پاكىستاندا سۇنيتتەر مەن شەيىتتەر قاقتىعىسىپ، 33 ادام مەرت بولدى
استانا. KAZINFORM - پاكىستاندا سۇنيتتەر مەن شەيىتتەر اراسىندا قاقتىعىس باستالدى. بۇل جايىندا Times of India جازدى.
باسىلىمنىڭ مالىمەتىنشە، حايبەر- پاحتۋنحۆا ولكەسىنە قاراستى كۋررام اۋدانىندا ورىن العان قاقتىعىس سالدارىنان 33 ادام مەرت بولىپ، ونداعان ادام جارالانعان. ءسۇنيت پەن ءشيىت توپتارىنىڭ قارۋلى سودىرلارى ءبىر-بىرىمەن اتىسىپ، ۇيلەردى، دۇكەندەر مەن دۇڭگىرشەكتەردى ورتەپ جاتىر.
وسىدان بىرنەشە كۇن بۇرىن ءشيىت مۇسىلماندارى مىنگەن كولىك كولوناسىنا بەلگىسىز بىرەۋلەر وق جاۋدىرىپ، 42 ادامدى جەر جاستاندىرعان بولاتىن. ال ءدىنارالىق قاندى قاقتىعىستىڭ ورىن الۋىنا ءسۇنيت پەن ءشيىت جاماعاتى اراسىندا شىلدەدە باستالعان جەر داۋى تۇرتكى بولىپ وتىر.
ەسكە سالساق، 9-قاراشادا پاكىستاننىڭ بەلۋدجيستان پروۆينتسياسىندا ورنالاسقان كۆەتتا قالاسىنداعى تەمىرجول ۆوكزالىنىڭ جانىندا جارىلىس بولدى. سالدارىنان 25 ادام قايتىس بولدى، تاعى 62 ادام زارداپ شەكتى.
