افريكا ەلدەرىمەن ىنتىماقتاستىقتى نىعايتۋ - قازاقستاننىڭ سىرتقى ساياساتىنداعى نەگىزگى باعىتتىڭ ءبىرى - توقايەۆ

ەكىجاقتى كەلىسسوزدەردەن كەيىن مەملەكەت باسشىسى مەن توگو پرەزيدەنتى بۇقارالىق اقپارات قۇرالدارىنىڭ وكىلدەرى ءۇشىن بىرلەسكەن مالىمدەمە جاسادى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.

قاسىم-جومارت توقايەۆ، ەڭ الدىمەن، شاقىرۋىن قابىل الىپ، ەلىمىزگە رەسمي ساپارمەن كەلگەنى ءۇشىن پرەزيدەنت گناسسينگبەگە ريزاشىلىعىن ءبىلدىردى. مەملەكەت باسشىسىنىڭ پىكىرىنشە، توگو پرەزيدەنتىنىڭ ساپارى ەكى ەل اراسىنداعى قاتىناستاردى دامىتۋعا جول اشادى. قۇرلىقارالىق بايلانىستىڭ جوعارى دەڭگەيدە ەكەنىن بىلدىرەدى.

- افريكا ەلدەرىمەن ىنتىماقتاستىقتى نىعايتۋ - قازاقستاننىڭ سىرتقى ساياساتىنداعى نەگىزگى باعىتتىڭ ءبىرى. ءبىزدىڭ مەملەكەتتەرىمىز ءبىر-بىرىنەن الىستا جاتىر. سوعان قاراماستان، ءبىز توگومەن تىعىز قارىم-قاتىناس جاساۋعا دايىنبىز. بۇل ەلدىڭ ءوزارا ءتيىمدى ىقپالداستىق ورناتۋعا ۇمتىلىسىن تولىق قولدايمىز. كەلەسى جىلى قازاقستان مەن توگو اراسىندا ديپلوماتيالىق بايلانىس ورناعانىنا 10 جىل تولادى. وسى كەزەڭدە دوستىق پەن ءوزارا قولداۋعا نەگىزدەلگەن ىنتىماقتاستىق نىعايا ءتۇستى. قازىر ونى تىڭ قارقىنمەن دامىتا تۇسۋگە مول مۇمكىندىك بار. جاڭا عانا وسى ماسەلەنى تالقىلاپ، ماڭىزدى كەلىسىمدەرگە قول جەتكىزدىك. مۇنىڭ ءبارى ساياسي، ساۋدا-ەكونوميكالىق، مادەني-گۋمانيتارلىق جانە باسقا دا سالاداعى بايلانىستى جانداندىرۋعا ىقپال ەتەدى، - دەدى قاسىم-جومارت توقايەۆ.

مەملەكەت باسشىسى توگو پرەزيدەنتىمەن اۋىل شارۋاشىلىعى، جاڭا تەحنولوگيا، قازبا بايلىقتاردى بىرلەسە يگەرۋ، ءوندىرىس جانە ينۆەستيتسيا سالالارى بويىنشا دا كەلىسسوز جۇرگىزگەنىن ايتتى.

- ەكى ەل ۇكىمەتتەرىنە تاۋار اينالىمىن ارتتىرۋ ءۇشىن ناقتى شارالار قابىلداۋ جونىندە تاپسىرما بەرۋگە كەلىستىك. اسىرەسە، قازاقستاننىڭ توگوعا ءداندى داقىلدى ەكسپورتتاۋ مۇمكىندىگى زور ەكەنىنە نازار اۋداردىق. ەلىمىزدىڭ باستاماسىمەن ازىق- تۇلىك قاۋىپسىزدىگى جونىندەگى يسلام ۇيىمى قۇرىلعانىن بىلەسىزدەر. مەن توگونى وسى ۇيىمعا مۇشە بولۋعا، ونىڭ الەۋەتىن پايدالانۋعا شاقىردىم، - دەدى پرەزيدەنت.

مەملەكەت باسشىسى تابيعي رەسۋرستارعا باي قازاقستان مەن توگو ەلدەرى تەمىر، فوسفات، بوكسيت جانە باسقا دا سيرەك كەزدەسەتىن مينەرال كەنىشتەرىن بارلاۋ، ءوندىرۋ جانە يگەرۋ ءۇشىن بىرلەسە جۇمىس ىستەۋ مۇمكىندىگىنە يە ەكەنىنە نازار اۋداردى.

