الماتى مەن استانا الەمدەگى ۇزدىك 300 قالانىڭ قاتارىنا كىردى
استانا. KAZINFORM - قازاقستاننىڭ قوس قالاسى Global Cities Index 2026 رەيتينگىنىڭ ۇزدىك ءۇش جۇزدىگىنە ەنىپ، ت م د- نىڭ كوپتەگەن قالاسىنان وزىپ كەتتى.
الماتى مەن استانا Oxford Economics حالىقارالىق زەرتتەۋ ۇيىمى جاسايتىن Global Cities Index 2026 رەيتينگى بويىنشا الەمنىڭ ۇزدىك 300 قالاسىنىڭ قاتارىنا ەندى. 1000 قالانى قامتىعان تىزىمدە الماتى 265-ورىنعا، ال استانا 281-ورىنعا جايعاستى. وسىلايشا، قازاقستاننىڭ ەكى مەگاپوليسى ورتالىق ازيا قالالارى اراسىندا كوش باستاپ، پوستكەڭەستىك كەڭىستىكتەگى ءبىرقاتار ءىرى قالادان جوعارى ناتيجە كورسەتتى.
الماتى مەن استانادان كەيىن تبيليسي 287-ورىنعا، كيەۆ 304-ورىنعا، ماسكەۋ 313-ورىنعا، باكۋ 323-ورىنعا، سانكت-پەتەربۋرگ 454-ورىنعا، ال بىشكەك 461-ورىنعا ورنالاستى.
الماتى مەن استانا ادامي كاپيتال كورسەتكىشى بويىنشا ودان دا جوعارى ناتيجەگە قول جەتكىزدى. الماتى الەم بويىنشا 66-ورىنعا، ال استانا 98-ورىنعا جايعاستى. بۇل كورسەتكىش بويىنشا قازاقستاندىق مەگاپوليستەر انكارا، ۆارشاۆا، پراگا، تاللين، ماسكەۋ جانە باسقا دا ءىرى قالالاردان جوعارى تۇر.
وسىلايشا، قازاقستاننىڭ ەكى ءىرى قالاسى زاماناۋي مەگاپوليستىڭ دامۋ دەڭگەيىن سيپاتتايتىن نەگىزگى كورسەتكىشتەردىڭ ءبىرى بويىنشا الەمنىڭ ۇزدىك 100 قالاسىنىڭ قاتارىنا كىردى.
ادامي كاپيتال دەگەنىمىز - قالادا تۇراتىن، ءبىلىم الاتىن جانە ەڭبەك ەتەتىن ادامداردىڭ الەۋەتى. وعان تۇرعىنداردىڭ ءبىلىم دەڭگەيى، بىلىكتى مامانداردىڭ بولۋى، جۇمىس كۇشىنىڭ ساپاسى، سونداي-اق قالانىڭ تالانتتى كادرلاردى تارتۋ جانە دامىتۋ مۇمكىندىگى جاتادى.
بۇل كورسەتكىش بويىنشا قازاقستان قالالارىنىڭ ناتيجەسى ەرەكشە نازار اۋدارتادى. ياعني الماتى مەن استانانىڭ دامۋ الەۋەتى تەك ينفراقۇرىلىمعا، ينۆەستيتسيا كولەمىنە نەمەسە ەكونوميكا اۋقىمىنا عانا ەمەس، ەڭ الدىمەن ادام كاپيتالىنا بايلانىستى ەكەنىن كورسەتەدى.
ەكونوميكالىق كورسەتكىش بويىنشا استانا الماتىدان جوعارى ناتيجە كورسەتتى. قازاقستاننىڭ ەلورداسى بۇل ساناتتا 264-ورىندا، ال الماتى 288-ورىندا تۇر.
Oxford Economics رەيتينگى ەكونوميكا مەن ادامي كاپيتالدان بولەك، ءومىر ءسۇرۋ ساپاسىن، قورشاعان ورتانىڭ جاعدايىن جانە باسقارۋ تيىمدىلىگىن دە ەسكەرەدى. وسى بەس باعىتتاعى كورسەتكىشتەر نەگىزىندە قالالاردىڭ جالپى رەيتينگى قالىپتاستىرىلادى.
الەمدىك رەيتينگتىڭ العاشقى ۇشتىگىنە ەكىنشى جىل قاتارىنان نيۋ- يورك، لوندون جانە پاريج كىردى.
قازاقستان ءۇشىن رەيتينگتىڭ باستى ناتيجەلەرىنىڭ ءبىرى - الماتى مەن استانانىڭ الەمدەگى 1000 قالانىڭ اراسىندا العاشقى ۇشتەن بىرىنە ەنۋى، ورتالىق ازيا قالالارى اراسىندا جوعارى ورىندارعا جايعاسۋى جانە ادامي كاپيتال كورسەتكىشى بويىنشا الەمنىڭ ۇزدىك جۇزدىگىنە كىرۋى.
بۇل كورسەتكىش قالالاردىڭ بولاشاعىن باعالاۋدا ماڭىزدى فاكتورلاردىڭ ءبىرى سانالادى. ويتكەنى قازىرگى زامانعى قالانىڭ باسەكەگە قابىلەتتىلىگى عيماراتتار، جولدار نەمەسە ەكونوميكانىڭ كولەمىمەن عانا ولشەنبەيدى. قالا ءۇشىن ءبىلىمدى، بىلىكتى جانە كاسىبي مامانداردىڭ سول جەردە ءومىر ءسۇرىپ، جۇمىس ىستەۋدى تاڭداۋى دا ماڭىزدى.
وسى تۇرعىدان العاندا، الماتى مەن استانانىڭ ادامي كاپيتال كورسەتكىشى بويىنشا جوعارى ناتيجە كورسەتۋى قازاقستاننىڭ ەكى مەگاپوليسىنىڭ دامۋىنداعى ماڭىزدى فاكتورلاردىڭ ءبىرى رەتىندە قاراستىرىلادى.
el.kz
