الاتاۋ حالقى 2050-جىلعا قاراي 1,9 ميلليون ادامعا جەتۋى مۇمكىن
قونايەۆ. KAZINFORM - جاڭادان قۇرىلعان الماتى وبلىسىن دامىتۋ بۇگىندە ۇكىمەتتىڭ باستى نازارىندا. شەشىمىن تابۋى ءتيىس ماسەلەلەر از ەمەس. وسى ورايدا، وبلىس اكىمى مارات سۇلتانعازيەۆ وڭىردەگى وزەكتى ماسەلەلەر مەن ولاردى شەشۋدە قانداي جۇمىستار ءجۇرىپ جاتقانىن ايتىپ بەردى.
- مارات ەلەۋسىز ۇلى، وتكەن جىلى وبلىس اۋماعىندا «G4 City» ارنايى ەكونوميكالىق ايماعى قۇرىلعان ەدى. جوبانى ىسكە اسىرۋ بارىسى تۋرالى ايتىپ وتسەڭىز...
- وتكەن جىلى 12-جەلتوقسان كۇنى ۇكىمەتتىڭ «Alatau» ارنايى ەكونوميكالىق ايماعى قۇرىلسىن دەگەن قاۋلىسى شىقتى. ونىڭ الدىندا بۇل جوبا «G4 City» ارنايى ەكونوميكالىق ايماعى دەپ اتالعان ەدى. وزدەرىڭىزگە ءمالىم، پرەزيدەنتتىڭ 9- قاڭتارداعى «الماتى وبلىسىنىڭ اكىمشىلىك-اۋماقتىق قۇرىلىسىنداعى وزگەرىستەر تۋرالى» جارلىعى بويىنشا، ىلە اۋدانىنان جەتىگەن اۋىلى ءبولىنىپ، «الاتاۋ» قالاسى دەگەن اتقا يە بولىپ، وبلىستىق ماڭىزى بار قالا ساناتىنا جاتقىزىلدى. قازىرگى تاڭدا «الاتاۋ» قالاسى - جاي عانا جوبا ەمەس، ەكونوميكالىق پروگرەستىڭ ناعىز قوزعالتقىشىنا اينالاتىن مەكەن. قالا قارجى، بيزنەس، ساۋدا، ءبىلىم بەرۋ، دەنساۋلىق ساقتاۋ، سپورت، تۋريزم جانە ويىن-ساۋىق سالاسىندا جوعارى دەڭگەيدەگى قىزمەتتەردى ۇسىناتىن ءىرى ورتالىق رەتىندە جوبالاندى. تىپتەن حالىق سانى 2050-جىلعا قاراي 1,9 ميلليون ادامعا جەتەدى دەگەن بولجام دا بار. سونىمەن قاتار، 168 زاماناۋي مەكتەپ، 219 بالاباقشا، 102 ەمدەۋ مەكەمەسىن سالۋ جوسپارلانىپ وتىر. جاڭا قالادا 40 مىڭ ستۋدەنت وقي الاتىن اكادەميالىق قالاشىق پەن 1 ميلليون جۋىق جاڭا جۇمىس ورنىن اشۋدى كوزدەپ وتىرمىز. بۇل اۋقىمدى جوسپار تەك الماتى وبلىسىنىڭ عانا ەمەس، بۇكىل ەلىمىزدىڭ ەكونوميكالىق ءوسىمىنىڭ قوزعاۋشى كۇشىنە اينالادى. سونداي-اق، 4 ميلليون استام تۋريستى قابىلداي الاتىنداي جاعداي جاسالادى.
ايتا كەتەيىك، ينتەگراتسيالانعان قالا ءتورت اۋداننان تۇرادى. ولار: Gate City - ىسكەرلىك جانە قارجىلىق ورتالىق، Golden District - ءبىلىم بەرۋ جانە مەديتسينالىق حابى، Growing District - يننوۆاتسيالىق-يندۋستريالىق جانە ساۋدا-لوگيستيكالىق ايماق، Green District - تۋريستىك كلاستەر.