- مەن قازاقستان كاسىپكەرلەرى توگونىڭ تاۋ-كەن ءوندىرىسىن زەرتتەۋگە دايىن ەكەنىن اتاپ ءوتتىم. سونىمەن قاتار ەكى ەلدىڭ كولىك- لوگيستيكا سالاسىنداعى ارىپتەستىگى جان-جاقتى تالقىلاندى. قازاقستانعا لومە پورتىنىڭ الەۋەتىن قاراستىرۋ بويىنشا ۇسىنىس ايتىلدى. بۇل تەڭىز ايلاعى قىزمەت اۋقىمى بويىنشا باتىس افريكادا ەكىنشى ورىن الادى. ءبىز ءوزارا ءتيىمدى ارىپتەستىكتى دامىتۋعا بارىنشا كۇش سالۋىمىز كەرەك. سوندىقتان توگو كاسىپكەرلەرىن كەلەسى جىلى وتەتىن استانا حالىقارالىق فورۋمىنا قاتىسۋعا شاقىردىم. ولار فورۋمدا قازاقستاننىڭ ەكونوميكالىق الەۋەتىمەن تانىسا الادى، - دەدى قاسىم-جومارت توقايەۆ.

پرەزيدەنت استانا مەن لومە اراسىندا مادەني-گۋمانيتارلىق ىنتىماقتاستىق ورناتۋ ماڭىزدى ەكەنىنە توقتالدى

- بۇل ەكى حالىقتىڭ ءبىر-ءبىرىن جاقىن تانۋىنا مۇمكىندىك بەرەدى. وسى رەتتە توگو جاستارىنا قازاقستاننىڭ جوعارى وقۋ ورىندارىندا ءبىلىم الۋدى ۇسىندىم. بۇگىنگى قاتىناستارىمىزعا تىڭ سەرپىن بەرۋ ءۇشىن ەلدەرىمىزدىڭ قۇرمەتتى كونسۋلدارىن بەكىتۋگە كەلىستىك. بۇل كەلىسىمدەر ىنتىماقتاستىقتى نىعايتا تۇسەرى ءسوزسىز، - دەدى پرەزيدەنت.

قاسىم-جومارت توقايەۆ ەكى ەلدىڭ حالىقارالىق جانە ايماقتىق دەڭگەيدە تىعىز قاتىناس ورناتقانىن جانە كوپتەگەن وزەكتى ماسەلەگە قاتىستى ۇستانىمدارى ۇقسايتىنىن اتاپ ءوتتى.

- اسىرەسە، جاھاندىق جانە وڭىرلىك قۇرىلىمدار اياسىندا ىقپالداستىعىمىز ويداعىداي دامىپ كەلەدى. قازىرگى گەوساياسي جاعدايدا بىرىككەن ۇلتتار ۇيىمى، يسلام ىنتىماقتاستىعى ۇيىمى، افريكا وداعى سياقتى قۇرىلىمدار ارقىلى ءوزارا قولداۋ كورسەتۋ جانە كونسۋلتاتسيالار وتكىزۋ اسا ماڭىزدى، - دەدى مەملەكەت باسشىسى.

سونىمەن قاتار پرەزيدەنتتەر جاھاندىق جانە ايماقتىق قاۋىپسىزدىك ماسەلەلەرى تۋرالى پىكىر الماستى.

قاسىم-جومارت توقايەۆ فور گناسسينگبەنىڭ ەلىمىزگە ساپارى، شىن مانىندە تاريحي ماڭىزعا يە ەكەنىن جانە ەكى ەلدىڭ قارىم-قاتىناسىن كەڭەيتۋگە تىڭ سەرپىن بەرەتىنىن جەتكىزدى. سونداي-اق ورتالىق ازيا مەن افريكا اراسىنداعى ىنتىماقتاستىقتى ودان ءارى دامىتۋعا ىقپال ەتەتىنىن ايتتى.

فور گناسسينگبە توگونىڭ قازاقستانمەن ىنتىماقتاستىق ورناتۋعا ەرەكشە كوڭىل ءبولىپ وتىرعانىن جانە ستراتەگيالىق سەرىكتەستىكتى ءوڭىرارالىق قانا ەمەس، قۇرلىق دەڭگەيىندە دە دامىتۋعا مۇددەلى ەكەنىن اتاپ ءوتتى

- 300 ميلليوننان استام حالقى بار باتىس افريكا ەلدەرىمەن تاۋار اينالىمىن جولعا قويعان توگو قازاقستاندىق ينۆەستورلاردىڭ قىزىعۋشىلىعىن تۋعىزادى دەپ ويلايمىن. اۋىل شارۋاشىلىعى سالاسىنداعى ىنتىماقتاستىعىمىز دامىپ كەلە جاتقانى قۋانتادى. بۇگىندە ءسىزدىڭ ەلدىڭ توگوعا استىق جەتكىزۋ مۇمكىندىگى مول. قازاقستان سيفرلاندىرۋ سالاسىندا ايتارلىقتاي جەتىستىككە جەتىپ وتىر. ءبىز دە ءوز ەلىمىزدە سيفرلاندىرۋ جوبالارىن ىسكە اسىرىپ، وسى باعىتتاعى ىنتىماقتاستىقتى جولعا قويۋعا نيەتتىمىز. بۇل تۇرعىدان سىزدەردەن ۇيرەنەرىمىز كوپ، - دەدى توگو پرەزيدەنتى.