اكىم حالىقتىڭ كوبىنە سۇيەنسە، كۇشتى بولادى - ءاليحان بوكەيحانوۆ
استانا. KAZINFORM - افوريزم - شاعىن فيلوسوفيالىق وي، تاجىريبەلىك ءتۇيىن، لوگيكالىق قيسىن. افوريزمنىڭ باستى شارتتارى - ومىرلىك قۇبىلىستارعا جانە ادام مىنەزدەرىنە دەگەن كوزقاراستاعى انىقتىق، ويدى جەتكىزۋدەگى دالدىك پەن قىسقالىق. افوريزم - وي تامىزىعى. «افوريزمدەر» ايدارىندا ءاليحان بوكەيحانوۆ ويلارىن ۇسىنامىز.
ءاليحان بوكەيحانوۆ:
1) اقىلعا ساڭىراۋلىق تا ايىپ.
2) جۇرت ءادىل بولماي، جۇرت ءىسى وڭعا باسپايدى.
3) ادام بالاسى ءناپسىنىڭ قۇلى: ماڭدايى تاسقا تيمەي توقتامايدى!
4) اقىلدى ءسوز قىلماق قيىن، اقىلدى ءسوزدى اقىلدى ءىس قىلماق ودان دا قيىن.
5) جالپاق جۇرتتىڭ كوكىرەگىندە جاقسىلىق بولماسا، جۇرت جۇرت بولىپ، تىرشىلىك قۇرا الماق ەمەس.
6) جۇرت پايداسىنا تازا جولمەن تۋرا باستايتىن ەر تابىلسا، قازاق حالقى سوڭىنان ەرەر ەدى.
7) اكىم حالىقتىڭ كوبىنە سۇيەنسە، كۇشتى بولادى.
8) ءتۇزۋ قالام قيسايعان، وتكىر قالام مۇجىلگەن زامان.
9) قازاق بالاسى بىرىگىپ، تىزە قوسىپ ءىس قىلسا - حالىقتىق ماقسات سوندا ورىندالادى.
10) حالىق ءىسىن ورنىنا سالۋعا كوپ اقىل، كوپ قىزمەت، كوپ جىلعى شەبەر ىستەگەن ءادىس كەرەك.
11) ەر جىگىتتىڭ بەلگىسى - اداسقانىن موينىنا العانى.
12) ءوز كۇشىنە سەنبەگەن ادام دا، حالىق تا ەشقاشان ءومىر بايگەسىن الا المايدى.
13) كوكىرەكتە سايراپ تۇر، قولدى زامان بايلاپ تۇر.
14) بۇل جۇرت جۇمىسىن جۇرت بولىپ ىزدەمەس پە ەدى؟!
15) عۇمىر ءىسى زاڭ حاتىنا قاشان سىيعان؟!
16) كەرەكتى جاقسى سوزدەر توزبايدى.
17) ءار نارسەنىڭ امالىن ءبىلىپ، ءوز ورنىنان جۇمساعاندا عانا ءىس كوركەيەدى.
18) ءبىر ونەر قىلعان ەكى كىسىگە تار جەر ەكى ونەر قىلعان ەكى كىسىگە كەڭ بولادى.
19) بۇل عۇمىر تويىنا شاقىرىلعان كوپتىڭ ءبارى بىردەي ءوز ونەرىنە ءتيىستى ورىن الا بەرمەيدى.
20) تۇرمىس قۇرساۋى - قۇدايدان سوڭعى كۇشتى.
21) تۇرىك زاتتى حالىقتا ءبىزدىڭ قازاقتاي ءبىر جەردە تىزە قوسىپ، قالىڭ وتىرعان ىرگەلى ەل جوق.
22) انىق تۇرىك زاتتى حالىق ءتىلى - ءبىزدىڭ قازاق ءتىلى.
23) ءبىزدىڭ جۇرت بوستاندىق، تەڭدىك، قۇرداستىق، ساياسات ءىسىن ۇعىنباسا، تاريح جولىندا تەزەك تەرىپ قالادى. باقىت پەن ماحابباتتان تىسقارى بولادى: بۇل ەكەۋى جوق جۇرتقا تىرشىلىك نەگە كەرەك؟!
(ەربول شايمەردەن ۇلى قۇراستىرعان «قازاق افوريزمدەرى» كىتابىنان ىرىكتەلىپ الىندى)
