ۆاشينگتوندا ۇشاق پەن تىكۇشاقتىڭ سوقتىعىسۋىنان كەم دەگەندە 18 ادام قازا تاپتى
استانا. KAZINFORM - وزەننەن كەمىندە 18 ادامنىڭ دەنەسى تابىلدى، ىزدەۋ-قۇتقارۋ وپەراتسياسى جالعاسىپ جاتىر، دەپ حابارلايدى CBS News.

ا ق ش استاناسى ۆاشينگتوندا شاعىن ۇشاق پوتوماك وزەنىنە قۇلادى. اپات اق ءۇي مەن كاپيتوليدەن وڭتۇستىككە قاراي ءتورت شاقىرىمداي جەردە ورنالاسقان رونالد رەيگان اۋەجايىنىڭ ماڭىندا بولدى.
CBS حابارلاۋىنشا، PSA Airlines اۋە كومپانياسىنىڭ Bombardier CRJ700-ايماقتىق لاينەرىندە 60 جولاۋشى مەن ءتورت ەكيپاج مۇشەسى بولعان.
Black Hawk Sikorsky H-60 تىكۇشاعىندا ءۇش اسكەري قىزمەتكەر بولعان، دەپ حابارلادى CBS News-كە ا ق ش قورعانىس مينيسترلىگىنىڭ وكىلى.
ا ق ش فەدەرالدىق اۆياتسيا اكىمشىلىگىنىڭ (FAA) حابارلاۋىنشا، سارسەنبى كۇنى جەرگىلىكتى ۋاقىت بويىنشا كەشكى ساعات 21:00 شاماسىندا ۇشاق رەيگان حالىقارالىق اۋەجايىنا جاقىنداپ كەلە جاتقاندا تىكۇشاقپەن سوقتىعىسقان. اۋە لاينەرى كانزاس شتاتىنىڭ ۆيچيتا قالاسىنان ۇشتى. تىكۇشاق وقۋ- جاتتىعۋ ۇشۋىن ورىنداعان.
بيلىك وكىلىنىڭ حابارلاۋىنشا، سارسەنبى كۇنى ساعات 23:30- داعى جاعداي بويىنشا قۇربان بولعان 18 جولاۋشىنىڭ دەنەسى وزەننەن شىعارىلدى.
CBS قازىرگى ۋاقىتتا ءتىرى قالعاندار تابىلماعانىن جازدى، ءبىراق NBC بۇعان دەيىن ۆاشينگتون اسپانىنداعى ۇشاق اپاتىنان كەمىندە ءتورت ادام امان قالىپ، اۋرۋحاناعا جەتكىزىلگەنىن حابارلادى.
پرەزيدەنت ترامپ اپات تۋرالى تولىق اقپارات العانىن مالىمدەدى. ا ق ش پرەزيدەنتى قۇتقارۋشىلارعا جۇمىسى ءۇشىن العىس ايتىپ، جاعدايدى باقىلاپ وتىرعانىن قوسىپ ءوتتى.
اۆتور
زارينا تۋعانبايەۆا