«الاتاۋ» ەركىن ەكونوميكالىق اۋماعى دا ۇلعايادى. ول الماتى وبلىسىندا، الماتى قالاسىنىڭ سولتۇستىگىندە، 80 شاقىرىمدىق ا3 (الماتى - قونايەۆ) تاس جولىنىڭ بويىندا 96560 گەكتار اۋماقتا ورنالاسادى. ال، G4 City ەركىن ەكونوميكالىق اۋماعى 30 مىڭ گەكتاردى قامتىعان ەدى.
ەركىن ەكونوميكالىق اۋماقتا ارنايى قۇقىقتىق رەجيم بەلگىلەنەدى، ياعني شەتەل ازاماتتارى مەن ازاماتتىعى جوق ادامداردىڭ، سونداي-اق ولاردىڭ كولىك قۇرالدارىنىڭ قازاقستان رەسپۋبليكاسىنىڭ زاڭناماسىندا جانە قازاقستان رەسپۋبليكاسى راتيفيكاتسيالاعان حالىقارالىق كەلىسىمدەردە بەلگىلەنگەن كىرۋ، شىعۋ، ترانزيت جانە بولۋ ءتارتىبى قولدانىلادى.
- الماتى وبلىسىندا اۋىز سۋ ماسەلەسى بار ەكەنى جاسىرىن ەمەس. بۇگىنگى كۇنى بۇل ماسەلەنى شەشۋ ءۇشىن قانداي جۇمىستار ىستەلىپ جاتىر؟
- وبلىستا 384 ەلدى مەكەننىڭ 358 ءى (93,5 پايىز) ورتالىقتاندىرىلعان سۋمەن قامتىلعان، 24 ەلدى مەكەن ورتالىقتاندىرىلماعان، 2 اۋىل تاسىمالداناتىن سۋدى پايدالانادى. جالپى سۋ قۇبىرى جەلىلەرىنىڭ ۇزىندىعى - 5 128 شاقىرىم. بۇل رەتتە ۇكىمەتتىڭ «ءاربىر ەلدى مەكەندە تازا اۋىز سۋ» ۇلتتىق جوباسى شىققان بولاتىن. وعان وبلىس بويىنشا 2023-2025-جىلدارعا ارنالعان 90 جوبا ەنگىزىلدى. ۇلتتىق جوبا شەڭبەرىندە 2 قالا جانە 79 اۋىلدا جەلىلەردى قايتا جاڭارتۋ، 9 اۋىلدا جاڭا قۇرىلىس جوسپارلانىپ وتىر. بارلىق جوبالار اياقتالعان سوڭ، 498 شاقىرىم جەلى سالىنىپ، قايتا جاڭارتىلادى. ناتيجەسىندە سۋمەن جابدىقتاۋ جەلىلەرىنىڭ توزۋى 53,5 پايىزدان 47 پايىزعا دەيىن تومەندەيدى.
2024-جىلعا قاراي اۋىلدىق ەلدى مەكەندەردى ورتالىقتاندىرىلعان اۋىز سۋ جۇيەسىمەن قامتۋ 96 پايىزعا جەتۋى كەرەك، ال قالالار 100 پايىز قامتىلعان. اۋىلدىق ەلدى مەكەندەردى ورتالىقتاندىرىلعان سۋمەن قامتۋ بويىنشا 2025-جىلى 99,6 پايىزعا دەيىن قول جەتكىزۋ جوسپارلاندى.
بىزدە ءاردايىم سۋ ماسەلەسىن كوتەرىپ جۇرگەن قاراساي مەن تالعار اۋداندارى. ونىڭ سەبەبى دە تۇسىنىكتى، الماتى قالاسىنا جاقىن ورنالاسقاندىقتان بۇل جانە باسقا دا اۋدانداردىڭ اۋىلدارىندا باستاپقىدا جوسپارلانعانعا قاراعاندا تۇرعىنداردىڭ سانى الدەقايدا كوپ. اكىمدىكتەر تاراپىنان اۋىز سۋمەن قامسىزداندىرۋ جۇيەلەرىنىڭ جۇمىسىن جاقسارتۋ بويىنشا جۇمىستار جۇرگىزىلىپ جاتىر. وبلىستىق باسقارمالار مەن ورگاندار تالداۋ جاساپ، الداعى ۋاقىتتا وڭ وزگەرىستەرگە قول جەتكىزەمىز. بۇگىندە سۋمەن جابدىقتاۋ جانە سۋ بۇرۋ جۇيەلەرىن قايتا جاڭعىرتۋ جانە سالۋ ءۇشىن 72 جوبالىق- سمەتالىق قۇجات ازىرلەنىپ جاتىر.
