اۋەجايدا قىزمەتكەردى كەپىلگە العان ەر ادام ەكى ايعا قاماۋعا الىندى

ىشكى ىستەر مينيسترلىگى الماتى اۋەجايىندا بولعان وقيعاعا قاتىستى پىكىر ءبىلدىردى، - دەپ حابارلايدى Tengrinews.kz ءتىلشىسى.

ۆەدومستۆو مالىمەتىنشە، وقيعانىڭ ءمان-جايىن تەكسەرۋ ءۇشىن جەدەل تەرگەۋ توبى قۇرىلعان. زارداپ شەككەندەر جوق.

سوت شەشىمىمەن كۇدىكتىگە ەكى ايدا قاماۋدا ۇستاۋ تۇرىندە بۇلتارتپاۋ شاراسى سانكسيالاندى.

ىشكى ىستەر ءمينيسترى ەرجان سادەنوۆتىڭ تاپسىرماسىمەن ەلدەگى اۋەجايلار مەن ۆوكزالدارداعى قاۋىپسىزدىك جۇيەسى تەكسەرىلىپ جاتىر.

نەگىزگى نازاردا:

وسال تۇستاردى انىقتاۋ؛
قاۋىپتىڭ الدىن الۋ؛
باقىلاۋدى كۇشەيتۋ؛
ارەكەت ەتۋ الگوريتمىن جەتىلدىرۋ؛
كۇزەت قىزمەتكەرلەرىن وقىتۋ؛
قۇقىق قورعاۋ ورگاندارىمەن ءوزارا ءىس-قيمىلدى نىعايتۋ.
ءى ءى م جاعداي تولىق باقىلاۋدا ەكەنىن، بولاشاقتا مۇنداي وقيعالاردىڭ الدىن الۋ ءۇشىن بارلىق قاجەت شارا قابىلداناتىنىن مالىمدەدى.

توسىن وقيعا تۋرالى نە بەلگىلى؟
7-ناۋرىزدا الماتى اۋەجايىندا قولىندا سۋىق قارۋى بار ەر ادام قىزمەتكەردى كەپىلگە الدى. جەلىدە اۋەجايدا تۇسىرىلگەن ۆيدەو تارادى. كادرلاردان قولىندا پىشاعى بار ەر ادام قىزدىڭ شاشىنان ۇستاپ العانىن بايقاۋعا بولادى. وقيعا ىشكى تەرمينالدا بولعان.

اۋەجايدىڭ باسپا ءسوز قىزمەتى مالىمەتىنشە، ەر ادام ءوزىن جولاۋشى رەتىندە كورسەتىپ، رەيس الدىنداعى قاۋىپسىزدىك ايماعىنا جاقىنداعان. قىزمەتكەرلەر ودان قۇجاتىن سۇراعان كەزدە ول قىزمەتكەردى پىشاقپەن قورقىتقان. 7 مينۋتتان كەيىن شابۋىلداۋشى ۇستالدى. ول قاماۋعا الىندى.

ارتىنشا پرەزيدەنت الماتى اۋەجايىنداعى وقيعاعا قاتىستى باتىل ازاماتتى ماراپاتتاۋدى تاپسىردى.

اۋەجايدا كەپىلگە الىنعان ادامدى قۇتقارعان مۇسا ءابدىرايىم «ەرلىگى ءۇشىن" مەدالىمەن ماراپاتتالدى.