الماتى كوشەلەرىندەگى سكايترەين قورشاۋلارى: قالادا جاڭا كولىك جولى سالىنا باستادى ما
الماتى. KAZINFORM - الماتى كوشەلەرىندە جاڭا كولىك ءتۇرىنىڭ اتى جازىلعان قورشاۋلار پايدا بولدى.
الماتىلىقتار اراسىندا ساين كوشەسى مەن ءال-فارابي داڭعىلىنىڭ كەي ۋچاسكەلەرىندە SkyTrain دەپ جازىلعان قورشاۋلار قىزىعۋشىلىق تۋدىردى. تۇرعىندار قالادا «جەرۇستىمەن جۇرەتىن رەلستى كولىكتىڭ قۇرىلىستى باستالدى ما» دەگەن بولجام جاساپ وتىر.
اتالعان باننەرلەرگە بايلانىستى قالا اكىمدىگى تۇسىنىكتەمە بەردى.
رەسمي جاۋاپقا سايكەس، قازىرگى ۋاقىتتا SkyTrain جوباسى اياسىندا وسى ۋچاسكەدە جوبالىق قۇجاتتامانى ازىرلەۋگە قاجەتتى ينجەنەرلىك-گەولوگيالىق ىزدەستىرۋ جۇمىستارى جۇرگىزىلىپ جاتىر.
- اتالعان جۇمىستار قىسقا مەرزىم ىشىندە ورىندالادى. سۋرەتتە كورسەتىلگەن ۋچاسكەدەگى جۇمىستار 13-قازاندا اياقتالادى، - دەپ حابارلادى اكىمدىكتەن.
ەسكە سالايىق، الماتىدا جول- كولىك ينفراقۇرىلىمىن بىرنەشە باعىتتا دامىتۋ جوسپارلانىپ وتىرعانى حابارلاندى. ونىڭ ىشىندە LRT، SkyTrain جانە مەترو جەلىلەرى بار.
سونىمەن قاتار الماتىدا 40 ميلليارد بولىنگەن رايىمبەك داڭعىلىنداعى BRT جوباسى SkyTrain جوباسىنا بايلانىستى توقتاتىلعانىن جازعانبىز.
