الماتى تۇرعىندارى قىستا قايدا تەگىن كونكي تەبە الادى
الماتى. قازاقپارات - 2026-2027 -جىلعى قىسقى ماۋسىمدا الماتىدا اشىق اسپان استىنداعى 19 مۇز ايدىنىن اشۋ جوسپارلانىپ وتىر.
قالالىق سپورت باسقارماسى وكىلدەرىنىڭ مالىمەتىنشە، مۇز ايدىندارى قالانىڭ بارلىق سەگىز اۋدانىندا اشىلادى. ونىڭ 12 سى تەگىن.
مۇز ايدىندارى ساياباقتاردا، ءىرى سپورت ارەنالارىنىڭ ماڭىندا، ساۋدا ورتالىقتارى مەن تۇرعىن الاپتاردا اشىلادى. ولاردىڭ جالپى اۋماعى 20 مىڭ شارشى مەتردەن اسادى.
بيىل العاش رەت بەس تەگىن مۇز ايدىنى Flow Park اۋماعىندا، الماتى يپپودرومىندا، شۇعىلا شاعىناۋدانىنداعى № 221-مەكتەپتە، ساكەن سەيفۋللين اتىنداعى ساياباقتا جانە «سۇڭقار» شاڭعىمەن تۇعىردان سەكىرۋ كەشەنىندە جابدىقتالادى.
مۇز ايدىندارى قايدا اشىلادى؟
الاتاۋ اۋدانىندا - «الماتى ارەنا» اۋماعىندا؛
المالى اۋدانىندا - قبتۋ اۋماعىندا؛
اۋەزوۆ اۋدانىندا - Family Park ساياباعىندا؛
بوستاندىق اۋدانىندا - گاندي كوشەسىندەگى تۇڭعىش پرەزيدەنت قورىنىڭ ساياباعىندا، Flow Park-تا، «سۇڭقار» شاڭعىمەن تۇعىردان سەكىرۋ كەشەنىندە، Esentai Mall, Villa Boutiques جانە Restaurants جانە MEGA Alma-Ata ساۋدا ورتالىقتارىندا؛
جەتىسۋ اۋدانىندا - الماتى يپپودرومىندا جانە كوكجيەك شاعىناۋدانىنداعى Kokjiek Garden اۋماعىندا؛
مەدەۋ اۋدانىندا - «تەررەنكۋر» ساياباعىندا، «حالىق ارەنادا»، 28 گۆاردياشى-پانفيلوۆشىلار اتىنداعى ساياباقتا، Dostyk Plaza ساۋدا ورتالىعىندا، Haragun ات كلۋبىندا جانە ورتالىق مادەنيەت جانە دەمالىس ساياباعىندا؛
ناۋرىزباي اۋدانىندا - شۇعىلا شاعىن اۋدانىنداعى № 221-مەكتەپ اۋماعىندا؛
تۇركسىب اۋدانىندا - ساكەن سەيفۋللين اتىنداعى ساياباقتا.
مۇز ايدىندارىن جەلتوقسان ايىندا اشۋ جوسپارلانىپ وتىر. ناقتى مەرزىمى اۋا رايىنا بايلانىستى بەلگىلەنەدى.
تەگىن مۇز ايدىندارىنىڭ جۇمىس كەستەسى
تەگىن مۇز ايدىندارىندا كۇن سايىن ساعات 10:00 دەن 23:00 گە دەيىن سىرعاناۋعا بولادى. ءار الاڭدا كوپشىلىككە ارنالعان ءتورت سىرعاناۋ سەانسى ۇيىمداستىرىلادى. ءاربىر سەانس 2,5 ساعاتقا سوزىلادى.
10:00- 12:30
13:30- 16:00
17:00- 19:30
20:30- 23:00
سەانستار اراسىنداعى ۇزىلىستە مۇز كەلەسى سىرعاناۋ ۋاقىتىنا دايىندالادى. تەگىن مۇز ايدىندارىنا كەلۋشىلەر كونكيىمەن سىرعاناي الادى نەمەسە كونكيدى اقىلى تۇردە جالعا الا الادى. كونكيدى جالعا الۋ قۇنىن قىزمەت كورسەتۋشى ۇيىمدار بەلگىلەيدى.
ەسكە سالايىق، پاۆلوداردا مۇز كەشەنىن سالۋعا 19,9 ميلليارد تەڭگە بولىنگەن ەدى.