ماحمۋد سابىرحاننىڭ داۋلى جەكپە-جەگىنە تورەلىك ەتكەن قازىلار جارىستاردان شەتتەتىلۋى مۇمكىن

ماديار اشكەيەۆ ۇلتتىق قۇراما بوكسشىلارىنىڭ ازيا ويىندارىنا دايىندىعىنا توقتالىپ، ا ق ش-تا وتكەن وقۋ-جاتتىعۋ جيىنىنىڭ ناتيجەلى بولعانىن ايتتى.

ونىڭ سوزىنشە، سپورتشىلار ءبىر جارىم اي بويى تىڭعىلىقتى دايىندالىپ، باپكەرلەر بەلگىلەگەن تاكتيكانى تولىق مەڭگەرگەن.

اشكەيەۆ اسىرەسە 55 كەلىگە دەيىنگى سالماقتا ونەر كورسەتكەن ماحمۋد سابىرحاننىڭ دايىندىعىن جوعارى باعالادى. الايدا فيليپپيندىك كارلو پاالامعا قارسى وتكەن جارتىلاي فينالدىق كەزدەسۋدە تورەشىلەر ۇپاي ەسەپتەۋ كەزىندە قاتەلىك جىبەرگەن دەپ ەسەپتەيدى.

- ماحمۇد بۇل جارىسقا ءجۇز پايىز دايىن بولدى. ەكىنشى راۋندتا قارسىلاسىنان ءبىر ۇپاي شەگەرىلدى. مۇنداي جاعدايدا راۋند 10:9 ەسەبىمەن باعالانسا، ۇپاي شەگەرىلگەننەن كەيىن 9:9 بولۋى كەرەك. ال ماحمۇد سول راۋندتا باسىم تۇسكەندىكتەن، ەسەپ 10:8 بولۋى ءتيىس ەدى. ءبىراق تورەشىلەردىڭ مۇنى نەگە ەسكەرمەگەنىن تۇسىنبەدىم. فەدەراتسيا باسشىسى شاحمۇرات ءمۇتالىپ تە وسى جاعدايعا نازار اۋدارىپ، قازىلاردىڭ كەلەسى تۋرنيرلەردەن شەتتەتىلەتىنىن ايتتى،- دەدى ماديار اشكەيەۆ.

ول تورەشىلەر شەشىمىنە قاراماستان، ماحمۇد سابىرحاننىڭ لايىقتى ونەر كورسەتكەنىن اتاپ ءوتتى.

ازيا ويىندارىندا ماحمۇد سابىرحان العاشقى كەزدەسۋىندە يراندىق مەحدي كازەميدى جەڭدى. ودان كەيىن شيرەك فينالدا وڭتۇستىك كورەيا وكىلى شين دجەەننان باسىم ءتۇستى.

الايدا جارتىلاي فينالدا ەكى دۇركىن الەم چەمپيونى فيليپپيندىك كارلو پاالامعا تورەشىلەردىڭ بولەك شەشىمىمەن 2:3 ەسەبىمەن ەسە جىبەردى.

وسىلايشا، قازاقستاندىق بوكسشى 55 كەلىگە دەيىنگى سالماقتا قولا مەدال يەلەندى.

ازىرگە تورەشىلەردى جارىستاردان شەتتەتۋ تۋرالى رەسمي شەشىمگە قاتىستى اقپارات جاريالانعان جوق.