«الا ءجىپتى اتتاماۋ» ۇعىمىن ساياساتتا دا بەرىك ۇستانۋ قاجەت - ەرلان قارين

استانا. KAZINFORM – ق ر مەملەكەتتىك كەڭەسشىسى ەرلان قارين «egemen Qazaqstan» گازەتىندە جاريالانعان ماقالاسىندا قوعامدا ساياسي ۇستانىمى ءارتۇرلى ازاماتتار، اتاپ ايتقاندا، ليبەرالدار، سوتسياليستەر، كونسەرۆاتورلار، وڭشىلدار، سولشىلدار جانە سەنتريستەر بار ەكەنىن اتاپ ءوتتى.

Ерлан Қарин
Фото: Фото: ortcom.kz

مەملەكەتتىك كەڭەسشىنىڭ ايتۋىنشا، ولار ءتۇرلى ساياسي يدەالعا جانە قۇندىلىقتارعا سەنەدى. وسى ورايدا ءبىز پىكىر الۋاندىعىن دامىتا وتىرىپ، ەڭ الدىمەن، جالپى ۇلتتىق مۇددەمىزدىڭ ءبىرتۇتاستىعىنا باسا ءمان بەرۋ قاجەت.

«بۇل تۇرعىدا ەل ىشىنە ىرىتكى سالاتىن ارەكەتتەرگە عانا ەمەس، جۇرتتى ارانداتىپ، داۋ-داماي تۋعىزۋى مۇمكىن كەز كەلگەن سوزگە اباي بولعان ءجون. وكىنىشكە قاراي، تىم شولاق ويلايتىن كەيبىر اسىرەبەلسەندىلەر، كەيدە ءتىپتى ءىس-ارەكەتى اقىلعا سىيمايتىن ادامدار كوپشىلىككە ءوزىنىڭ سىڭارجاق كوزقاراستارىن كۇشپەن تاڭىپ، جۇرتشىلىقتىڭ پىكىرىن ءوز ىڭعايىنا قاراي بۇرعىسى كەلەدى. قازاقتا «الا ءجىپتى اتتاماۋ» دەگەن ۇعىم بار. ءبىزدىڭ ساياساتتا دا مۇنى بەرىك ۇستانۋ كەرەك. ياعني ەلدىگىمىزگە، بىرلىگىمىزگە، ىنتىماعىمىزعا سىزات تۇسىرەتىن دۇنيەدەن الشاق بولعان ءجون. قوعامداعى پىكىرتالاس كەزىندە اتتاپ وتۋگە بولمايتىن شەك، ياعني «Redline» ناقتى بەلگىلەنۋگە ءتيىس. بۇل دەگەنىمىز - قانداي دا ءبىر تاقىرىپتى تالقىلاۋعا تىيىم سالۋ نەمەسە تسەنزۋرا جاساۋ ەمەس. بۇل - ساياسي پىكىرتالاس كەزىندە ۇستامدى بولىپ، سابىر ساقتاۋعا شاقىرۋ»، - دەدى ەرلان قارين.

سونداي- اق، ول مەملەكەت ەلدىڭ ىنتىماعىن بۇزىپ، شاڭىراعىن شايقالتقىسى كەلەتىن كەز كەلگەن ارەكەتكە زاڭ ارقىلى قاتاڭ توسقاۋىل قوياتىنىن اتاپ ءوتتى.

- «شەكتەن شىعۋعا جول جوق» دەگەن قاعيدا ءاردايىم باسشىلىققا الىنادى. ءبىز ءدىن بوستاندىعىن قولدايمىز، الايدا سوقىر سەنىم مەن ناداندىققا قارسىمىز. ءبىز وتانشىلدىقتى قولدايمىز، الايدا كسەنوفوبيا مەن اسىرەۇلتشىلدىققا قارسىمىز. ءبىز ليبەراليزمدى قولدايمىز، الايدا جۇگەنسىزدىك پەن نيگيليزمگە قارسىمىز. بارشا ادامدار، اسىرەسە قوعامدىق-ساياسي ومىرگە بەلسەنە اتسالىسىپ جۇرگەن ازاماتتار، ءوزىنىڭ ساياسي كوزقاراسى مەن ۇستانىمىنا قاراماستان، جالپى ۇلتتىق مۇددەنى، مەملەكەتتىلىكتى ساقتاۋ جانە نىعايتۋ ماسەلەسىن بارىنەن بيىك قويۋعا ءتيىس»، - دەدى ق ر مەملەكەتتىك كەڭەسشىسى.

سوڭعى جاڭالىقتار