الەم قازاقتارىن توعىستىرعان قۇرىلتايعا - 34 جىل
استانا. KAZINFORM - 1992 -جىلعى 29-قىركۇيەكتە الماتى قالاسىندا دۇنيەجۇزى قازاقتارىنىڭ تۇڭعىش قۇرىلتايى ءوز جۇمىسىن باستادى. تاريحي جيىنعا الەمنىڭ ءتۇرلى ەلدەرىنەن قازاق دياسپوراسىنىڭ وكىلدەرى قاتىسىپ، شەتەلدەگى قانداستاردىڭ وزەكتى ماسەلەلەرى تالقىلاندى.
العاشقى قۇرىلتايدىڭ باستى ماقساتى - دۇنيەجۇزىندە ءومىر ءسۇرىپ جاتقان قازاقتاردى تاريحي وتانى توڭىرەگىنە توپتاستىرۋ، ولاردىڭ اراسىنداعى رۋحاني-مادەني بايلانىستى نىعايتۋ، انا ءتىلى مەن ۇلتتىق سالت-ءداستۇردى ساقتاۋ بولدى.
قۇرىلتاي بارىسىندا شەتەلدەگى قازاقتاردىڭ الەۋمەتتىك جاعدايى، ۇلتتىق مادەنيەتتى دامىتۋ، انا ءتىلىن ساقتاۋ جانە تاريحي وتانىنا ورالۋ ماسەلەلەرىنە ەرەكشە نازار اۋدارىلدى.
وسىدان كەيىن دۇنيەجۇزى قازاقتارىنىڭ قۇرىلتايى بىرنەشە رەت ۇيىمداستىرىلدى. ەكىنشى قۇرىلتاي 2002 -جىلى تۇركىستان قالاسىندا، ءۇشىنشى قۇرىلتاي 2005 -جىلى استانادا، ءتورتىنشى قۇرىلتاي 2011 -جىلى استانادا ءوتتى.
ال بەسىنشى دۇنيەجۇزى قازاقتارىنىڭ قۇرىلتايى 2017 -جىلعى 22-25-ماۋسىم ارالىعىندا استانا قالاسىندا ۇيىمداستىرىلدى. ونىڭ نەگىزگى شارالارى «ەكسپو-2017» حالىقارالىق مامانداندىرىلعان كورمەسى اياسىندا وتكىزىلدى. قۇرىلتايدىڭ اشىلۋ سالتاناتى 23-ماۋسىمدا ءوتتى.
بەسىنشى قۇرىلتايعا الەمنىڭ ءبىرقاتار ەلدەرىنەن كەلگەن قازاق دياسپوراسىنىڭ وكىلدەرى قاتىستى. جيىن بارىسىندا شەتەلدەگى قانداستاردىڭ جاعدايى، تاريحي وتانىنا قونىس اۋدارۋ، ۇلتتىق مادەنيەت پەن ءتىلدى ساقتاۋ، سونداي-اق قازاقستان مەن شەتەلدەگى قازاقتار اراسىنداعى بايلانىستى ودان ءارى نىعايتۋ ماسەلەلەرى قارالدى.
- دۇنيەجۇزى قازاقتارىنىڭ قۇرىلتايى - الەمنىڭ ءار تۇكپىرىندە تۇراتىن قازاقتاردىڭ باسىن قوساتىن ماڭىزدى حالىقارالىق جيىن. ونىڭ نەگىزگى ءمانى - ۇلتتىق بىرلىكتى نىعايتۋ، تاريحي-مادەني قۇندىلىقتاردى ساقتاۋ جانە شەتەلدەگى قانداستارمەن بايلانىستى دامىتۋ. وكىنىشكە وراي سوڭعى جىلدارى قۇرىلتاي وتكىزۋدىڭ مۇمكىندىگى بولمادى. شارا الداعى ۋاقىتتا جالعاسىن تابادى دەپ ۇمىتتەنەمىز، - دەيدى دۇنيەجۇزى قازاقتارى قاۋىمداستىعى ءتوراعاسىنىڭ كەڭەسشىسى قارلىعاش بەكپاتشا قىزى.
ايتا كەتەيىك، ەكى مىڭنان استام قانداس مەملەكەتتىك ءبىلىم گرانتىن يەلەندى.
اۆتور
ريزابەك نۇسىپبەك ۇلى
