الەم حالىقتارى كىمگە سەنىم ارتادى؟ ەڭ بەدەلدى 20 ماماندىق
استانا. KAZINFORM - حالىقارالىق زەرتتەۋ قوعامنىڭ ءتۇرلى كاسىپ يەلەرىنە دەگەن سەنىمى بىردەي ەمەس ەكەنىن كورسەتتى. كەي ماماندىق يەلەرى حالىق اراسىندا جوعارى قۇرمەتكە يە بولسا، ەندى بىرىنە سەنىم الدەقايدا تومەن.
ءبىر قىزىعى، ءبىر سالادا قىزمەت ەتەتىن مامانداردىڭ وزىنە دەگەن قوعامدىق كوزقاراس تا ايتارلىقتاي ەرەكشەلەنەدى.
Ipsos حالىقارالىق زەرتتەۋ كومپانياسى جۇرگىزگەن Global Trustworthiness Index 2026 ساۋالناماسىندا الەمدەگى ەڭ سەنىمدى جانە سەنىم از ارتىلاتىن ماماندىقتار انىقتالدى. زەرتتەۋگە 31 ەلدەن ينتەرنەتتى پايدالاناتىن 23537 ەرەسەك ادام قاتىسقان.
ەڭ سەنىمدى ماماندىقتار
زەرتتەۋ ناتيجەسى بويىنشا، حالىق سەنىمىنە ەڭ كوپ يە بولعاندار - دارىگەرلەر. ولاردىڭ سەنىم كورسەتكىشى 43 پايىز تارماقتى قۇرادى. ەكىنشى ورىنعا 42 كورسەتكىشپەن عالىمدار جايعاسسا، ۇزدىك ۇشتىكتى 37 كورسەتكىش جيناعان مۇعالىمدەر تۇيىندەدى.
Ipsos دەرەگىنشە، زەرتتەۋگە قاتىسقان 31 ەلدىڭ 27 سىندە دارىگەرلەر، عالىمدار مەن مۇعالىمدەر سەنىم رەيتينگىنىڭ العاشقى ءۇش ورنىن يەلەنگەن.
ءۇشىنشى جانە ءتورتىنشى ورىنداردىڭ اراسىندا ەداۋىر ايىرماشىلىق بار. اسكەريلەر 16 كورسەتكىشپەن ءتورتىنشى ورىنعا تۇراقتاسا، بۇل مۇعالىمدەرمەن سالىستىرعاندا 21 پايىز تارماققا تومەن.
جەكە جاتتىقتىرۋشىلارعا (10) جانە تەحنولوگيا سالاسىنداعى كاسىپكەرلەرگە (6) دە سەنىم ارتاتىندار باسىم. سۋديالار مەن پوليتسيا قىزمەتكەرلەرىنىڭ كورسەتكىشى بىردەي - 5. ال ادۆوكاتتارعا قاتىستى سەنىم مەن سەنىمسىزدىك دەڭگەيى تەڭ: ولاردىڭ تازا كورسەتكىشى نولگە تەڭ بولدى.
سەنىم از ارتىلاتىن ماماندىقتار
رەيتينگتىڭ ەڭ تومەنگى ساتىسىندا ساياساتكەرلەر تۇر. ولاردىڭ سەنىم كورسەتكىشى 48 پايىز تارماقتى قۇراعان. بۇل - زەرتتەۋگە ەنگەن ماماندىقتار اراسىندا ەڭ تومەن ناتيجە.
ودان كەيىن الەۋمەتتىك جەلى ينفليۋەنسەرلەرى (44) مەن ۇكىمەت مينيسترلەرى (37) ورنالاسقان.
ساۋالناما ساياساتكەرلەرگە دەگەن سەنىمسىزدىكتىڭ اۋقىمىن دا كورسەتەدى: رەسپوندەنتتەردىڭ 13 پايىزى عانا ولاردى سەنىمگە لايىق دەپ ساناسا، 61 پايىزى تەرىس پىكىر بىلدىرگەن.
