پاكىستاندىق ستۋدەنت ۆاتساپتاعى حابارلاماسى ءۇشىن ءولىم جازاسىنا كەسىلدى

استانا. KAZINFORM - پاكىستان سوتى WhatsApp حابارلامالارى ارقىلى قۇدايعا ءتىل تيگىزدى دەگەن ايىپپەن 22 جاستاعى ستۋدەنتتى ءولىم جازاسىنا كەستى، دەپ حابارلايدى BBC.

پەندجاب پروۆينسياسى سوتىنىڭ مالىمدەۋىنشە، ايىپتالۋشى فوتوسۋرەتتەر مەن بەينەلەردى مۇسىلمانداردىڭ ءدىني سەنىمىنە نۇقسان كەلتىرۋ ماقساتىندا تاراتقان.

ءدال وسى ءىس بويىنشا 17 جاستاعى جاس ءوسپىرىم ءومىر بويىنا باس بوستاندىعىنان ايىرىلدى. ايىپ تاعىلعان ەكى ازامات كىناسىن مويىنداعان جوق.

پاكىستاندا قۇدايعا ءتىل تيگىزگەندەر ءولىم جازاسىنا كەسىلەدى. كەيبىر كۇدىكتىلەر ىستەرى سوتقا دەيىن جەتپەي جازالاندى.

شاعىمدى 2022 -جىلى پاكىستاننىڭ فەدەرالدىق تەرگەۋ اگەنتتىگىنىڭ (FIA) پەندجاب پروۆينتسياسىنىڭ استاناسى لاحور قالاسىنداعى كيبەرقىلمىس ءبولىمى ءتۇسىردى.

سوت شەشىمىندە ايتىلعانداي، 22 جاستاعى جىگىت مۇحاممەد پايعامبار مەن ونىڭ ايەلدەرىنە ءتىل تيگىزەتىن فوتولار مەن ۆيدەولار تۇسىرگەنى ءۇشىن ءولىم جازاسىنا كەسىلدى.

ەكىنشى ايىپتالۋشى ماتەريال تاراتقانى ءۇشىن ءومىر بويىنا باس بوستاندىعىنان ايىرىلدى.

شاعىمدانۋشى وعان ءۇش ءتۇرلى ۇيالى تەلەفون نومىرىنەن بەينە جانە فوتوسۋرەتتەر تۇسكەنىن ايتتى.

FIA قىزمەتكەرلەرىنىڭ مالىمدەۋىنشە، ولار شاعىمدانۋشىنىڭ تەلەفونىن تەكسەرىپ، وعان «ادەپسىز ماتەريال» جىبەرىلگەنىن انىقتادى.

جاستاردىڭ ادۆوكاتتارى ولاردىڭ «تۇزاققا ءتۇسىپ قالعانىن» ايتتى.

ءولىم جازاسىنا كەسىلگەن سوتتالۋشىنىڭ اتى-ءجونى جاريالانباعان، اكەسى BBC-گە لاحوردىڭ جوعارعى سوتىنا شاعىمداناتىنىن ايتتى.

قۇدايعا ءتىل تيگىزۋگە قارسى زاڭداردى العاش رەت ءۇندىستاننىڭ بريتان بيلەۋشىلەرى بەكىتىپ، 1980 -جىلدارى پاكىستاننىڭ اسكەري ۇكىمەتى تۇسىندا كەڭەيتىلدى.

وتكەن جىلدىڭ تامىزىندا ەكى حريستيان قۇراندى قورلادى دەپ ايىپتالعاننان كەيىن ەلدىڭ شىعىسىنداعى دجارانۆالا قالاسىندا ونداعان شىركەۋ مەن ءۇي ورتەندى.

اۆتور
زارينا تۋعانبايەۆا