اكىمنەن تاياق جەدىم: الماتى وبلىسىندا اۋىل اكىمىنە قاتىستى قىزمەتتىك تەرگەۋ باستالدى
قونايەۆ. KAZINFORM - اۋىل تۇرعىنىنا قارسى كۇش قولدانىپ، مەملەكەتتىك قىزمەتشىنىڭ ادەپ كودەكسىن بۇزدى دەپ ايىپتالعان الماتى وبلىسى تالعار اۋدانى تۇزدىباستاۋ اۋىلدىق وكرۋگى اكىمىنە قاتىستى قىزمەتتىك تەرگەۋ باستالدى.
بۇل تۋرالى اقپارات الەۋمەتتىك جەلىدە تارادى.
ءوڭىر اكىمدىگى جاعدايعا قاتىستى تۇسىنىك بەردى.
«تۇرعىنداردىڭ ءبىرى بەكىتىلگەن اۋىلدىق وكرۋگتىڭ باس جوسپارىنا قاتىستى نارازىلىعىن بىلدىرگەن. ونىڭ جەر ۋچاسكەسى قىزىل سىزىقپەن وتەتىنى بەلگىلى بولعان. وسىعان بايلانىستى تۇرعىن مەن اۋىلدىق وكرۋگ اكىمىنىڭ اراسىندا جانجال شىققان. قازىر تۇزدىباستاۋ اۋىلدىق وكرۋگىنىڭ اكىمىنە قاتىستى تالعار اۋدانىنىڭ اكىمدىگى مەن تالعار اۋدانىنىڭ پوليتسيا باسقارماسى تاراپىنان قىزمەتتىك تەرگەۋ جۇرگىزۋدە. اكىمنىڭ كىناسى راستالعان جاعدايدا ونىڭ جاۋاپكەرشىلىگى قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ الماتى وبلىسىنداعى ادەپ جونىندەگى كەڭەسىندە قارالادى»، - دەپ حابارلادى وبلىستىق اكىمدىكتەن.
سونىمەن قاتار، ءتۇسىندىرۋ جۇمىستارىن جۇرگىزۋ ماقساتىندا جوعارىدا اتالعان تۇرعىن 23-شىلدەدە اۋدان اكىمى اپپاراتىنىڭ باسشىسىنا قابىلداۋىنا بارادى.
«تۇزدىباستاۋ اۋىلدىق وكرۋگىنىڭ اكىمدىگى تۇرعىنداردىڭ پروبلەمالىق ماسەلەلەرىن شەشۋ بويىنشا جۇمىستى ءارى قاراي جالعاستىرىپ جاتىر. بارلىق مەملەكەتتىك قىزمەتشىلەردى قازاقستان رەسپۋبليكاسى مەملەكەتتىك قىزمەتشىلەرىنىڭ ادەپ كودەكسىنىڭ تالاپتارىن ورىنداۋعا شاقىرامىز»، - دەپ اتاپ ءوتتى اكمىدىكتەن.!
اۆتور
الما مۇقانوۆا
