افريكادا پاسپورتتارى تاركىلەنگەن قازاقستاندىقتار ەلگە قايتارىلدى
استانا. KAZINFORM - سىرتقى ىستەر مينيسترلىگىنىڭ رەسمي وكىلى ايبەك سمادياروۆ كەزەكتى بريفينگتە افريكادا پاسپورتتارى تاركىلەنگەن قازاقستاندىقتار ەلگە قالاي قايتارىلعانىن ايتتى.
«وسىدان بىرنەشە اپتا بۇرىن نيگەر استاناسى نيامەيدە قازاقستاننىڭ 2 ازاماتى ۇستالدى دەگەن اقپارات ءتۇستى. قازاقستاننىڭ مىسىرداعى كونسۋلىمىز دەرەۋ سول قالاعا ۇشىپ باردى. ول نيگەردىڭ سىرتقى ىستەر جانە ىشكى ىستەر مينيسترلىكتەرىنىڭ، قارۋلى كۇشتەرى باس شتابىنىڭ باسشىلىعىمەن كەزدەسۋلەر وتكىزدى. كەزدەسۋ بارىسىندا قازاقستان تاراپى «ءبىزدىڭ ازاماتتاردى دەرەۋ جىبەرۋ، پاسپورتتارىن قايتارسىن» دەپ تالاپ قويعان. ارينە، ول ەلگە قانداي ماقساتتا بارعانىن، نە ءۇشىن پاسپورت العانىن نە سول ەلدىڭ بيلىگى، نە ءبىزدىڭ ازاماتتار تۇسىنبەگەن. ءبىراق وسىعان قاراماستان قازاقستان رەسمي تۇردە سول ەلدىڭ بيلىگىنە نوتا جىبەردى»، - دەدى س ءى م رەسمي وكىلى جۋرناليستىڭ سۇراعىنا بەرگەن جاۋابىندا.
ونىڭ سوزىنشە، اتالمىش ءىستىڭ رەتتەلۋىنە اتالمىش ەلدىڭ سىرتقى ىستەر ۆەدومستۆوسى دا اتسالىسقان.
«نيگەر سىرتقى ىستەر مينيسترلىگىنىڭ كومەگىمەن ءبىزدىڭ ازاماتتاردىڭ ءتولقۇجاتتارى قايتارىلدى. بيىل 26- اقپاندا ولار قازاقستانعا ورالدى»، - دەدى ايبەك سمادياروۆ.
ەسكە سالساق، ايبەك سمادياروۆ بۇعان دەيىن دە تولقۇجاتىن نيگەر اسكەريلەرى تاركىلەگەن قازاقستاندىقتار تۋرالى پىكىر بىلدىرگەن بولاتىن.
