اۋەجايلاردا قازاقستانعا جالعان قۇجاتپەن كىرمەك بولعان 19 شەتەلدىك انىقتالدى
استانا. قازاقپارات – استانا مەن الماتى اۋەجايلارىندا شەكارانى زاڭسىز كەسىپ وتۋگە ارەكەت جاساعان شەتەلدىكتەر ۇستالدى. جىل باسىنان بەرى وسىنداي 358 دەرەكتىڭ جولى كەسىلگەن.
قازاقستاننىڭ ۇلتتىق قاۋىپسىزدىك كوميتەتى شەكارا قىزمەتى قىركۇيەك پەن قازان ايلارىندا استانا جانە الماتى اۋەجايلارىندا جالعان قۇجاتپەن مەملەكەتتىك شەكارانى كەسىپ وتۋگە ارەكەت جاساعان 19 شەتەل ازاماتىن انىقتادى.
ق ر ۇ ق ك شەكارا قىزمەتىنىڭ مالىمەتىنشە، شەكارالىق باقىلاۋ كەزىندە قۇقىق بۇزۋشىلاردىڭ باسىم بولىگى جالعان ۆيزالار مەن ءۇشىنشى تۇلعالاردىڭ دەرەكتەرى كورسەتىلگەن قۇجات بلانكىلەرىن پايدالانعان.
اتالعان فاكتىلەر بويىنشا قۇقىق قورعاۋ ورگاندارى سوتقا دەيىنگى تەرگەپ-تەكسەرۋ جۇرگىزىپ جاتىر.
جىل باسىنان بەرى 358 دەرەك تىركەلگەن
شەكارا قىزمەتى جالعان جانە بوگدە قۇجاتتاردى پايدالاناتىن ادامداردىڭ قازاقستان اۋماعىنا كىرۋىنە جول بەرمەۋ باعىتىندا تۇراقتى جۇمىس جۇرگىزىپ كەلەدى.
ۆەدومستۆونىڭ مالىمەتىنشە، 2026 -جىلدىڭ باسىنان بەرى شەكارالىق باقىلاۋ بارىسىندا وسىنداي 358 قۇقىق بۇزۋشىلىقتىڭ جولى كەسىلگەن.
ۇ ق ك شەكارا قىزمەتى مەملەكەتتىك شەكارانى جالعان نەمەسە بوگدە قۇجاتتاردى پايدالانىپ كەسىپ وتكەنى ءۇشىن قىلمىستىق جاۋاپتىلىق كوزدەلگەنىن ەسكەرتەدى.
ەسكە سالساق، بۇعان دەيىن دە قازاقستان شەكاراسىندا 200 ادام جالعان قۇجاتپەن ۇستالعان بولاتىن.