سەنىمسىزدىك تەك ساياسات سالاسىمەن شەكتەلمەيدى. جارناما اگەنتتىكتەرى باسشىلارىنىڭ كورسەتكىشى 26 پايىز تارماق بولعان. جۋرناليستەر مەن بانكيرلەردىڭ كورسەتكىشى بىردەي - 10. ياعني بۇل ماماندىقتارعا سەنىم ارتاتىنداردان گورى سەنىمسىزدىك تانىتاتىندار كوبىرەك.
دارىگەرلەر مەن جۋرناليستەردىڭ كورسەتكىشتەرىن سالىستىرعاندا ايىرماشىلىق ايقىن: ەكى ماماندىق اراسىنداعى الشاقتىق 53 پايىز تارماقتى قۇرايدى.
ءبىر سالاداعى ماماندارعا سەنىم نەگە ءارتۇرلى؟
زەرتتەۋ ءبىر سالادا قىزمەت ەتەتىن ماماندارعا دەگەن كوزقاراستىڭ دا بىركەلكى ەمەستىگىن كورسەتتى. ماسەلەن، مەملەكەتتىك قىزمەتشىلەر مەن شەنەۋنىكتەردىڭ سەنىم كورسەتكىشى 9 بولسا، ۇكىمەت مينيسترلەرىنىكى 37 بولعان. اراداعى ۇلكەن ايىرماشىلىق ساۋالناماعا قاتىسۋشىلاردىڭ مەملەكەتتىك اپپاراتتىڭ كۇندەلىكتى جۇمىسىن ساياسي باسشىلىقتىڭ قىزمەتىنەن بولەك باعالايتىنىن اڭعارتادى.
بۇقارالىق اقپارات قۇرالدارى سالاسىندا دا وسىنداي ايىرماشىلىق بار. جاڭالىقتار جۇرگىزۋشىلەرىنىڭ كورسەتكىشى 3 بولسا، جۋرناليستەردىكى - 10. ال الەۋمەتتىك جەلى ينفليۋەنسەرلەرىنىڭ كورسەتكىشى 44 بولىپ، ەكى توپتان دا ايتارلىقتاي تومەن ناتيجە كورسەتكەن.
زەرتتەۋ ناتيجەلەرى قالاي ەسەپتەلگەن؟
ساۋالناما بارىسىندا قاتىسۋشىلاردان ءوز ەلىندەگى ءتۇرلى ماماندىق يەلەرى مەن الەۋمەتتىك توپتاردى قانشالىقتى سەنىمدى نەمەسە سەنىمسىز دەپ سانايتىنى سۇرالعان. زەرتتەۋدە قولدانىلعان «تازا سەنىم كورسەتكىشى» بەلگىلى ءبىر توپقا سەنەتىن رەسپوندەنتتەردىڭ ۇلەسىنەن وعان سەنبەيتىندەردىڭ ۇلەسىن شەگەرۋ ارقىلى ەسەپتەلەدى. مىسالى، 43 كورسەتكىشى دارىگەرلەرگە سەنەتىندەردىڭ ۇلەسى سەنبەيتىندەردەن 43 پايىز تارماققا جوعارى ەكەنىن بىلدىرەدى. بۇل دارىگەرلەرگە ساۋالناماعا قاتىسقانداردىڭ 43 پايىزى سەنەدى دەگەن ءسوز ەمەس.
زەرتتەۋ ناتيجەلەرى قوعام سەنىمىنىڭ ماماندىققا عانا ەمەس، سول كاسىپتىڭ اتقاراتىن رولىنە دە بايلانىستى ەكەنىن اڭعارتادى. دارىگەرلەر، عالىمدار مەن مۇعالىمدەرگە دەگەن سەنىم جوعارى بولسا، ساياساتكەرلەر مەن الەۋمەتتىك جەلىدەگى ينفليۋەنسەرلەرگە قاتىستى كۇمان باسىم.
