اۋلاسىندا اعاشى كوپ ادامدار جاقسىراق ۇيىقتايدى
استانا.قازاقپارات - قالانىڭ سىرتقى كەلبەتى مەن تۇرعىنداردىڭ ۇيقى ساپاسى اراسىندا بايلانىس بار ەكەنى انىقتالدى.
جاپونياداعى مەتروپوليتەن ۋنيۆەرسيتەتىنىڭ عالىمدارى جۇرگىزگەن زەرتتەۋ ناتيجەسىندە اعاشى كوپ ءارى قاۋىپسىز دەپ قابىلداناتىن اۋدانداردا تۇراتىن ادامداردىڭ ۇزاعىراق ۇيىقتايتىنى بەلگىلى بولدى، دەپ حابارلايدى turkystan.kz sciencedirect.com عا سىلتەمە جاساپ.
زەرتتەۋ بارىسىندا ماماندار Google Street View سەرۆيسىندەگى 200 مىڭنان استام پانورامالىق سۋرەتتى جاساندى ينتەللەكت كومەگىمەن تالداعان. كومپيۋتەرلىك كورۋ تەحنولوگياسى ءار كوشەدەگى اعاشتار، عيماراتتار، جولدار، تروتۋارلار، كولىكتەر، جاياۋ جۇرگىنشىلەر جانە باسقا دا قالالىق ينفراقۇرىلىم ەلەمەنتتەرىن اۆتوماتتى تۇردە انىقتاعان.
كەيىن بۇل مالىمەتتەر توكيودا كوپقاباتتى ۇيلەردىڭ تومەنگى قاباتتارىندا تۇراتىن 1089 جۇمىس ىستەيتىن تۇرعىننىڭ ۇيقى تۋرالى دەرەكتەرىمەن سالىستىرىلدى. زەرتتەۋشىلەر ءدال وسى تۇرعىندار كوشەنىڭ سىرتقى ورتاسىمەن كوبىرەك بايلانىستا بولادى دەپ ەسەپتەگەن.
زەرتتەۋ ناتيجەسى بويىنشا، كوشەلەردە جاسىل جەلەك پەن اعاشتار نەعۇرلىم كوپ بولسا، تۇرعىنداردىڭ ۇيقىسى سوعۇرلىم ۇزاق بولعان. سونداي-اق ءوز اۋدانىن قاۋىپسىز دەپ سانايتىن ادامداردىڭ دا جاقسىراق ۇيىقتايتىنى انىقتالعان. قىزىقتى تۇجىرىمداردىڭ ءبىرى - بيىك عيماراتتار قورشاعان كوشەلەردە تۇراتىن ادامدار اراسىندا ۇيقىسىزدىقتىڭ سيرەك كەزدەسۋى. عالىمداردىڭ پىكىرىنشە، مۇنداي ساۋلەتتىك ورتا ادامدارعا ءوزىن قاۋىپسىز ءارى جايلى سەزىنۋگە كومەكتەسۋى مۇمكىن.
ال ەڭ كۇتپەگەن ناتيجە جاياۋ جۇرگىنشى ينفراقۇرىلىمىنا قاتىستى بولدى. تروتۋارلارى مەن جاياۋ جۇرگىنشى ايماقتارى كوپ اۋدانداردا تۇراتىن ادامدار وزدەرىن قاۋىپسىزدەۋ سەزىنبەگەن ءارى ورتا ەسەپپەن از ۇيىقتاعان. زەرتتەۋشىلەر مۇنى مۇنداي كوشەلەردىڭ ادەتتە حالىق پەن كولىك قوزعالىسى تىعىز بولاتىندىعىمەن بايلانىستىرادى. سوندىقتان دامىعان ينفراقۇرىلىم ءاردايىم پسيحولوگيالىق جايلىلىقتى قامتاماسىز ەتە بەرمەيدى.
عالىمداردىڭ ايتۋىنشا، بۇل ءادىس بولاشاقتا قالالاردىڭ قاۋىپسىزدىگىن، شۋ دەڭگەيىن، كوشەلەردىڭ تارتىمدىلىعىن جانە تۇرعىندارعا قولايلىلىعىن اۆتوماتتى تۇردە باعالاۋعا مۇمكىندىك بەرەدى. مۇنداي دەرەكتەردى جاڭا تۇرعىن اۋداندارىن جوسپارلاۋ كەزىندە پايدالانۋ حالىقتىڭ دەنساۋلىعى مەن ءومىر ءسۇرۋ ساپاسىن جاقسارتۋعا كومەكتەسۋى مۇمكىن.
ەربۇلان قايرات
