تەحنيكالىق جابدىقتاۋدى قامتيدى. بۇل تىزىمگە دىبىس جانە جارىق جابدىقتارى، ساحنا، التى جارىق مۇناراسى جانە ءۇش كۇن بويى تەحنيكالىق سۇيەمەلدەۋ كىرەدى.

ەكىنشى لوتقا 69,4 ميلليون تەڭگە جۇمساۋ جوسپارلانىپ وتىر. ول كونتسەرتتىك باعدارلامانى ۇيىمداستىرۋدى كوزدەيدى. ءۇش كۇننىڭ ءارقايسىسىندا كەمىندە بەس تانىمال ەسترادا ءانشىسى، ءبي جانە بالالار شىعارماشىلىق ۇجىمدارى ونەر كورسەتەدى. سونداي-اق اياز اتا مەن اقشاقاردىڭ قاتىسۋىمەن جاڭاجىلدىق تەاترلاندىرىلعان قويىلىم، قازاق جانە ورىس تىلدەرىندە جۇرگىزۋشىلەردىڭ جۇمىسى قاراستىرىلعان.

بۇدان باسقا الماتى مادەنيەت باسقارماسى قالا كوشەلەرىن جارىقتاندىرۋ ارقىلى بەزەندىرۋگە بايقاۋ جاريالادى. 320 دانا ەكى جاقتى جارىقديودتى كونسترۋكتسيانى جاساۋ جانە ورنالاستىرۋ ءۇشىن 84,8 ميلليون تەڭگە قاراستىرىلعان.

وسىلايشا، الماتىنى جاڭاجىلدىق بەزەندىرۋ مەن مەرەكەلىك شارالارعا جاريالانعان لوتتاردىڭ جالپى سوماسى ازىرگە 512 ميلليون تەڭگە كولەمىندە تۇر. بۇل سوما الداعى ۋاقىتتا جاڭا مەملەكەتتىك ساتىپ الۋ قىزمەتتەرىمەن تولىعىپ، ءوسۋى دە مۇمكىن.

ەسكە سالايىق، بۇعان دەيىن الماتىدا قالا كۇنىنە 3D شوۋ ۇيىمداستىرۋعا 200 ميلليون تەڭگە جۇمسالعانىن جازعانبىز.