الماتى تۇرعىندارىنىڭ ۇرەيىن ۇشىرعان ەر ادام ۇستالدى
استانا. KAZINFORM - الماتى تۇرعىندارىنىڭ ۇرەيىن ۇشىرعان ەر ادام ۇستالدى.
كۇدىكتىنىڭ ارەكەتى بەينەباقىلاۋ كامەراسىنا ءتۇسىپ قالىپ، الەۋمەتتىك جەلىدە تاراعان. تەرگەۋ دەرەگىنە سايكەس كۇدىكتى نەگىزىنەن الماتى مەن استانا قالالارىندا ارەكەت ەتكەن.
ول قۇلىپتالماعان ەسىكتەردى پايدالانىپ، بوتەننىڭ ۇيىنە كىرىپ، باعالى زاتتارىن الىپ كەتكەن.
الماتى قالاسىنىڭ كريمينالدىق پوليتسيا قىزمەتكەرلەرى المالى اۋداندىق پوليتسيا باسقارماسىنىڭ ماماندارىمەن بىرلەسىپ، جەدەل ىزدەستىرۋ ءىس-شارالارى بارىسىندا بۇرىن سوتتالعان ەر ادامدى ۇستاعان. ول بىرنەشە پاتەر ۇرلىعىنا قاتىسى بار دەگەن كۇدىككە ىلىنگەن.
«الماتىدا ونىڭ التى پاتەر ۇرلىعىنا قاتىسى بارى دالەلدەندى. ءبىر جاعدايدا پاتەردىڭ كىرەبەرىسىنەن ىشىندە 20 مىڭ تەڭگە بولعان سومكە جوعالسا، تاعى ءبىر وقيعادا كەلگەن شىعىن كولەمى 40 مىڭ تەڭگەگە جەتكەن. تەرگەۋ جالعاسىپ جاتىر»، - دەپ جازىلعان حابارلامادا.
پوليتسيا تۇرعىنداردى ساق بولۋعا شاقىردى.
