اكىمدىكتەر جانىنان عىلىم مەن بيزنەستى ىقپالداستىراتىن كەڭەستەر قۇرۋ كەرەك - ۇلتتىق كەڭەس

استانا. KAZINFORM - ۇلتتىق ەكونوميكانى يندۋستريالاندىرۋ ءۇشىن قابىلدانىپ جاتقان شارالارعا قاراماستان، ونىڭ شيكىزاتتىق سيپاتى اسا وزگەرە قويعان جوق.

بۇل تۋرالى اقوردادا ءوتىپ جاتقان عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا مەملەكەت باسشىسى قاسىم-جومارت توقايەۆ ايتتى.

مەملەكەت باسشىسى عىلىم ەكونوميكانىڭ قارقىندى دامۋىنا سەپتىگىن تيگىزۋگە ءتيىس ەكەنىن اتاپ ءوتتى.

«ۇلتتىق ەكونوميكانى يندۋستريالاندىرۋ ءۇشىن قابىلدانىپ جاتقان شارالارعا قاراماستان، ونىڭ شيكىزاتتىق سيپاتى اسا وزگەرە قويعان جوق. ۇكىمەتكە ەكونوميكانىڭ جاڭا مودەلىن قۇرۋ مىندەتى جۇكتەلدى. قوسىلعان قۇننىڭ ورنىقتى تىزبەگى ونىڭ نەگىزىنە اينالۋى كەرەك. بۇل باعىتتا مۇناي سەرۆيسى مەن مۇناي حيمياسى سالالارىنىڭ (پلاستيك، كومىرتەكتى نانوتۇتىكشەلەر، كومىرتەكتى تالشىقتار، گرافەن ءوندىرىسى) الەۋەتى زور. كەڭەستىڭ ءبىرىنشى وتىرىسىندا مەن ۇكىمەتكە عىلىمي ينستيتۋتتار مەن ۋنيۆەرسيتەتتەردىڭ رەسۋرستارىن جۇمىلدىرا وتىرىپ، عىلىمنىڭ اشىق ءارى قولدانبالى مودەلىنە كوشۋ جونىندەگى كەشەندى شارالاردى ىسكە اسىرۋدى تاپسىرعان ەدىم. عىلىمي جوبالاردا اكادەميالىق سۇرانىستار عانا ەمەس، ەل دامۋىنىڭ ستراتەگيالىق ماقساتتارى مەن ەكونوميكانىڭ قاجەتتىلىكتەرى دە ەسكەرىلۋى كەرەك. ول ءۇشىن ۇزدىك حالىقارالىق تاجىريبەگە سۇيەنە وتىرىپ، زەرتتەۋدىڭ ناقتى باسىمدىقتارىن ايقىنداۋ قاجەت»، - دەدى مەملەكەت باسشىسى.

بۇل رەتتە پرەزيدەنتە عىلىمي ازىرلەمەلەردى كوممەرتسيالاندىرۋدىڭ ءمانى زور ەكەندىگىنە توقتالدى. مىسالى، عالىمداردىڭ زەرتتەۋلەرىن تۇرعىن ءۇي-كوممۋنالدىق شارۋاشىلىق سالاسىنداعى شىعىنداردى ازايتۋ، رەسۋرس ۇنەمدەيتىن تەحنولوگيالاردى ەنگىزۋ، سونداي-اق كليماتتىق ەرەكشەلىكتەرىمىزدى ەسكەرە وتىرىپ، جولداردى جوندەۋ جانە سالۋ ءۇشىن پايدالانۋعا بولادى. «قاراپايىم زاتتار تۋرالى عىلىم» بەلسەندى دامۋعا ءتيىس. ول ءۇشىن عىلىمي قوعامداستىق پەن بيزنەس اراسىنداعى ءوزارا ىقپالداستىقتىڭ ءتيىمدى تەتىكتەرىن جولعا قويۋ قاجەت. اكىمدىكتەر جانىنان وسى باعىتتاعى مىندەتتەردى شەشۋگە ىقپال ەتەتىن عىلىمي كەڭەستەر قۇرعان ءجون. عىلىمي زەرتتەۋلەردىڭ ناتيجەلەرىن وندىرىسكە كەڭىنەن ەنگىزۋ پروتسەسىنە ەلىمىزدىڭ بارلىق وڭىرىندەگى ءىرى كاسىپورىندار تارتىلۋعا ءتيىس.

«بۇگىنگى كورمەدە مەن عالىمدارىمىزدىڭ ءونىمدى قايتا وڭدەۋ دەڭگەيىن ارتتىرۋعا قوسقان ناقتى ۇلەسىن كورسەتەتىن ءبىرقاتار جوبامەن تانىستىم. مۇنداي ءساتتى تاجىريبەنى كەڭىنەن تاراتۋ كەرەك. بۇل ىسكە ەلىمىزدىڭ بارلىق وڭىرىندەگى ءىرى ءوندىرىس كومپانيالارىنىڭ قاتىسۋى ماڭىزدى. ۇكىمەت عىلىم سالاسىنداعى شىعىندارعا سالىقتىق جانە ينۆەستيتسيالىق جەڭىلدىكتەر بەرۋ ارقىلى بيزنەستى ىنتالاندىرۋدى جالعاستىرعانى ءجون»، - دەدى قاسىم-جومارت توقايەۆ.