افريكادا مايمىل شەشەگىنە شالدىققاندار سانى 22,8 مىڭعا جەتتى

استانا. KAZINFORM - 2024 -جىلدىڭ باسىنان بەرى افريكالىق ەلدەردە mpox ۆيرۋسىنا («ەمپوكس» - مايمىل شەشەگىنىڭ جاڭا اتاۋى) شالدىققاندار سانى 22,8 مىڭ ادامعا جەتكەن.

بۇل تۋرالى افريكا وداعىنىڭ مەديتسينالىق قىزمەتى - افريكانىڭ اۋرۋلاردى باقىلاۋ جانە الدىن الۋ ورتالىقتارى مالىمدەدى، دەپ حابارلادى ت ا س س اقپارات اگەنتتىگى.

جىل باسىنان بەرى ۆيرۋس جۇقتىرعان 622 ادام قايتىس بولعان. كەيىنگى اپتادا اۋرۋعا شالدىققاندار سانى %200 عا ءوستى.

Mpox ىندەتىنىڭ وشاعى -كونگو دەموكراتيالىق رەسپۋبليكاسى (ك د ر). اۋرۋدان ەڭ كوپ زارداپ شەگەتىن جاس توبى - 15 جاسقا دەيىنگى بالالار مەن جاسوسپىرىمدەر.

كەيىنگى ۋاقىتتا مەديتسينالىق قىزمەتتەردىڭ ۆيرۋس جۇقتىرۋ جاعدايلارى مەن قايتىس بولعاندار سانى تۋرالى مالىمەتتەرى ءارتۇرلى بولىپ شىققان. بۇل كەيبىر قىزمەتتەردىڭ تەك زەرتحانالىق راستالعان جاعدايلاردى سانايتىنىنا بايلانىستى، ال باسقالارى mpox كۇدىكتى جاعدايلارىن دا سانايدى.

قازىر قۇرلىقتىڭ دەنساۋلىق ساقتاۋ سالاسىندا mpox تارالۋىنا بايلانىستى توتەنشە جاعداي جاريالاندى. اۋرۋ جۇقتىرعان ادامدار افريكانىڭ 18 ەلىنەن انىقتالدى. 14 - تامىزدا دۇنيەجۇزىلىك دەنساۋلىق ساقتاۋ ۇيىمى افريكاداعى mpox ىندەتى حالىقارالىق الاڭداۋشىلىق تۋدىراتىن قوعامدىق دەنساۋلىق ساقتاۋ توتەنشە جاعداي ەكەنىن جاريالادى.

ەسكە سالا كەتسەك، بۇعان دەيىن ق ر دەنساۋلىق ساقتاۋ مينيسترلىگى مايمىل شەشەگىن انىقتاۋعا ارنالعان پ ت ر سىناقتارى ساتىپ الىنعانىن مالىمدەگەن بولاتىن. بۇل رەتتە قر دەنساۋلىق ساقتاۋ ۆيتسە- ءمينيسترى ەرلان نۇرلىبايەۆ قازاقستاندا مايمىل شەشەگى اۋرۋىنىڭ ءورشۋ ىقتيمالدىعى از ەكەنىن ايتتى.

بۇعان دەيىن حابارلاعانىمىزداي، ق ر باس سانيتارلىق دارىگەرى ەلگە مايمىل اۋرۋىنىڭ اكەلىنۋىنە جول بەرمەۋ تۋرالى قاۋلىعا قول قويعان.

اۆتور

زارينا تۋعانبايەۆا