الاتاۋ قالاسىنان 10 سوتىق تەگىن جەر الۋعا بولا ما
قونايەۆ. KAZINFORM - الاتاۋ قالاسىنىڭ اۋماعىنان جەكە تۇرعىن ءۇي قۇرىلىسىنا ارنالعان جەر تەلىمدەرى بولىنەدى مە؟ بۇل سۇراققا الماتى وبلىسى جەر قاتىناستارى باسقارماسىنىڭ باسشىسى امانجول ابدراحمانوۆ جاۋاپ بەردى.
ۆەدومستۆو باسشىسىنىڭ ايتۋىنشا، بۇگىندە الماتى وبلىسىندا 1442700 ازامات جەكە تۇرعىن ءۇي قۇرىلىسى ءۇشىن جەر ۋچاسكەلەرىن الۋعا كەزەكتە تۇر. ال كەيىنگى 3 جىل ىشىندە وبلىس تۇرعىندارىنا 1002 جەر ۋچاسكەسى بەرىلگەن.
- الماتى وبلىسىندا جەكە تۇرعىن ءۇي قۇرىلىسىنا ارنالعان جەر ۋچاسكەلەرىن بەرۋ قارقىنى ءالى دە شەكتەۋلى دەڭگەيدە قالىپ وتىر. سوڭعى 3 جىلدا وبلىس تۇرعىندارىنا 1002 جەر ۋچاسكەسى بەرىلگەن. بۇل جىلىنا ورتا ەسەپپەن 334 جەر ۋچاسكەسى. سونىمەن قاتار 2025-2026 -جىلدارى قوسىمشا 295 جەر ۋچاسكەسى بەرىلدى،- دەدى امانجول ابدراحمانوۆ اگەنتتىك ساۋالىنا بەرگەن جاۋابىندا.
ول بەرىلەتىن تەگىن جەر تەلىمدەرىن دايىنداۋدا نەگىزگى باسىمدىق قالا ماڭىنداعى جانە جاڭادان قالىپتاسىپ جاتقان تۇرعىن ءۇي القاپتارىندا ينجەنەرلىك ينفراقۇرىلىمدى دامىتۋعا، ونىڭ ىشىندە اۆتوموبيل جولدارىن سالۋعا، ەلەكترمەن جابدىقتاۋ جەلىلەرىن تارتۋعا، سۋمەن جابدىقتاۋ جۇيەلەرىن جۇرگىزۋگە جانە گازداندىرۋعا باعىتتالعانىن اتاپ ءوتتى.
سونىمەن قاتار جەر قاتىناستارى باسقارماسىنىڭ باسشىسى الاتاۋ قالاسىنىڭ اۋماعىنان جەر ۋچاسكەلەرىنىڭ بەرىلۋى تۋرالى تۇسىنىكتەمە بەردى.
- قازىرگى ۋاقىتتا الاتاۋ قالاسىنىڭ اۋماعىندا ازاماتتارعا جەكە تۇرعىن ءۇي قۇرىلىسى ءۇشىن وتەۋسىز نەگىزدە 10 سوتىق جەر ۋچاسكەلەرى بەرىلمەگەن. سونىمەن قاتار الداعى ۋاقىتتا الاتاۋ قالاسىنىڭ اۋماعىندا جەكە تۇرعىن ءۇي قۇرىلىسى ءۇشىن جەر ۋچاسكەلەرىن بەرۋ جوسپارلانبايدى،- دەدى ول.
ەسكە سالايىق، بۇعان دەيىن الماتىدا تەگىن 10 سوتىق جەر بەرۋ توقتاتىلعانىن جازعانبىز.
