اجەمنىڭ ءوز ەسەبى بار

ساندىعىنىڭ ءبىر بۇرىشىندا سوعىمنىڭ اقشاسى، تۇيىنشەك ورامالىنىڭ ىشىندە تويدىكى، تاعى ءبىر جەردە «الدا- جالدا» دەگەن قور جاتاتىن...

وسىنىڭ ءبارى بالا كوڭىلگە قىزىق ەدى. اجەمنىڭ كونەتوز جاسىل ساندىعى كادىمگى بانك-تۇعىن. ايىرماسى - بولىمشەسى بىرەۋ، قىزمەتكەرى دە، كۇزەتشىسى دە ءوزى. وزىنە ءتان اقشا اينالىمى دا بار. ساندىققا تۇسكەن ءبىر بۋما اقشا ەشقاشان ءبىرتۇتاس بولمايتىن. ءار تەڭگەنىڭ ءوز جۇگى بار.

كەيىن ءبىلدىم، اجەمنىڭ وسى ادەتىنىڭ ارتىندا ەكونوميكالىق تۇسىنىك جاتىپتى. امەريكالىق ەكونوميست ريچارد تالەر مۇنى عىلىمي تىلگە ءتۇسىرىپتى. ادام قولىنداعى اقشاسىن ويشا ءبولىپ ۇستايدى ەكەن. سوعىمعا دەپ جيعان 100 مىڭ تەڭگە دە، سىيلىققا كەلگەن 100 مىڭ تەڭگە دە ءبىر اقشا. ءبىراق سوعىمنىڭ اقشاسىنا قول بارمايدى. ال سىيلىققا كەلگەنىن «ولجا» دەپ وڭاي جۇمسايمىز. اقشانىڭ سانى وزگەرمەيدى، ءجونى وزگەرەدى. كەيىنگى زەرتتەۋلەر دە وسىنى قۋاتتادى. بەلگىلى ءبىر قاجەتكە دەپ بولەك قويعان قاراجات كەمىگەن سايىن ادام شىعىنعا ساق قاراي باستايدى. اجەم مۇنى كىتاپتان وقىعان جوق. سوعىمنىڭ اقشاسىنا كويلەك الۋعا بولمايتىنىن بىلگەنى جەتكىلىكتى ەدى.

قازىر ءبىزدىڭ ساندىق تەلەفوننىڭ ىشىندە. ءبىر شوت كۇندەلىكتى تىرلىككە، ءبىرى جيناققا، ەندى ءبىرى ۇلكەن ماقساتقا ارنالعان. «ءۇي»، «كولىك»، «ساياحات» دەپ ايدار تاعىپ قويامىز. باياعى تۇيىنشەكتىڭ سيفرلانعان ءتۇرى. تەك ءبىر ايىرماسى بار. اجەم اقشا جۇمساسا، ءاميانىنىڭ جۇقارعانىن كورەتىن. ءبىز اقشانىڭ كەتكەنىن كەيدە ءبىر «تىڭق» ەتكەن دىبىستان عانا بىلەمىز. كەيدە اڭعارمايمىز دا. كەشكە قوسىمشانى اشقاندا، كۇندىزگى بەيكۇنا دىبىستاردىڭ كادىمگىدەي سوماعا اينالعانىن كورەمىز. زەرتتەۋلەر دە قولما-قول اقشامەن قوشتاسۋ كارتادان تولەگەنگە قاراعاندا ادامعا اۋىرلاۋ تيەتىنىن كورسەتەدى. تولەۋ وڭايلاعان سايىن اقشانىڭ جىلىستاعانى دا سەزىلمەي بارادى.

ارينە، ەندى تەڭگەنى ورامالعا ءتۇيىپ، ساندىق تۇبىنە تىعۋدىڭ قاجەتى جوق. ءبىراق اجەمنىڭ سول ءبىر عادەتىنەن الار عيبرات بار. قولعا تۇسكەن اقشانىڭ ەنشىسىن اۋەلدەن ايىرساق، بالكىم، بەرەكە دەگەنىمىز دە وسى شىعار. اجەم ساندىق تۇبىنە تەڭگە عانا تۇيمەپتى. ءبىر تۇيىنشەككە ەرتەڭنىڭ قامىن، ءبىر تۇيىنشەككە شاڭىراقتىڭ قۇتىن، تاعى بىرىنە كوڭىلدىڭ مەدەۋىن قوسا ءتۇيىپتى. جىلدار جىلجىپ ساندىق ساعىنىشقا اينالدى. ەسەيگەن سايىن ساندىق تۇبىندەگى اق تۇيىنشەكتە اقشادان دا قىمبات تاربيە جاتقانىن ۇعىپ كەلەمىن.. .

ەلىگىماي توڭكەر

egemen.kz