الماتىدا بەيادەپ سوزدەرمەن كونتەنت تۇسىرەتىن ەكى بلوگەر قامالدى
الماتى. قازاقپارات - TikTok جەلىسىندە بىلاپىت سوزدەر قولدانعان ەكى الماتىلىق بلوگەر 5 تاۋلىككە قاماۋعا الىندى.
قالالىق پوليتسيا دەپارتامەنتىنىڭ مالىمەتىنشە، TikTok جەلىسىنە جۇرگىزىلگەن مونيتورينگ بارىسىندا ەكى جىگىتتىڭ ادەپسىز، بىلاپىت سوزدەر ايتىپ، بالاعات سوزدەردى قولدانعان بەينەجازبالارى انىقتالعان.
- اۆتورلار ۆيدەوداعى ارەكەتتەرىن ءازىل رەتىندە ۇسىنعان. پوليتسيا قىزمەتكەرلەرى ولاردىڭ جەكە باسىنا قاتىستى مالىمەتتەردى انىقتادى. ولار 25 جاستاعى يبرايم ستامبەكوۆ جانە 21 جاستاعى اباي ابدىحانوۆ بولىپ شىقتى. اتالعان فاكتى بويىنشا ەكى ازامات تا اكىمشىلىك جاۋاپكەرشىلىككە تارتىلدى، - دەپ حابارلادى دەپارتامەنتتەن.
سوت شەشىمىمەن ولار كىنالى دەپ تانىلىپ، ءارقايسىسىنا 5 تاۋلىكتەن اكىمشىلىك قاماۋ جازاسى تاعايىندالعان. پوليتسيا جاريالانعان ماتەريالدى «ءازىل» رەتىندە كورسەتۋ جاۋاپكەرشىلىكتەن بوساتپايتىنىن مالىمدەدى.