- الماتى وبلىسى - قازاقستاننىڭ تۋريستىك جەرۇيىعى ىسپەتتەس. مۇندا الاتاۋ تاۋى، بالقاش، كولساي، قايىڭدى، قاپشاعاي سىندى تابيعاتى اسەم كولدەر، سارقىرامالار جەتەرلىك. جالپى، وڭىردە تۋريزم سالاسى قالاي دامىپ جاتىر؟
- ەلىمىزدىڭ 2025-جىلعا دەيىنگى اۋماقتىق دامۋ جوسپارىندا ءتۋريزمدى دامىتۋ، وڭىرلەردىڭ ەكونوميكالىق الەۋەتىنىڭ وسۋىنە نەگىز بولادى. وتكەن جىلعى جەتكەن جەتىستىكتەردىڭ ءبىرى – ب ۇ ۇ- نىڭ ءبىزدىڭ ءوڭىردىڭ تۋريستىك الەۋەتىن رەسمي تۇردە مويىنداۋى. سامارقاند قالاسىندا وتكەن دۇنيەجۇزىلىك تۋريستىك ۇيىمى باس اسسامبلەياسىنىڭ 25-مەرەيتويلىق سەسسياسىندا ءبىزدىڭ ساتى اۋىلى «ۇزدىك تۋريستىك اۋىل-2023» اتاعىنا يە بولدى. بۇل جاڭالىق تۋريزمدى دامىتۋعا جانە مادەني، تابيعي مۇرامىزدى ساقتاۋعا دەگەن مىندەتتەمەمىزدى راستايدى.
بىلىكتى ماماندار ءار اۋداننىڭ ەرەكشەلىگى مەن تۋريستىك الەۋەتىن ەسكەرە وتىرىپ، الماتى وبلىسى تۋريستىك سالاسىنىڭ ماستەر- جوسپارىن ازىرلەدى. وندا تۋريزم سالاسىنداعى مەملەكەتتىك ساياساتتى ىسكە اسىرۋدىڭ ماقساتتارى، مىندەتتەرى مەن كەزەڭدەرى كورسەتىلگەن. ونىڭ ىشىندە ەكوتۋريزم، سپورتتىق تۋريزم، تاۋ كلاستەرى، اگروتۋريزم مەن جاعاجاي تۋريزمىنە باستى نازار اۋدارىلعان. وسى بويىنشا، «كولساي كولدەرى»، «تاڭبالى» مۇراجايى، «تامعالىتاس» پەتروگليفتەرى مەن قايىڭدى كولى اۋماعىندا 337 شاقىرىم تۋريستىك اباتتاندىرۋ جۇمىستارى جۇرگىزىلدى. تۋريستىك ينفراقۇرىلىم تۋريستەر كوپ جينالاتىن جەرلەردە ورناتىلادى. بيىل دا وسى جۇمىستاردى جالعاستىرۋ جوسپاردا بار.
2023-جىلدىڭ قورىتىندىسى بويىنشا وبلىستىڭ تۋريزم سالاسىنداعى ينۆەستيتسيالار كولەمى 52 ميلليارد تەڭگە بولدى، بۇل - رەسپۋبليكا بويىنشا Ⅱ كورسەتكىش. سونىمەن قاتار، تۋريستىك قىزمەتتەر كورسەتەتىن وبەكتىلەردى انىقتاۋ ءۇشىن «Alma. Reg» (App store ارقىلى جۇكتەۋگە بولادى) قوسىمشاسى جۇمىس ىستەيدى. قوسىمشادا تۋريستەرگە قاجەتتى اقپارات، ونىڭ ىشىندە دەستيناتسيالار، ورنالاستىرۋ ورىندارى، ساناتورييلەر، كولىكتەر، كۋرورتتار جانە وزگە دە پايدالى اقپارات بار.
