پاكىستاندا جانكەشتى ۇيىمداستىرعان جارىلىستان 50 ادام قازا تاپتى

پاكىستاندا جانكەشتى لاڭكەستىڭ شابۋىلىنان 50 ادام مەرت بولىپ، ونداعان تۇرعىن زارداپ شەكتى. قازاقپارات بۇل تۋرالى BBC News باسىلىمىنا سىلتەمە جاساپ حابارلايدى.

Фото: cnn.com
Фото: из открытых источников

جارىلىس جۇما كۇنى وڭتۇستىك-باتىستاعى بەلۋدجيستان پروۆينتسياسىنداعى مەشىت ماڭىندا، ادامدار مۇحاممەد پايعامباردىڭ تۋعان كۇنىن تويلاۋعا شىققان كەزدە بولعان.

بەلۋدجيستان بيلىگى توتەنشە جاعداي جاريالادى. ەشبىر توپ شابۋىلدى ءوز موينىنا العان جوق.

سول ارالىقتا حايبەر-پاحتۋنحۆا پروۆينتسياسىنداعى پەشاۆار قالاسىنا جاقىن جەردەگى مەشىتتە تاعى ءبىر جارىلىس بولدى.

پەشاۆارعا جاقىن ماڭداعى حانگۋ مەشىتىندە بولعان جارىلىستان قۇربان بولعاندار سانى ازىرگە بەلگىسىز. ءبىراق پوليتسيانىڭ حابارلاۋىنشا، بىرنەشە ادام شاتىر قۇلاعاننان كەيىن ءۇيىندى استىندا قالعان بولۋى مۇمكىن.

ماستۋنگ قالاسىنداعى وقيعا ورنىنان تۇسىرىلگەن كادرلاردان قۇتقارۋشىلار مەن جەرگىلىكتى تۇرعىنداردىڭ جارالانعان ادامداردى قالاي قۇتقارىپ جاتقانىن كورۋگە بولادى.

بەلۋدجيستان پوليتسياسىنىڭ باسشىسى ابدۋل حاليك شەيح جارىلىس جانكەشتى لاڭكەستىڭ شابۋىلى سالدارىنان بولعانىن راستادى. ول شابۋىلداۋشىنى توقتاتپاق بولعان كەزدە پوليتسيا اعا وفيتسەرى مەرت بولعانىن مالىمدەدى.

اۋعانستان جانە يرانمەن شەكتەسەتىن بەلۋدجيستان پاكىستاننىڭ ءىرى پروۆينتسياسى سانالادى. سونىمەن قاتار قالاعا «تەحريك-ي تاليبان پاكىستان» (ت ت پ) نەمەسە پاكىستاندىق تاليبان، سونداي-اق «يسلام مەملەكەتى» توپتارى سىندى قارۋلى ساربازدار جيى شابۋىل جاسايدى.

دەگەنمەن ت ت پ جۇماداعى جارىلىسقا قاتىسى جوق ەكەنىن مالىمدەپ، مۇنداي شابۋىل ولاردىڭ ساياساتىنا قايشى ەكەنىن ايتتى.

بۇعان دەيىن وسى ايدا سول اۋداندا بولعان جارىلىستان ون ءبىر ادام، ونىڭ ىشىندە تانىمال مۇسىلمان كوشباسشىسى جاراقات العان بولاتىن.

شىلدەدە حايبەر-پاحتۋنحۆا پروۆينتسياسىنىڭ سولتۇستىك-باتىسىندا ءدىني ساياسي پارتيانىڭ جينالىسىندا جانكەشتى لاڭكەس جارىلىس ۇيىمداستىرىپ، 40 تان استام ادام مەرت بولدى.

سوڭعى جاڭالىقتار