الماتى وبلىسىنىڭ تاۋلارىندا ءمايىت تابىلدى: الپينيست 19 جىل بۇرىن جوعالعان
قونايەۆ. KAZINFORM - الماتى وبلىسىنىڭ تاۋلارىندا تابىلعان ءالپينيستىڭ 19 -جىل بۇرىن جوعالىپ كەتكەنى بەلگىلى بولدى.
بۇعان دەيىن شەتەلدىك تۋريستەر الماتى وبلىسىنىڭ تالعار اۋدانىندا، سيەۆەرتسوۆ مۇزدىعى ماڭىندا تەڭىز دەڭگەيىنەن 3400 مەترگە جۋىق بيىكتىكتە بەلگىسىز ادامنىڭ ءمايىتىن تاپقان بولاتىن. ولار بۇل تۋرالى توتەنشە جاعدايلار مينيسترلىگىنە حابارلاعان.
اقپارات تۇسكەن سوڭ ق ر ت ج م قۇتقارۋشىلارى وقيعا ورنىنا جەتىپ، ءمايىتتى قاتىناۋعا قيىن تاۋلى اۋماقتان ەۆاكۋاتسيالادى. ءمايىتتى تومەنگە جەتكىزۋ ءۇشىن «قازاۋەقۇتقارۋ» تىكۇشاعى تارتىلدى.
وقيعا تۋرالى الەۋمەتتىك جەلىدە الماتى تۇرعىنى اناستاسيا احمەتوۆا جازىپ، قازا تاپقان الپينيست جابدىقتارىنىڭ فوتوسۋرەتتەرىن جاريالاعان ەدى. بۇل جازبا بويىنشا وعان كوپ ۋاقىت بۇرىن جوعالعان ازاماتتىڭ قىزى نەلليا ميحەيەۆا حابارلاسقان. ول سۋرەتتەگى سومكەنى اكەسىنىڭ دورباسىنا ۇقساتقان. ونىڭ ايتۋىنشا، اكەسى 2007 -جىلى جوعالىپ كەتكەن.
- ارادا 19 جىل وتكەندە اكەمنىڭ سۇيەكتەرى تابىلدى. تاڭەرتەڭ قۇربىم ءبىزدىڭ جولدورباعا وتە ۇقساس سومكەنىڭ سۋرەتى بار حابارلامانى جىبەردى. كەيىن بۇل جازبانى كۇيەۋىم دە جىبەردى. مەن ت ج م وكىلدەرىنە حابارلاستىم، ولار ماعان ءمايىتتى تومەن تۇسىرگەن قۇتقارۋشىنىڭ جانە تەرگەۋشىنىڭ تەلەفون ءنومىرىن بەردى. تەرگەۋشى بارلىق سۋرەتتەر مەن قۇجاتتاردى جىبەرۋدى سۇرادى. كەيىن قايتا حابارلاسىپ، جولدوربانىڭ ىشىنەن اكەمنىڭ اتىنا جازىلعان كۋالىك تابىلعانىن ايتتى، - دەدى نەلليا ميحەيەۆا.
