پاكىستان قورعانىس ءمينيسترى: ەكى ەل اراسىنداعى شيەلەنىستىڭ ءورشۋى يادرولىق سوعىسقا اكەلۋى مۇمكىن
استانا. KAZINFORM — حاۆادجا مۇحامماد اسيف نيۋ-دەلي ۇكىمەتى پاكىستاندى يادرولىق سوعىسقا يتەرمەلەيتىن بولسا، وندا ءۇندىستان زارداپ شەگەتىنىن ەسكەرتتى، دەپ جازدى انادولى اگەنتتىگى.
پاكىستاننىڭ قورعانىس ءمينيسترى حاۆادجا مۇحامماد اسيف ءۇندىستان مەن پاكىستان اراسىنداعى شيەلەنىستىڭ ارتۋى يادرولىق سوعىس قاۋپىن تۋدىرىپ وتىرعانىن مالىمدەدى.
Geo News تەلەارناسىنا بەرگەن سۇحباتىندا اسيف 26 ادامنىڭ ءومىرىن جالماعان تەراكتىدەن كەيىن ۇندىستانمەن قارىم-قاتىناستاعى شيەلەنىس تۋرالى پىكىر ءبىلدىردى.
ەكى ەل اراسىندا يادرولىق سوعىس قاۋپىنىڭ بار ەكەنىن اتاپ وتكەن اسيف:
«ەگەر ولار (ءۇندىستان) وڭىردە اۋقىمدى سوعىس باستاپ، قاۋىپ تونەتىن بولسا، وندا يادرولىق سوعىس كەز كەلگەن ساتتە باستالىپ كەتۋى مۇمكىن»، - دەدى.
سونداي-اق اسيف نيۋ- دەلي ۇكىمەتى پاكىستاندى يادرولىق سوعىسقا يتەرمەلەسە، ءۇندىستانعا وڭاي بولمايتىنىن ەسكەرتتى.
6-مامىردا ءۇندىستان 22 -ساۋىردە پاحالگام ايماعىندا بولعان تەراكتىنىڭ قارىمتاسى رەتىندە پاكىستان مەن ونىڭ باقىلاۋىنداعى ازاد كاشمير اۋماعىنا زىمىران سوققىلارىن جاسادى. اتالعان تەراكت كەزىندە 26 ادام قازا تاپقان بولاتىن.
ءۇندى ارمياسى «تەرروريستىك قۇرىلىمدار» دەپ سيپاتتالعان 9 نىساناعا سوققى بەرىلگەنىن حابارلادى. ال يسلاماباد اكىمشىلىگى شابۋىلدان بەيبىت تۇرعىندارعا تيەسىلى 6 نىسان زارداپ شەككەنىن جانە سونىڭ سالدارىنان 26 ادامنىڭ كوز جۇمعانىن مالىمدەدى.
ەكى تاراپتا دا قازا تاپقاندار سانى ارتا ءتۇستى.
پاكىستان اسكەريلەرى ءۇندىستانعا تيەسىلى 5 جويعىش ۇشاقتى اتىپ تۇسىرگەنىن حابارلاسا، نيۋ-دەلي بۇل مالىمەتتى راستامادى.
ءۇندىستان پرەمەر- ءمينيسترى نارەندرا مودي مينيسترلەر كابينەتىنىڭ وتىرىسىندا بۇل اسكەري شابۋىلداردى «سيندۋر وپەراتسياسى» دەپ اتاپ، ونى «ماقتانىش ءساتى» دەپ باعالادى. حيندي تىلىندەگى «سيندۋر» ءسوزى يندۋ ءدىنىن ۇستاناتىن تۇرمىستاعى ايەلدەردىڭ ماڭدايىنا جاعاتىن قىزىل ۇنتاقتى بىلدىرەدى.
