Air Astana ۇشاعى شىمكەنتكە قونا المادى

Air Astana اۋە كومپانياسىنىڭ KC341 رەيسىمەن ۇشقان جولاۋشىلار Kazinform تىلشىسىنە ۇشاقتىڭ شىمكەنتكە 23:50 دە جەتۋى كەرەك بولعانىن، ءبىراق باعىتتىڭ وزگەرۋىنە بايلانىستى قالاعا تەك تاڭعى بەستە كەلگەنىن ايتتى.

- كەشە شىمكەنتتىڭ ورنىنا تۇركىستانعا قوندىق. سودان كەيىن ءبىزدى شىمكەنتكە اۆتوبۋسپەن جەتكىزدى. ايتپاقشى، اۆتوبۋستىڭ ءىشى سۋىق بولدى، ال ارامىزدا بالالار دا بار ەدى. شىمكەنتتە 23:50 دە بولۋىمىز كەرەك ەدى، ءبىراق قالاعا تاڭعى بەستە جەتتىك. تاكسي جۇرگىزۋشىسىنەن ەستىگەنىم، تاعى ءبىر ۇشاق تا شىمكەنتتىڭ ورنىنا تۇركىستانعا ۇشىپ كەتكەن ەكەن، - دەدى جولاۋشىلاردىڭ ءبىرى.

اۋە كومپانياسى جولاۋشىلاردىڭ شاعىمىنا قاتىستى تۇسىنىك بەردى. كومپانيا وكىلدەرىنىڭ ايتۋىنشا، باعىتتىڭ وزگەرۋىنە شىمكەنت اۋەجايىنداعى ۇسىك تۇمان سەبەپ بولعان.

اۋا رايىنىڭ قولايسىزدىعىنان اۋەجايدا كورىنۋ قاشىقتىعى ۇشاقتى قوندىرۋعا قاجەتتى دەڭگەيدەن تومەندەگەن. سوندىقتان ۇشاقتى قوندىرۋ جولاۋشىلار مەن ەكيپاجدىڭ قاۋىپسىزدىگىنە قاتەر ءتوندىرۋى مۇمكىن ەدى.

- استانا - شىمكەنت باعىتى بويىنشا KC341 رەيسىن ورىنداعان ۇشاق شىمكەنت اۋەجايىنداعى ۇسىك تۇمان مەن كورىنۋ قاشىقتىعىنىڭ بەلگىلەنگەن ەڭ تومەنگى مەجەدەن تومەن بولۋىنا بايلانىستى تۇركىستانعا باعىتتالدى. شىمكەنت - استانا باعىتى بويىنشا KC342 كەرى رەيسى دە تۇركىستاننان ورىندالدى. اتالعان رەيستىڭ جولاۋشىلارى اۆتوبۋسپەن تۇركىستانعا جەتكىزىلدى، - دەپ حابارلادى Air Astana باسپا ءسوز قىزمەتى.

ەسكە سالايىق، بۇعان دەيىن الماتىدان پاۆلودارعا بەت العان ۇشاق كەرى ورالعانىن حابارلاعانبىز.