«اكەلەر وداعى» قازاقستاندا ەنەرگەتيكالىق سۋسىندارعا تولىق تىيىم سالۋدى تالاپ ەتتى

استانا. KAZINFORM - ەنەرگەتيكالىق سۋسىن ءىشۋ كوپ قازاقستاندىق ءۇشىن ۇيرەنشىكتى جاعدايعا اينالدى. مەكتەپ وقۋشىلارى مەن ستۋدەنتتەردەن باستاپ جۇرگىزۋشىلەر مەن كەڭسە قىزمەتكەرلەرىنە دەيىن شارشاعانىن باسىپ، ۇيقىسىن اشۋ ءۇشىن وسى سۋسىندارعا جۇگىنەدى. الايدا ولاردىڭ ادامدى ۋاقىتشا سەرگىتكەنىمەن، دەنساۋلىققا تيگىزۋى مۇمكىن زيانى قوعام مەن مەملەكەتتى الاڭداتۋعا ءتيىس، دەپ حابارلايدى turkystan.kz.

энергетикалық сусын
Фото: istockphoto.com

«اكەلەر وداعى» رەسپۋبليكالىق قوعامدىق بىرلەستىگى قازاقستاندا ەنەرگەتيكالىق سۋسىنداردى وندىرۋگە، ساۋدا ماقساتىندا ەلگە اكەلۋگە جانە ساتۋعا تولىق تىيىم سالۋدى ۇسىندى. باستاما ينتەرنەت ارقىلى ساتۋعا جانە تاپسىرىسپەن جەتكىزۋگە دە تىيىم سالۋدى كوزدەيدى.

بىرلەستىك وكىلدەرىنىڭ ايتۋىنشا، قازىر قولدانىلىپ جۇرگەن شەكتەۋلەر جەتكىلىكسىز. ەلىمىزدە 2025 -جىلعى 1-قاڭتاردان باستاپ ەنەرگەتيكالىق سۋسىنداردى 21 جاسقا تولماعاندارعا ساتۋعا تىيىم سالىندى. ال 2026 -جىلدان بەرى بۇل ونىمگە اكسيز سالىعى سالىنادى. دەگەنمەن مۇنداي شارالار ەنەرگەتيكالىق سۋسىنداردى ساتۋدى رەتتەگەنىمەن، ولاردى تۇتىناتىن ەرەسەكتەردىڭ دەنساۋلىعىنا ءتونۋى مۇمكىن ءقاۋىپتىڭ الدىن تولىق الا المايدى.

«ەنەرگەتيكالىق سۋسىنداردى ۇنەمى ءىشۋدىڭ كەيىنگى زاردابى ءبىزدى قاتتى الاڭداتادى. ولاردى ءجيى تۇتىنۋ بەدەۋلىككە، قاتەرلى ىسىككە، جاس كەزدە ينفاركت الۋعا، ءتىپتى ءومىر جاسىنىڭ قىسقارۋىنا اكەلۋى مۇمكىن دەگەن قاۋىپ بار»، - دەدى «اكەلەر وداعى» رەسپۋبليكالىق قوعامدىق بىرلەستىگى ءتوراعاسىنىڭ ورىنباسارى بەكدايىر كۇزەمباي بەينەۇندەۋىندە.