پاكىستان ءۇندىستانعا قارسى اۋقىمدى اسكەري وپەراتسيا باستالعانىن جاريالادى – ب ا ق
پاكىستان «بانيان-ۋل-مارسۋس» («بەرىك قامال») اتتى كەڭ اۋقىمدى اسكەري وپەراتسيانى باستاعانىن حابارلادى. بۇل تۋرالى Geo TV تەلەارناسى قاۋىپسىزدىك ورگاندارىنداعى دەرەككوزدەرگە سىلتەمە جاساپ مالىمدەدى، دەپ جازدى BBC اگەنتتىگى.
كەيىنىرەك وپەراتسيانىڭ باستالعانى تۋرالى اقپارات پاكىستان ۇكىمەتىنىڭ X (بۇرىنعى Twitter) جەلىسىندەگى رەسمي پاراقشاسىندا دا جاريالاندى.
ب ا ق دەرەككوزدەرىنە سۇيەنسەك، بۇل وپەراتسيا اياسىندا پاكىستان ارمياسى ءۇندىستان اۋماعىنداعى بىرنەشە ستراتەگيالىق نىسانالاردى كوزدەۋدە. حابارلامادا ءۇندى-رەسەيلىك بىرلەسكەن كاسىپورىن وندىرگەن BrahMos اتتى اسا جىلدام زىمىراندارعا ارنالعان قويمانىڭ جويىلعانى ايتىلعان.
سونداي-اق، دەرەككوزدەرگە سايكەس، پاكىستان ءۇندىستاننىڭ ۋدحامپۋر جانە پاتحانكوت اۋە بازالارىنا، ارميالىق بريگادا شتابىنا جانە ءىرى اسكەري قويماعا سوققى جاساعان.
بۇعان بىرنەشە ساعات بۇرىن پاكىستان ارمياسى ءۇندىستان تاراپىنان ءوز اۋە بازالارىنا زىمىران شابۋىلى جاسالعانىن مالىمدەپ، قارسى شارالار قولداناتىنىن ەسكەرتكەن بولاتىن. سول بازالاردىڭ ءبىرى - نۋر حان - استانا يسلامابادتان 10 شاقىرىم جەردەگى راۆالپيندي قالاسىندا ورنالاسقان. وسىدان كەيىن ەل اۋماعىنداعى اۋە كەڭىستىگى 10-مامىر كۇندىزگى ساعات 12:00 گە دەيىن جابىلعان.
ءۇندىستاندىق اقپارات قۇرالدارى، سونىڭ ىشىندە Times of India گازەتى، Geo TV حابارلاعان شابۋىلدار تۋرالى ءالى رەسمي اقپارات جاريالاعان جوق. سونداي-اق ءۇندى بيلىگى پاكىستان اۋە بازالارىنا جاسالعان شابۋىلدارعا قاتىستى بۇرىنعى حابارلامالارعا تۇسىنىكتەمە بەرمەگەن.
ەسكە سالا كەتەيىك، بۇعان دەيىن ءۇندىستان پاكىستانعا سوققى جاساعانىن جازعان ەدىك.
ءۇندىستان مەن پاكىستان سوققىلارىن كۇشەيتە ءتۇستى، نتيجەسىندە ەكى تاراپتا دا قازا تاپقاندار سانى ارتتى.
ارتىنشا ءۇندىستاننىڭ پاكىستانعا جاساعان اۋە شابۋىلىنان قازا تاپقاندار سانى 31 ادامعا جەتتى.
پاكىستان قورعانىس مينيسترلىگى ەكى ەل اراسىنداعى شيەلەنىستىڭ ءورشۋى يادرولىق سوعىسقا اكەلۋى مۇمكىن ەكەنىن ەسكەرتتى.
ق ر سىرتقى ىستەر مينيسترلىگى ءۇندىستان رەسپۋبليكاسى مەن پاكىستان يسلام رەسپۋبليكاسى اراسىنداعى جاعدايدىڭ شيەلەنىسۋىنە بايلانىستى تەرەڭ الاڭداۋشىلىق ءبىلدىردى.
