انكارادا توقايەۆتى قارسى الۋ ءراسىمى ءوتىپ، كەلىسسوز باستالدى
استانا. KAZINFORM - تۇركيا رەسپۋبليكاسىنا رەسمي ساپارمەن بارعان قاسىم-جومارت توقايەۆتى انكاراداعى پرەزيدەنت سارايىندا سالتاناتتى قارسى الۋ ءراسىمى ءوتتى. بۇل تۋرالى اقوردا ءمالىم ەتتى.
مەملەكەت باسشىسىنىڭ كەلۋىنە وراي قۇرمەت قاراۋىلى ساپ تۇزەدى. سارايعا كەلگەن ساتتە پرەزيدەنت كورتەجىن سالت اتتى گۆارديا باستاپ ءجۇردى.
قاسىم-جومارت توقايەۆتى رەجەپ تاييپ ەردوعان قارسى الدى. قازاقستان مەن تۇركيانىڭ مەملەكەتتىك ءانۇراندارى ورىندالىپ، زەڭبىرەكتەن 21 دۇركىن وق اتىلدى.
ەكى ەلدىڭ كوشباسشىلارى قۇرمەت قاراۋىلى الدىنان ءجۇرىپ ءوتىپ، ءبىر-بىرىنە رەسمي دەلەگاتسيا مۇشەلەرىن تانىستىردى.
سودان كەيىن مەملەكەتتەر باسشىلارى شاعىن قۇرامدا كەلىسسوز جۇرگىزدى.
ەسكە سالا كەتەيىك، قاسىم-جومارت توقايەۆتىڭ تۇركياعا رەسمي ساپارى باستالدى. ايتا كەتەيىك، مەملەكەت باسشىسىن انكارا قالاسىنداعى ەتيمەسگۋت اۋەجايىنان تۇركيا پرەزيدەنتى رەجەپ تاييپ ەردوعان كۇتىپ العان بولاتىن.
انكارادا مەملەكەتتەر باسشىلارى كەڭەيتىلگەن ستراتەگيالىق سەرىكتەستىكتى ودان ءارى نىعايتۋعا باعىتتالعان كەلىسسوزدەر جۇرگىزەدى. سونداي-اق قازاقستان پرەزيدەنتى تۇركى مەملەكەتتەرى ۇيىمىنىڭ 13-سامميتىنە قاتىساتىنى حابارلانعان ەدى.