«ALMATYREGION. TRAVEL» سايتىندا تۋريستەرگە وبلىستىڭ تۋريستىك الەۋەتى، تابيعي، تاريحي، مادەني تۋريزم وبەكتىلەرى تۋرالى قازاق، ورىس جانە اعىلشىن تىلدەرىندە قاجەتتى اقپارات الۋعا مۇمكىندىكتەر بار.
بىلتىر وبلىستىڭ تۋريستىك ونىمدەرىن ىلگەرىلەتۋ بويىنشا «Qonaev International balloon fest» حالىقارالىق شار فەستيۆالى ، «Tengri ultra» ۇلى دالا مارافونى، «Oceanman» نەمەسە- بالقاش رەگاتاسى سەكىلدى ءىس-شارالار جۇزەگە اسىرىلدى. بۇل شارالار ءبىزدىڭ وڭىرگە 100 مىڭنان استام دەمالۋشىنى تارتا وتىرىپ، وڭ يميدج قالىپتاستىرادى.
بىلتىر ىشكى ساياحاتشىلار - 322316 ادام بولدى، مەملەكەتتىك ۇلتتىق تابيعي پاركىمەن بىرگە ەسەپتەگەندە - 1,3 ميلليون ادام. «eqonaq» اقپاراتتىق جۇيەسىنىڭ 2023-جىلعى دەرەكتەرىنە سايكەس، وبلىسقا شەتەلدەن 83,6 مىڭ ادام كەلگەن، رەسپۋبليكا بويىنشا ۇشتىكتەمىز.
- وبلىستا وزەكتى ماسەلە - اۋىلداردى گازداندىرۋ ماسەلەسى. وتكەن جىلى قىركۇيەك ايىندا پارلامەنت ماجىلىسىندە وبلىستا گازداندىرۋ ماسەلەسى كوتەرىلىپ، وڭىردە گازداندىرۋعا جاتاتىن 294 ەلدى مەكەننىڭ تەڭ جارتىسى ءالى گازسىز وتىرعانى ايتىلعان ەدى. ماسەلە شەشىلە باستادى ما؟
- وبلىستاعى 384 ەلدى مەكەننىڭ 294 ءى گازداندىرۋعا جاتادى، قازىرگى ۋاقىتتا 149 ەلدى مەكەن گازداندىرىلعان، ياعني بارلىعى 1,1 ميلليون ادام گازعا قول جەتكىزىپ وتىر.
قازىرگى ۋاقىتتا 16 اۋىل بويىنشا قۇرىلىس-مونتاج جۇمىستارى جۇرگىزىلىپ جاتىر، وعان بيۋدجەتتەن 3,5 ميلليارد تەڭگە ءبولىندى. سونداي-اق ماۋسىمدا جامبىل اۋدانىنىڭ سامسى جانە ۇلگىلى اۋىلدارىنىڭ 2 نىسانى پايدالانۋعا بەرىلدى.
وسى جىلدىڭ ءى توقسانىندا 6 نىساننىڭ قۇرىلىسى اياقتالۋى ءتيىس. بالقاش اۋدانى بويىنشا بوياۋلى، ميالى اۋىلدارى، تالعار اۋدانى بويىنشا قاينار، كوكتال، اۋىلدارى، ۇيعىر اۋدانىنداعى شارىن جانە جامبىل اۋدانىنداعى بىرلىك اۋىلىنا گاز بەرىلەدىدەگەن جوسپار بار.
بۇگىنگى كۇنى «باقاناس» ا گ ت س- تە اعىمداعى جوندەۋ جۇمىستارى اياقتالدى، ناتيجەسىندە بالقاش اۋدانى باقاناس اۋىلىنىڭ 7 مىڭ تۇرعىنى تابيعي گازعا قول جەتكىزدى. جامبىل اۋدانى بەرىكتاس، دەگەرەس ەلدى مەكەندەرى جانە ىلە اۋدانى جاڭاارنا، ەڭبەك ەلدى مەكەندەرى بويىنشا گاز تاراتۋ جەلىلەرىن سالۋعا 1,6 ميلليارد تەڭگە بيۋدجەت قاراجاتى بولىنەدى.
