الەم ەلدەرى ج ي قاۋىپسىزدىگىنە دەن قويا باستادى
بىلتىر الەم بويىنشا جاساندى ينتەللەكت نارىعى 255 ميلليارد ا ق ش دوللارىنا جەتتى. ساراپشىلار الداعى 5 جىلدا كورسەتكىش تاعى 5 ەسەگە جۋىق ارتۋى مۇمكىن دەپ بولجاپ وتىر.
بۇل تۇستا جاساندى سانانىڭ مۇمكىندىگى مەن تاۋەكەلى قاتار ارتىپ كەلەدى. قولدانۋشى ادامعا باعىنباي، ءوز بەتىمەن ارەكەت ەتەتىن، ءتىپتى شابۋىلداپ، قۇپيا اقپارات ۇرلايتىن جاعدايلار دا جيىلەپ بارادى. ەندى بەس جىلدا جاساندى ينتەللەكت كۇللى ادامزات بالاسىنىڭ اقىل-ويىنان اسىپ ءتۇسۋى مۇمكىن. ادام ءۇشىن ەڭبەك ەتۋ قاجەتتىلىك ەمەس، حوببيگە اينالۋى ىقتيمال. مۇنداي بولجامدى امەريكاندىق كاسىپكەر يلون ماسك Economist باسىلىمىنا بەرگەن سۇحباتىندا ايتتى. كەيىنگى ۋاقىتتا تەحنولوگيا سالاسىنداعى الپاۋىت كومپانيالاردىڭ نەگىزىن قالاۋشىلار اراسىندا باسەكەلەستىكپەن قاتار الاڭداۋشىلىق تا ارتتى.
بيلل گەيتس، Microsoft كومپانياسىنىڭ نەگىزىن قالاۋشى:
- جاساندى ينتەللەكت ادامزاتتى 100 پايىز جويىپ جىبەرەدى دەپ ايتۋعا بولمايدى. ءبىراق، ميللياردتاعان ادام وسى اقىلدى ماشينانىڭ قۇربانى بولۋى مۇمكىن. ونىڭ الدىن الۋ ءۇشىن تەحنولوگيانى دۇرىس باسقارا ءبىلۋ كەرەك. ەگەر دە زۇلىم كۇشتەر جاساندى ينتەللەكتىنى ءوز پايداسىنا جاراتاتىن بولسا، بۇل ولار ءۇشىن قۋاتتى قارۋعا اينالادى.
نارىقتا، اسىرەسە ۆاشينگتون مەن بەيجىڭنىڭ باسەكەلەستىگى مىقتى. 2025- جىلى ا ق ش جاساندى ينتەللەكت سالاسىنا 285,9 ميلليارد ا ق ش دوللارى كولەمىندە قاراجات قۇيدى. بۇل قىتايداعى ينۆەستيتسيا كولەمىنەن 23 ەسە كوپ. دەسە دە، قىتاي جاساندى ساناعا نەگىزدەلگەن گۋمانويد روبوت جاساپ شىعارۋعا دەندەپ كىرىستى. قازىر ەلدە مۇنداي 140 تان استام كاسىپورىن بار. ال ا ق ش پرەزيدەنتى دونالد ترامپ «جاساندى ينتەللەكت سالاسىندا كىم مىقتى، سول جەڭىمپاز»، - دەيدى. اق ءۇي باسشىسى الداعى ۋاقىتتا ەكونوميكالىق ءوسىمنىڭ 25 پايىزى وسى سالا ەسەبىنەن جۇزەگە اسادى دەپ وتىر. بىرەر كۇن بۇرىن اق ۇيدە جيىن وتكىزىپ جاساندى سانانى باسقارۋ، جالپى قاۋىپسىز ەتۋ جولدارىن ءجىتى تالقىلادى. جيىن اياسىندا دونالد ترامپ Google, Anthropic, Meta, OpenAi، xAI جانە NVIDIA وكىلدەرى ءتيىستى قۇجاتقا قول قويدى.
دونالد ترامپ، ا ق ش پرەزيدەنتى:
- مەن جاساندى ينتەللەكتىنىڭ حالىق يگىلىگىنە قىزمەت ەتەتىنىنە سەنەمىن. ول تەرىس ماقساتتا قولدانىلعان جاعدايدا، كىنالىلەردى انىقتاۋ قيىن ەمەس. دەسە دە، ءار كومپانيا ءوز جۇمىسىن ءوزى باقىلاۋى ءتيىس. ەندى شامامەن ون ادامنان تۇراتىن كوميتەت قۇرىپ، ءجيى باس قوسىپ وتىرۋعا نيەتتىمىز. كوميتەت وزىق تەحنولوگيالارعا قاتىستى كەز كەلگەن جۇمىستى قاداعالايدى.
بۇعان دەيىن OpenAI كومپانياسى قازان ايىندا جاڭا GPT-6.1 Astra-نى تانىستىرۋى ءتيىس بولعان. كەيىن بۇكىل الەمگە الدىن الا جاريالاعان ۇلگىسىن شىعارۋدان باس تارتتى. ويتكەنى، سىناق كەزىندە اتالعان مودەلدىڭ كەي كەزدە قولدانۋشىعا باعىنباي، ءوز بەتىمەن ارەكەت ەتەتىنى انىقتالعان. سوندىقتان ول قاۋىپتى دەپ تانىلدى. ال سان- فرانتسيسكودا كومپانيانىڭ جىل سايىنعى كونفەرەنتسياسى قارساڭىندا نارازىلىق اكتسياسى ءوتتى. بەلسەندىلەر OpenAI دى پەنتاگونمەن كەلىسىمشارتتارىن توقتاتۋعا جانە ا ق ش-تىڭ كوشى-قون جانە كەدەندىك باقىلاۋ اگەنتتەرىنە تەحنولوگيانى پايدالانۋدى شەكتەۋگە قاتىستى شارا قابىلداۋعا شاقىردى. ال حالىق اراسىندا جاساندى ينتەللەكت ادام ورنىن باسا الا ما، ەڭبەك نارىعىندا نەندەي وزگەرىس اكەلۋى مۇمكىن دەگەن سۇراققا پىكىرلەر ءالى ەكىۇداي.
كريستوفەر دەفليچ، Penn State Health ديرەكتورى:
- اسىرەسە ءبىزدىڭ سالادا، مەديتسينادا اقپارات وتە كوپ. ادام ءۇشىن مۇنىڭ ءبارىن بىردەن ەستە ساقتاۋ قيىن. بۇل ارادا جاساندى ينتەللەكتىنىڭ كومەگى وراسان. ەڭ باستىسى، سوڭعى شەشىمدى ادام قابىلدايدى. ويتكەنى ادام باقىلاماسا، تەحنولوگيا ءبارىبىر قاتە ناتيجە بەرۋى مۇمكىن.
