الداعى ءۇش كۇندە 15 گرادۋسقا دەيىن اياز بولادى
استانا. KAZINFORM - الداعى ءۇش كۇندە قازاقستاننىڭ كەي وڭىرلەرىندە كۇن كۇرت سۋىتادى. ورتالىق پەن شىعىستا تۇنگى اۋا تەمپەراتۋراسى 15- گرادۋسقا دەيىن، ال وڭتۇستىك-شىعىستىڭ تاۋلى ايماقتارىندا 16- گرادۋسقا دەيىن تومەندەۋى مۇمكىن.
ال باتىستا كۇندىز 17+ گرادۋسقا دەيىن جىلىنادى، دەپ حابارلايدى «قازگيدرومەت».
12-14-قاراشا ارالىعىندا قازاقستاننىڭ باسىم بولىگىندە قۇبىلمالى اۋا رايى ساقتالادى. جاڭبىر مەن قار جاۋىپ، كوكتايعاق بولۋى مۇمكىن. وڭتۇستىك-شىعىستىڭ تاۋلى ايماقتارىندا جاڭبىر مەن قار تۇرىندەگى مول جاۋىن-شاشىن بولجانادى.
ەلدىڭ شىعىسىندا جەل كۇشەيىپ، بۇرقاسىن بولادى. تۇندە جانە تاڭەرتەڭ كەي جەرلەردە تۇمان تۇسەدى.
كەي كۇندەرى باتىستا، سولتۇستىكتە جانە ورتالىقتا نەگىزىنەن جاۋىن-شاشىنسىز بولادى. 13-قاراشادان باستاپ وڭتۇستىك وڭىرلەردە دە جاۋىن-شاشىنسىز اۋا رايى ورنايدى.
بۇعان دەيىن سينوپتيكتەر قازاقستاندا 2026-جىلدىڭ قاراشا ايى كليماتتىق نورمادان جىلى بولادى دەپ بولجاعان. الايدا تۇراقتى جىلى اۋا رايىن كۇتۋدىڭ قاجەتى جوق. اي بويى جاڭبىر، قار، بوران جانە تەمپەراتۋرانىڭ كۇرت اۋىتقۋى بولجانادى.
قاراشا ايىنىڭ كەي كۇندەرى ەلدىڭ سولتۇستىگىندە، شىعىسىندا جانە ورتالىعىندا تۇنگى اياز 18-گرادۋسقا دەيىن جەتۋى مۇمكىن.
