پاكىستاندا نارازى توپ پەن پوليتسيا اراسىندا قاقتىعىس بولىپ، 6 ادام قازا تاپتى

يسلاماباد. KAZINFORM - پاكىستاننىڭ بۇرىنعى پرەمەر-ءمينيسترى يمران حاننىڭ تۇرمەدەن بوساتىلۋىن تالاپ ەتكەن جاقتاستارى پوليتسيامەن قاقتىعىسىپ، يسلاماباد ورتالىعىنا بيلىك ورناتقان قورشاۋلاردى بۇزىپ ءوتتى. ەكى تاراپتا كەم دەگەندە التى ادام قازا تاپتى، دەپ جازادى BBC.

پوليتسيا مەن ساربازدار كوپ ۇزاماي نارازىلىق بىلدىرۋشىلەردى تاراتىپ ۇلگەرگەن.

- يسلامابادتاعى شيەلەنىس ءتۇن بولعاندا قايتا جاندانۋدا، پتي جاقتاستارى كورشى اۋدانداردا قايتا توپتاسىپ جاتىر، ازىرشە قاقتىعىستاردان اۋلاق تۇرعان سياقتى، - دەپ حابارلايدى BBC.

پ ت ي - يمران حاننىڭ پارتياسى، پاكىستانداعى ادىلدىك ءۇشىن قوزعالىس (پاكيستان تەحريك-ي-ينساف).

پاكىستان پرەمەر-ءمينيسترى شاحباز شاريف شەرۋشىلەر ءوز كولىكتەرىمەن ءتورت ساربازدى باسىپ ولتىرگەنىن ايتتى.

پ ت ي وكىلى زۋلفيكار بۋحاريدىڭ ايتۋىنشا، نارازىلىق بىلدىرۋشىلەر تاراپىنان ەكى ادام قازا تاۋىپ، 30 ادام جارالانعان. قازا تاپقانداردىڭ بىرىنە وق تيگەن، ەكىنشىسىن كولىك باسىپ قالعان.
تاراپتاردىڭ بۇل مالىمدەمەلەرىن تەكسەرۋ ءالى قيىن.

يمران حاننىڭ مىڭداعان جاقتاستارى يسلامابادقا جينالىپ، وتكەن جىلى جەمقورلىققا قاتىسى بار دەگەن ايىپپەن تۇرمەگە جابىلعان 72 جاستاعى بۇرىنعى پرەمەر-ءمينيستردى بوساتۋدى تالاپ ەتتى.

شەرۋشىلەر يسلامابادتىڭ ورتالىق الاڭىنا جينالعىسى كەلدى، ءبىراق بيلىك نەگىزگى كوشەلەر مەن جولداردى تەڭىز جۇك كونتەينەرلەرىنەن جاسالعان توسقاۋىلدارمەن جاۋىپ، ەلورداعا ەلدىڭ تۇكپىر-تۇكپىرىنەن اسكەريلەر مەن پوليتسيانى اكەلگەن.

شەرۋشىلەر مەن پوليتسيا اراسىندا قاقتىعىس بولىپ، نارازىلىق بىلدىرۋشىلەرگە قارسى كوزدەن جاس اعىزاتىن گاز بەن رەزەڭكە وقتار قولدانىلعان.

اۆتور
جاراسقان نۇرىبايەۆ