الاكولدەگى دەلتاپلان اپاتى: ۇشقىشتىڭ كۋالىگى بولماعان

استانا. KAZINFORM - قازاقستاننىڭ اۆياتسيا اكىمشىلىگىنىڭ باسشىسى كاتالين رادۋ الاكولدە دەلتاپلان اپاتىنا قاتىستى تەرگەۋدىڭ قورىتىندىسىن جاريالادى.

ونىڭ ايتۋىنشا، كەيىنگى كەزدە شاعىن اۆياتسيا سالاسىندا كوپتەگەن سۇراق تۋىنداپ جاتىر. بۇل ماسەلەنى رەتتەيتىن زاڭنامانى سالا سۋبەكتىلەرى ورىنداماي وتىر.

كاتالين رادۋدىڭ سوزىنە قاراعاندا، دەلتاپلان يەسى ءوز ۇشاعىن ازاماتتىق اۋە كەمەلەرىنىڭ مەملەكەتتىك تىزىلىمىنە تىركەمەگەن. ۇشاقتا جارامدىلىق سەرتيفيكاتى بولماعان.

«سونىمەن بىرگە، ۇشقىشتىڭ ۇشاقتى باسقارۋعا قاتىستى ءتيىستى قۇزىرەتى بەلگىلەنبەگەن. اتاپ ايتقاندا، ونىڭ ۇشۋعا رۇقسات بەرەتىن جارامدى كۋالىگى بولماعان»، - دەدى ول كولىك مينيسترلىگىندە وتكەن باسپا ءسوز ءماسليحاتىندا.

اۆياتسيا اكىمشىلىگىنىڭ باسشىسى شاعىن اۆياتسيا سالاسىنداعى كەيىنگى وقيعالار نەگىزىندە جىل باسىنان باستالعان جوسپاردان تىس جانە جوسپارلى تەكسەرۋلەر اتقارىلىپ جاتقانىن اتاپ ءوتتى.

ەسكە سالساق، بيىل شىلدە ايىندا الاكولگە دەلتاپلان قۇلاپ، ەكى ادام اۋرۋحاناعا جەتكىزىلدى.