جەكە ينۆەستورلاردى تارتۋ ەسەبىنەن تالعار اۋدانىنىڭ جاڭالىق اۋىلىندا 22 مىڭ تۇرعىن گازبەن قامتىلادى. سونداي-اق، 42 جوبالاۋ-سمەتالىق قۇجاتتامانى ازىرلەۋگە وبلىستىق بيۋجەتتەن 595 ميلليون تەڭگە ءبولىندى. ونىڭ ىشىندە، كەگەن جانە رايىمبەك اۋداندارىن گازداندىرۋ ءۇشىن «شەلەك-كەگەن-نارىنقول» ماگيسترالدىق گاز قۇبىرىن سالۋ بويىنشا جوبالاۋ-سمەتالىق قۇجاتتاما ازىرلەنىپ جاتىر. ناتيجەسىندە 47,4 مىڭ حالقى بار 23 ەلدى مەكەن گازعا قوسىلادى.
سونداي-اق قونايەۆ قالاسىن دامىتۋدىڭ 2024-2025-جىلدارعا ارنالعان كەشەندى جوسپارىنا سايكەس «جاڭا-ىلە»، «قونايەۆ-2» اگتس قۇرىلىسى بويىنشا كونكۋرستىق راسىمدەردى وتكىزۋگە جانە 10№، 9№، 20№، ارنا، سپۋتنيك، راۋان شاعىن اۋداندارىنا ينجەنەرلىك ينفراقۇرىلىمىنا ماگيسترالدىق گاز قۇبىرىن سالۋعا تەحنيكالىق قۇجاتتاما دايىندالىپ جاتىر.
بۇگىنگى تاڭدا «الماتى-بايسەركە-تالعار» م گ قۇبىر ىشىلىك دياگنوستيكاسى بويىنشا جۇمىستار جۇرگىزىلە باستادى، ءارى قاراي «Qazaq gaz» مەكەمەسىنە سەنىمگەرلىك باسقارۋعا بەرىلەدى.
ايتا كەتەيىن، جالپى كورسەتكىشتەردىڭ ورتاشا بولۋ سەبەبى، حالقى از ەلدى مەكەندەرگە كوگىلدىر وتىندى تاسىمالداۋ ەداۋىر قىمباتتاۋ بولادى. سەبەبى، تۇتىنۋشىلاردىڭ ازدىعى گاز تاسىمالداۋ شىعىندارىن تولىقتاي وتەي الماي جاتادى. الايدا، وسى ماسەلەلەردى شەشۋ بارىسىندا ارنايى كەڭەستەر وتكىزىپ، تالداپ-تالقىلاپ جاتىرمىز. الداعى ۋاقىتتا وڭ شەشەمىن تابادى دەپ سەنەمىز. قازىرگى ۋاقىتتا كوگىلدىر وتىن ەكى تۇردە بەرىلىپ جاتىر، بىرەۋى مەملەكەتتىك، ەكىنشىسى جەكەمەنشىك كاسىپورىندار ارقىلى.
- الماتى اگلومەراتسياسىنا كىرەتىن ساياجايلار ماسەلەسى كوپتەن بەرى شەشىمىن تاپپاي كەلە جاتىر...
- الماتى وبلىسىندا 674 ساياجاي بار. اتاپ ايتساق، قاراساي اۋدانىندا – 200، ىلەدە – 157، تالعاردا – 152، ەڭبەكشىقازاقتا – 135، جامبىل اۋدانىندا - 21 جانە قونايەۆ قالاسىندا 9 ساياجاي ورنالاسقان. قازىرگى تاڭدا 333 ساياجايدى جاقىن ماڭداعى ەلدى مەكەندەردىڭ شەكاراسىنا ەنگىزە وتىرىپ، باس جوسپاردى وزگەرتۋ جۇمىستارى اياقتالدى. ماسەلەن، ىلە اۋدانىندا 5 ەلدى مەكەننىڭ باس جوسپارىنا 109 ساياجاي، قاراساي اۋدانىندا 4 ەلدى مەكەننىڭ شەكاراسىنا 88 ساياجاي، تالعار اۋدانىندا 6 ەلدى مەكەننىڭ شەكاراسىنا 92 ساياجاي، ەڭبەكشىقازاق اۋدانىندا 2 ەلدى مەكەننىڭ شەكاراسىنا 44 ساياجاي ءماسسيۆى قوسىلادى.
