الاكول جاعالاۋىندا قىزىل قوڭىز قاپتاپ كەتتى

жәндік
Фото: Pixabay.com

سەمەي. KAZINFORM - اباي وبلىسىندا ماقانشى اۋدانىنداعى الاكول جاعالاۋىندا قىزىل قوڭىز قاپتاپ كەتتى.

سوڭعى كۇندەرى الەۋمەتتىك جەلىدە الاكولدىڭ اباي وبلىسىنداعى جاعالاۋىندا قىزىل قوڭىزداردىڭ قاپتاعانى جايلى ۆيدەو تارادى.

وسىعان وراي ماقانشى اۋدانىنىڭ اكىمدىگىنە حابارلاسىپ كورگەن ەدىك. اكىمدىك وكىلدەرى قىزىل قوڭىزدار قونعان جەرلەردى زالالسىزداندىرۋ جۇمىستارى جۇرگىزىلىپ جاتقاندىعىن ءمالىم ەتتى.

اۋدان اكىمى داۋرەن كويگەلدين باستاعان جۇمىس توبى سول جۇمىستاردى باقىلاۋعا العان.

«ماقانشى اۋدانىنىڭ تۇرعىندارى الاكول ايماعىندا جاندىك قاپتاعانى تۋرالى ۆيدەولار جىبەردى. سول جاققا فيتوسانيتاريا، سەس، ۆەتينسپەكتسيا ماماندارى باردى. ارنايى جۇمىس توبى دا قۇرىلعان»، - دەيدى اۋدان اكىمى.

ونىڭ ايتۋىنشا، «ديزەنفەكسيا مەديتسينالىق مەكەمەسى» ماماندارى ازىرگە 5 گەكتارعا جۋىق اۋماقتى «كاراتە»، «سيپەرمەترين»، «اگران» سياقتى پرەپاراتتارمەن ديزەنفەكتسيالادى. ناتيجەسىندە 20-25 مينۋت ىشىندە قوڭىزداردىڭ كوزى جويىلدى. اتالعان باعىتتاعى جۇمىستار اپتا سوڭىنا دەيىن جالعاسىپ، جالپى كولەمى 35 گەكتار اۋماق ديزەنفەكتسيالاناتىن بولادى.

سونىمەن قاتار سەس جانە ۆەتەريناريالىق ينسپەكتسيا ماماندارى اتالعان قوڭىز قاپتاۋى سالدارىنان مال قىرىلىپ جاتىر دەگەن اقپاراتتى جوققا شىعاردى. اۋىلداعى مالدان بيوماتەريالدار جانە سۋدان سىناما الىنىپ، زەرتحاناعا جىبەرىلمەك.

سوڭعى جاڭالىقتار