اۋەكومپانيا سالعىرتتىعى: FlyArystan ەگىزدىڭ سىڭارىن اۋەجايدا قالدىرىپ كەتكەن
استانا. KAZINFORM - ورال قالاسىنىڭ قوس تۇرعىنى، ەگىزدەر - زاۋرە مەن زەرە امەريكاداعى ءتىل مەكتەبىنەن استانا ارقىلى كەرى ۇشىپ شىققان. ەلورداعا امان جەتكەن قوس جاس ءوسپىرىمنىڭ ءبىرى استانا - ورال باعىتىندا ۇشقان «FlyArystan» اۋەكومپانياسىنىڭ ۇشاعىنان قالىپ قويعان. بۇل تۋرالى ەگىزدەردىڭ اناسى جازيرا مۋسينا ءوزىنىڭ الەۋمەتتىك پاراقشاسىنا جازدى.
اناسىنىڭ ايتۋىنشا، 12 جاسار بالالار 20-شىلدە كۇنى سەنىپ تاپسىرىلعان تۇلعانىڭ جەتەكشىلىگىمەن نيۋ-يورك قالاسىنان استاناعا باعىت العان ۇشاقپەن ۇشىپ كەلگەن. 21-شىلدە كۇنى تاڭدا ۇشاق استانا قالاسىنا قونعان. جوسپار بويىنشا سول كۇنى تۇستەن كەيىن ورالعا ۇشاتىن رەيسكە وتىرۋى ءتيىس بولعان. الايدا، «FlyArystan» اۋەكومپانياسى قىزمەتكەرلەرىنىڭ سالعىرتتىعى سالدارىنان، ەگىزدەردىڭ بىرەۋى اۋەجايدا قالىپ قويعان.
«FlyArystan» اۋەكومپانياسىنىڭ قىزمەتكەرلەرى تەك زاۋرەنى تىركەپ، تەحنيكالىق اقاۋدى سىلتاۋراتىپ، زەرەنى تىركەمەگەن. بالالارعا جاۋاپتى تۇلعاعا زەرەنى وزدەرى ۇشاققا وتىرعىزاتىنىن ايتقان. ناتيجەسىندە ءبارى ۇشىپ كەتەدى دە، زەرە اۋەجايدا قالىپ قويعان»، - دەپ جازدى اناسى.
زەرە وسىلايشا، ەكى چەمودانى مەن قۇجاتىن قۇشاقتاپ، استانا اۋەجايىندا جالعىز قالعان.
اناسىنىڭ حابارلاۋىنشا، بۇل جاڭالىقتى ەستىگەن بويدا ول ءتيىستى مەكەمەلەرگە قوڭىراۋ شالىپ، حابارلاسا باستاعان. اۋەكومپانياسى زەرەنى قوناقۇيگە ورنالاستىرۋ تۋرالى ۇسىنىس ايتقان. الايدا، قىزىنىڭ قاۋىپسىزدىگىنە الاڭداعان انا ۇسىنىستان باس تارتىپ، تۋىسقاندارىنان كومەك سۇراعان. ەرتەڭىندە تاڭدا زەرە ەشبىر جەتەلەگەن ادامسىز ءوزى ورالعا ۇشقان.
جازيرا مۋسينا بىردەن قورعاۋشى تاۋىپ، ازاماتتىق اۆياتسيا كوميتەتىنە شاعىم تۇسىرگەن. بالا قۇقىعى، اۋەكومپانيانىڭ جاۋاپكەرشىلىگى ماسەلەسىن العا تارتقان.
بۇگىن «FlyArystan» اۋەكومپانياسى كامەلەتكە تولماعان جولاۋشىنى رەيسكە جىبەرمەۋ جونىندەگى اقپاراتقا قاتىستى تۇسىنىكتەمە بەردى.
«ازاماتتىق اۆياتسيا كوميتەتى «FlyArystan» اۆياكومپانياسىن كامەلەتكە تولماعان جولاۋشىنى اۆياكومپانيانىڭ رەيسىنە جىبەرمەگەنى ءۇشىن اكىمشىلىك جاۋاپكەرشىلىككە تارتادى. بۇل ورەسكەل جاعداي. جولاۋشىلاردىڭ قۇقىعى ءارقاشان مۇلتىكسىز ساقتالۋى كەرەك. ازاماتتىق اۆياتسيا كوميتەتى، «قازاقستاننىڭ اۆياتسيالىق اكىمشىلىگى» ا ق-مەن بىرلەسە «FlyArystan» اۆياكومپانياسىنا قاتىستى جان-جاقتى تەكسەرۋ جۇرگىزەدى. كىنالى قىزمەتكەرلەر مىندەتتى تۇردە جاۋاپقا تارتىلادى»، - دەلىنگەن حابارلامادا.