ساياجايلاردىڭ قوسىلۋ جوسپارى 2023-جىلدان بەرى قارالىپ جاتىر. الدىمەن ولارعا ەلدى مەكەن مارتەبەسى بەرىلۋى كەرەك. قازىرگى تاڭدا تۇرعىندار سانىن ەسەپتەپ، بالا- باقشالار مەن مەكتەپتەر سانى باس جوسپارعا ەنگىزىلە باستادى. وسى ورايدا تىڭداۋلار وتكىزدىك. ۇسىنىستاردى ءماسليحات شەشىمىمەن بەكىتىپ جاتىرمىز.
ايتا كەتەيىن، بيىل 9- قاڭتاردا ىلە اۋدانى اشىبۇلاق اۋىلىنا قاراستى اقجول ساياجايىندا جاڭا مەكتەپ اشىلدى. ءبىلىم ورداسى مەملەكەتتىڭ جان باسىنا قارجىلاندىرۋ باعدارلاماسى اياسىندا سالىندى. مەكتەپ ساياجاي اۋماعىندا بولعاندىقتان، بىرنەشە ساياجايدان اۆتوبۋس تاسىمالى ۇيىمداستىرىلدى. بۇگىنگى تاڭدا 4 باعىتتا 9 اۆتوبۋس وقۋشىلاردى تاسىمالدايدى.
- مەملەكەت باسشىسى الماتى وبلىسىنىڭ كولىك جەلىسىن جاقسارتۋدى تاپسىرعان ەدى. بۇل باعىتتا قانداي جۇمىستار جاسالدى؟
- الماتى وبلىسىنىڭ مارشرۋتتىق جەلىسى 105 اۆتوبۋس قاتىناسىن قامتيدى، ونىڭ ىشىندە 3 وبلىسارالىق باعىت، 28 اۋدانارالىق باعىت، 37 اۋدان ىشىلىك (قالا ىشىلىك) باعىت، 37 قالا ماڭىنداعى باعىت. قازىرگى ۋاقىتتا وبلىس اۋماعىندا 7 اۆتوستانتسيا جۇمىس ىستەيدى. كولىك ينفراقۇرىلىمىن دامىتۋ جانە مارشرۋتتىق قاتىناستارىن دامىتۋ ماقساتىندا تالعار، ەڭبەكشىقازاق، بالقاش، ىلە، ۇيعىر، كەگەن، رايىمبەك اۋداندارىندا اۆتوستانتسيا ورنالاستىرۋ بويىنشا 8 ۇسىنىس قالىپتاستىرىلدى.
وتكەن جىلى وبلىس اكىمدىگى 12 جاڭا اۆتوبۋس باعىتىن ۇيىمداستىردى. جولاۋشىلاردى الماتى قالاسىنىڭ قالا ماڭىنداعى مارشرۋتتارىن قامتۋ ايماعىنا تاسىمالداۋ ءۇشىن ۇسىنىس جىبەرىلدى. سونداي- اق الماتى قالاسى اكىمدىگى 9 جاڭا قالا ماڭىنداعى مارشرۋت ۇيىمداستىردى. وسىلايشا، وتكەن جىلى وبلىستىڭ 49 ەلدى مەكەنىن قامتىعان 20 اۆتوبۋس باعىتى ىسكە قوسىلدى.
2023-جىلدىڭ قورىتىندىسى بويىنشا قونايەۆ قالاسىندا – 12، تالعار قالاسىندا – 4، قاراساي اۋدانىندا - 16 جىلجىمالى قۇرام جاڭارتىلدى.
