پاكىستاندىق حاكەرلەر قىرعىزستاندىقتاردىڭ جەكە دەرەكتەرىن جاريالادى
استانا. قازاقپارات - 22 - مامىردا «Team Insane Pakistan» حاكەرلىك توبى 18 مامىردا بىشكەكتە شەتەلدىك ستۋدەنتتەردىڭ قاتىسۋىمەن بولعان تۇنگى تارتىپسىزدىكتەرگە جاۋاپ رەتىندە 600 مىڭنان استام قىرعىزستاندىقتىڭ دەربەس دەرەكتەرىن جاريالاعانى تۋرالى قىرعىزستاننىڭ الەۋمەتتىك جەلىلەرى مەن ب ا ق- تا اقپارات تاراپ جاتىر.

قىرعىزستاننىڭ دەربەس دەرەكتەردى قورعاۋ جونىندەگى مەملەكەتتىك اگەنتتىگى 600 مىڭنان استام قىرعىزستاندىق سالىق تولەۋشىنىڭ مالىمەتتەرى 2020 -جىلى جاريالانعان اشىق، قولجەتىمدى دەرەكتەر ەكەنىن جانە دەرەكتەردىڭ سالىق قۇپياسىنا جاتپايتىندىعىن حابارلاپ وتىر. وسىلايشا اگەنتتىك سوڭعى ۋاقىتتا مەملەكەتتىك سايتتاردان ەشقانداي اقپاراتتىڭ شىقپاعانىن ءمالىم ەتتى.
«قىرعىزستان ازاماتتارىنىڭ جاريالانعان 600 مىڭ دەربەس جازبالارىن تالداۋ ولاردىڭ 2020 -جىلى مەملەكەتتىك سالىق قىزمەتىنىڭ سەرۆيستەرىنەن تاراتىلىپ كەتۋ ناتيجەسىندە جاريالانعان دەرەكتەرگە ۇقساس ەكەنىن كورسەتتى»، - دەپ جاۋاپ بەردى مەملەكەتتىك ورگان.
سونداي- اق، قىرعىز رەسپۋبليكاسىنىڭ تسيفرلىق دامۋ مينيسترلىگى ەلدىڭ مەملەكەتتىك ورگاندارىنىڭ ينفراقۇرىلىمىنا جاسالعان حاكەرلىك شابۋىلدار جانە ازاماتتاردىڭ جەكە دەرەكتەرىن ۇرلاۋ تۋرالى تاراتىلعان اقپاراتتىڭ جاي-كۇيىنە تۇسىنىكتەمە بەردى.
«ۆەدومستۆو تۇراقتى نەگىزدە اقپاراتتىق اكتيۆتەردى ءالسىز تۇستار مەن رۇقساتسىز قولجەتكىزۋ فاكتىلەرىن انىقتاۋ تۇرعىسىنان سكانەرلەۋ بويىنشا جۇيەلى جۇمىس جۇرگىزۋدە. ءقازىر مينيسترلىكتىڭ قاراماعىنداعى مەملەكەتتىك اقپاراتتىق جۇيەلەر شتاتتىق رەجيمدە جۇمىس ىستەپ تۇر. مينيسترلىك قىزمەتكەرلەرى مەملەكەتتىك ۇلتتىق قاۋىپسىزدىك كوميتەتىنىڭ كيبەرقاۋىپسىزدىكتى ۇيلەستىرۋ ورتالىعىمەن، دەربەس دەرەكتەردى قورعاۋ جونىندەگى مەملەكەتتىك اگەنتتىكپەن بايلانىستا جانە جاريالانعان دەربەس اقپارات ماسسيۆىنە زەرتتەۋ جۇرگىزەدى»، - دەلىنگەن حابارلامادا.