الماتىدا 25 ميلليارد تەڭگە تارتقان قارجى پيراميداسىنىڭ باسشىسى سوتتالدى
الماتى. KAZINFORM - الماتىدا المالى اۋداندىق سوتى «AB» قارجى پيراميداسىن ۇيىمداستىرعان جانە وعان قاتىسقان ءبىر توپ ادامعا ۇكىم شىعاردى.
سوت ماتەريالدارىنا سايكەس، 2023-جىلدىڭ قاڭتارىندا ت ەسىمدى ادام «پ ك AB» تۇتىنۋ كووپەراتيۆىنىڭ باعدارلامالارىنا قاتىسۋ سىلتاۋىمەن قارجى پيراميداسىن ۇيىمداستىرعان. ولارعا تابىس تابۋ، اۆتوكولىك نەمەسە باسپانا ساتىپ الۋ مۇمكىندىگى ۇسىنىلعان.
كوپ سالىمشى تارتۋ ماقساتىندا قازاقستاننىڭ ءتۇرلى قالالارىندا كەڭسەلەر جۇمىس ىستەپ، كەزدەسۋلەر مەن ونلاين ءىس-شارالار وتكىزىلگەن. وندا باعدارلامالاردىڭ شارتتارى ءتۇسىندىرىلىپ، ءتيىستى نۇسقاۋلار بەرىلگەن.
كەيىن اتالعان قىزمەتكە ب. , د. , ي. جانە وڭىرلىك باسشىلار تارتىلعان. ولار جاڭا قاتىسۋشىلاردى تارتۋمەن، كەڭسەلەردىڭ جۇمىسىن ۇيىمداستىرۋمەن، اقشانى باقىلاۋداعى شوتتارعا اۋدارۋمەن اينالىسقان.
- تارتىلعان قاراجات قاتىسۋشىلار الدىنداعى مىندەتتەمەلەر ءۇشىن كاسىپكەرلىك قىزمەتكە پايدالانىلماعان. اقشا جۇيە قاتىسۋشىلارى اراسىندا قايتا ءبولىنىپ، بونۋستار تولەۋگە، شارۋاشىلىق شىعىندارىنا جانە وزگە دە ماقساتتارعا جۇمسالعان،-دەلىنگەن سوت ۇكىمىندە.
جالپى «AB» ازاماتتاردان 25,4 ميلليارد تەڭگە العان.
سوتتالۋشىلار وزدەرىنە تاعىلعان ايىپتاردى مويىنداماي، اقتاۋ ۇكىمىن شىعارۋدى سۇرادى.
سوت ۇكىمىمەن ت ەسىمدى ادام قىلمىستىق كودەكستىڭ 217-بابى 2-بولىگى 2-تارماعى «قارجى پيراميداسىن قۇرۋ جانە باسشىلىق ەتۋ» بويىنشا كىنالى دەپ تانىلىپ، 8 جىلعا باس بوستاندىعىنان ايىرىلدى.
سونداي-اق وعان 7 جىل قارجىلىق قىزمەتپەن اينالىسۋ قۇقىعىنان ايىرۋ جازاسى تاعايىندالدى.
ب. , د. جانە ي. وسى باپ بويىنشا 7 جىلعا باس بوستاندىعىنان ايىرىلدى. ونىمەن قوسا 6 جىلعا قارجىلىق قىزمەتپەن اينالىسۋ قۇقىعىنان ايىرۋ جازاسى تاعايىندالدى.
ەسكە سالساق، كۇن سايىن تابىس تابۋدى ۋادە ەتكەن CVK قارجى پيراميداسىن ۇيىمداستىرۋشى سوتتالعان ەدى.