- الماتى وبلىسىندا اۋىل اتاۋلارىن قازاقشالاۋ جۇمىسى قالاي ءجۇرىپ جاتىر؟
- مەملەكەتتىڭ، ونىڭ ىشىندە ۇلتتىڭ سيپاتى، ەڭ الدىمەن ونىڭ ءتىلى مەن ونوماستيكالىق اتاۋلارىنان كورىنىس تاباتىنى ءسوزسىز. راسىندا، جەر- سۋ اتاۋلارىنا ەرەكشە ءمان بەرۋدىڭ ماڭىزدىلىعى جوعارى. ەلدىڭ، حالىقتىڭ عاسىرلار بويى قالىپتاسقان بولمىسى، تانىمى، تاريحى ەلدى مەكەن اتاۋلارىندا جاتىر. ءبىزدىڭ وڭىردەگى ونوماستيكالىق نىساندارعا اتاۋ بەرۋ جانە ولاردى قايتا اتاۋ جۇمىستارى پرەزيدەنت اكىمشىلىگىنىڭ تاپسىرماسى نەگىزىندە جالپىعا ورتاق تاريحي سانانى قالىپتاستىرۋ ماقساتىندا بەكىتىلگەن «تاريحي تۇلعالار»، «جەر- سۋ اتاۋلارى» «ءداستۇرلى اتاۋلار» تىزىمدەرىنە سايكەس جۇرگىزىلىپ كەلەدى. بۇل رەتتە وبلىستا 60 اكىمشىلىك-اۋماقتىق بىرلىكتىڭ (اۋدان، اۋىلدىق وكرۋگ، اۋىل)، 3103 قۇرامداس بولىكتىڭ (كوشە، داڭعىل، ساياباق، ت. ب.)
بيىل الماتى وبلىسى بويىنشا يدەولوگيالىق تۇرعىدان ەسكىرگەن 425 كوشەنى، 7 اۋىلدىق وكرۋگ پەن 9 ەلدى مەكەننىڭ اتاۋىن وزگەرتۋ جوسپارلانىپ وتىر.
- اتوم ەلەكتر ستانتسياسىن سالۋعا الماتى وبلىسى جامبىل اۋدانى ۇلكەن اۋىلىنىڭ اۋماعى تاڭدالعانىن بىلەمىز. ءسىزدىڭ اەس سالۋعا كوزقاراسىڭىز قانداي، ونى سالۋ ەلىمىز ءۇشىن قانشالىقتى ءتيىمدى بولماق؟
- مەنىڭشە اەس سالۋ كەلەسى باعىتتاردىڭ دامۋىنا وڭ اسەرىن تيگىزەدى: ەلىمىزدىڭ عىلىمي- تەحنيكالىق جانە كادرلىق الەۋەتى، ەكونوميكا، جاڭا جۇمىس ورىندارى، ءبىلىم بەرۋ، جوبالاۋ، جوعارى تەحنولوگيالىق جانە عىلىمدى قاجەتسىنەتىن تەحنولوگيالار، ارالاس سالالار. بۇل جەردە 60 -جىلدان استام ۋاقىت بويى حالقىمىزدى سەنىمدى ەنەرگيامەن قامتۋ ماسەلەسى بار. اەس ورنالاسقان اۋداندا ينفراقۇرىلىم داميدى.
- كەلەسى سۇراق، نەلىكتەن جاڭادان قۇرىلعان الماتى وبلىسىنىڭ اكىمدىگى كازينو عيماراتىنا ورنالاسقان جانە قونايەۆتا ورنالاسقان كازينولار الداعى ۋاقىتتا جابىلا ما؟
- قونايەۆ قالاسىنداعى جىلجىمايتىن مۇلىك نارىعىن تالداپ، وبلىس ورتالىعىنىڭ قولدانىستاعى اكىمشىلىك عيماراتتارى يەلەرىنىڭ كوممەرتسيالىق ۇسىنىستارىن قاراستىرا وتىرىپ، شىعىنداردى مينيمالدى شىعىندارمەن قارجىلاندىرۋدىڭ ءارتۇرلى نۇسقاسى قاراستىرىلدى.
قازىرگى ۋاقىتتا وبلىستاعى ويىن ايماعىنىڭ ورنىن وزگەرتۋ ماسەلەسى كۇن تارتىبىندە جوق. سونىمەن قاتار، قونايەۆ قالاسىنداعى ويىن بيزنەسى - بيۋجەتكە نەگىزگى سالىق تولەۋشىلەردىڭ ءبىرى. جىل سايىن 80 ميلليارد تەڭگەدەن استام تۇسىرەدى. جەرگىلىكتى تۇرعىندار تۇراقتى جۇمىس ورىندارىمەن (3000 نان استام ادام) قامتىلىپ وتىر.
اۆتور دۋمان ارعىنگەلدى
