ۆاكسيناتسيا تۋرالى دەرەكتەردىڭ ءالى دە قاعازعا جازىلىپ جاتقانى تۇسىنىكسىز - سەناتور

بۇگىن سەناتتىڭ جالپى وتىرىسىندا دەپۋتات بيبىگۇل جەكسەنباي قىزىلشاعا قارسى ەكپە سالۋ ماسەلەسىن كوتەردى، دەپ حابارلايدى Kazinform.

«ا ق ش-تىڭ اۋرۋلاردى باقىلاۋ جانە الدىن الۋ ورتالىعى قىزىلشانىڭ جاھاندىق ىندەتىنە قاتىستى مالىمەتتى جاريالاپ، قازاقستان اۋرۋ جۇقتىرعاندار سانى بويىنشا العاشقى ۇشتىككە ەندى. قازىر ەلىمىزدە قىزىلشا جۇقتىرعاندار سانى 21 مىڭنان استى. ساراپشىلار پىكىرىنشە، قازاقستاندا ۆاكسيناتسيا پروبلەماسى ءبىر ساتتە پايدا بولماعان. جۇقپالى دەرتتىڭ باستى سەبەبىنىڭ ءبىرى - ەكپە باعىتىنداعى جۇمىستىڭ ءالى جۇيەلى، جوسپارلى، ناتيجەسى سارالانىپ، جاسالماي كەلە جاتقاندىعى»، - دەدى ب. جەكسەنباي پرەمەر-مينيستر ءاليحان سمايىلوۆتىڭ اتىنا جولداعان ساۋالىندا.

سونىمەن قاتار ول ءبىرقاتار وڭىردە ەلدە بار ۆاكسينالاردىڭ ءوزى كەڭىنەن تارالماعانىن جانە ەگۋ قىزمەتىنىڭ ساپاسى تومەك ەكەنىن ايتتى.

«اۋىلداردا مەديتسينالىق پەرسونال مەن قۇرال-جابدىقتاردىڭ جەتىسپەۋى دە بالالاردى ۋاقتىلى ۆاكسيناتسيالاۋدى قيىنداتىپ وتىر. ودان بولەك، ءدىني نانىمدارعا بايلانىستى ەكپەدەن باس تارتقاندارمەن جۇمىس پارمەندى جۇرگىزىلمەيدى. ەكپە جاسالۋى تۋرالى مالىمەت پەن كورسەتكىشتەر بويىنشا ەسەپتەردىڭ دۇرىستىعىنا كۇمان بار. قازاقستان سيفرلاندىرۋ بويىنشا العا شىقتى دەپ ماقتانعانىمىزبەن، ۆاكسيناتسيا تۋرالى مالىمەتتەر ءالى قاعازدا جازىلۋى بولۋى تۇسىنىكسىز»، - دەدى سەناتور.

دەپۋتات ۇكىمەتتىڭ بۇل ماسەلەنى شەشۋگە جىلدار بويى نەمقۇرايلى قاراعانىنا نارازىلىعىن جەتكىزدى جانە جاعدايدى شەشۋگە باعىتتالعان ءبىرقاتار ۇسىنىستار ايتتى.

«ەڭ الدىمەن، جاعدايدى جاقسارتۋ ءۇشىن قوعامدا ۆاكسيناتسيانىڭ ماڭىزدىلىعى مەن قاۋىپسىزدىگى تۋرالى اقپاراتتىق جۇمىستى كۇشەيتۋ قاجەت. ەكىنشىدەن، ەلىمىزدىڭ بارلىق ايماقتارىندا جوعارى ساپالى ۆاكسينالار مەن دەنساۋلىق ساقتاۋ قىزمەتتەرىن كەدەرگىسىز الۋدى قامتاماسىز ەتىپ، ارنايى موبيلدى مەديتسينالىق توپتاردى ۇيىمداستىرۋ كەرەك. ۇشىنشىدەن، ۆاكسينا ساپاسى مەن ونىڭ مەرزىمى وتكەندەرىن جويۋدى قاداعالاۋدى بارىنشا كۇشەيتۋ ماڭىزدى»، - دەدى بيبىگۇل جەكسەنباي.