«ادىلەتتى قازاقستان» ۇلتتى ۇيىستىراتىن يدەياعا اينالدى - ەرلان قارين

Ерлан Қарин
Фото: Фото: ortcom.kz

 استانا. KAZINFORM - قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين Egemen Qazaqstan گازەتىندە جاريالانعان ماقالاسىندا ادىلدىك يدەياسى قوعامنىڭ سۇرانىسىنا دا، مەملەكەتتىڭ ۇستانىمىنا دا ساي كەلەتىنىن اتاپ ءوتتى.

ونىڭ ايتۋىنشا، «ادىلەتتى قازاقستان» - ءبىر جاعىنان مەملەكەتتىك يدەولوگيانىڭ وزەگى ءارى مەملەكەتتىك ساياساتتىڭ تۇپكى ماقساتى. سونىمەن بىرگە، بۇل - قوعام ساناسىنا ورنىققان بولاشاقتىڭ بەت-بەينەسى.

«شىن مانىندە، «ادىلەتتى قازاقستان» يدەياسى كۇنى كەشە عانا نەمەسە جۇرت ايتىپ جۇرگەندەي، سوڭعى ەكى-ءۇش جىلدا عانا پايدا بولعان جوق. قاسىم-جومارت توقايەۆ پرەزيدەنت قىزمەتىنە كەلگەن كۇننەن باستاپ ادىلدىكتىڭ قاستەرلى قاعيداتىنا ايرىقشا ءمان بەردى.

قاسىم-جومارت توقايەۆ پرەزيدەنت لاۋازىمىنا كىرىسكەننەن كەيىنگى العاشقى سوزىندە: «ەلىمىزدىڭ دامۋ جولىنداعى وسى ماڭىزدى مەزەتتە بۇكىل قوعام بولىپ، وركەندەگەن، دەموكراتيالىق، ادىلەتتى قازاقستاندى قۇرۋ يدەياسىنىڭ توڭىرەگىنە توپتاسۋى كەرەك» دەگەن ەدى. ودان كەيىن 2019-جانە 2022 -جىلى وتكەن پرەزيدەنت سايلاۋى كەزىندە مەملەكەت باسشىسى «ادىلدىك» ۇعىمىن سايلاۋ الدىنداعى تۇعىرناماسىنا نەگىز ەتىپ الىپ، ءوز ساياساتىنىڭ باستى قاعيداتى رەتىندە ۇستانىپ كەلەدى. ادىلەتتى مەملەكەت قۇرۋ يدەياسى قاسىرەتتى قاڭتار وقيعاسىنان كەيىن مەملەكەتتىك ساياساتتىڭ عانا ەمەس، بۇكىل قوعامنىڭ يدەولوگيالىق تەمىرقازىعىنا اينالدى»، - دەدى ەرلان قارين.

مەملەكەتتىك كەڭەسشى سوڭعى جىلدارى مەملەكەتتىك دەڭگەيدەگى كوپتەگەن شەشىم وسى ادىلدىك يدەياسىنا وراي قابىلدانىپ جاتقانىن اتاپ ءوتتى. مىسالى، 2022 -جىلى جۇرگىزىلگەن كونستيتۋتسيالىق رەفورما اياسىندا حالىقتىڭ جەرگە جانە ونىڭ قويناۋىنداعى بايلىققا، جانۋارلار جانە وسىمدىكتەر الەمىنە، سونداي- اق باسقا دا تابيعي رەسۋرستارعا قاتىستى مەنشىك قۇقىعى اتا زاڭىمىزدا بەكىتىلدى. بۇل قاعيدات ءىس جۇزىندە «ۇلتتىق قور - بالالارعا» اتتى باعدارلاما ارقىلى جۇزەگە اسىرىلدى. سوعان سايكەس بۇدان بىلاي ۇلتتىڭ قوردىڭ جىل سايىنعى ينۆەستيتسيالىق تابىسىنىڭ جارتىسى بالالارعا ارنالعان جيناقتاۋشى ەسەپشوتتارعا تەڭ ءبولىپ اۋدارىلادى.

«شىن مانىندە، ادىلەتتى قازاقستان - بازبىرەۋلەر ايتىپ جۇرگەندەي، بيلىكتىڭ ويلاپ تاپقان جاساندى يدەياسى ەمەس، پرەزيدەنتتىڭ ستراتەگيالىق باعدارىنىڭ يدەيالىق نەگىزى. قاسىم-جومارت توقايەۆ ءوزىنىڭ ەڭ نەگىزگى ميسسياسى - ادىلەتتى قازاقستاندى قۇرۋ ەكەنىن ۇنەمى ايتىپ ءجۇر. ساياسي، ەكونوميكالىق جانە الەۋمەتتىك- مادەني سالالاردا جۇرگىزىلىپ جاتقان جۇيەلى رەفورمالاردىڭ ءبارى، ەڭ الدىمەن، وسى ستراتەگيالىق ماقساتقا قول جەتكىزۋگە ارنالعان. پرەزيدەنتتىڭ ەلىمىزدى تۇبەگەيلى جانە جان-جاقتى جاڭعىرتۋعا قاتىستى بايىپتاماسىنىڭ تۇپكى ءمانى وسىندا جاتىر»، - دەدى ق ر مەملەكەتتىك كەڭەسشىسى.

سوڭعى جاڭالىقتار