ادىلەت مينيسترلىگى كولىكتى قىزدىرۋ نورماسىن قايتا قارايتىن بولدى
استانا. KAZINFORM - ادىلەت مينيسترلىگى دەپۋتاتتاردىڭ شاعىمىنان كەيىن كولىكتى ۇزاق قىزدىرۋ نورماسىن قايتا قاراستىرادى. بۇل تۋرالى سەنات كۋلۋارىندا ادىلەت ۆيتسە-ءمينيسترى بوتاگوز جاقسەلەكوۆا ءمالىم ەتتى.
جاقسەلەكوۆانىڭ سوزىنشە، اتالعان ماسەلە ۆەدومستۆوارالىق كوميسسيادا قارالادى، ونىڭ قۇرامىندا تەك ءتيىستى مەملەكەتتىك ورگاندار عانا ەمەس، سونداي-اق دەپۋتاتتار دا بولادى.
«ەگەر دەپۋتاتتىق سۇراۋ وسى تاقىرىپتا تۇسكەن بولسا، بۇل ماسەلە انىقتالىپ تالقىلانادى. قوسىمشا ناتيجەلەر قاراۋ قورىتىندىسى بويىنشا حابارلانادى»، - دەدى ۆيتسە-مينيستر بوتاگوز جاقسەلەكوۆا.
كەشە ءماجىلىستىڭ جالپى وتىرىسىندا دەپۋتاتتار ايازدى ۋاقىتتا كولىكتى 5 مينۋتتان ارتىق جىلىتۋعا سالىناتىن ايىپپۇلداردى قايتا قاراۋدى سۇراعان ەدى. سەبەبى اۋا-رايىنىڭ سۋىقتىعىنا بايلانىستى سولتۇستىكتە بۇل ءۇشىن كوبىرەك ۋاقىت قاجەت بولۋى مۇمكىن.
قازاقستان رەسپۋبليكاسىنىڭ جول ءجۇرىسى ەرەجەلەرىنىڭ 88-بابى 5-تارماعىنا سايكەس ەلدى مەكەندەردە قوزعالتقىشى قوسۋلى كولىكتەردىڭ تۇرۋى، ەگەر ول تۇرعىندارعا قولايسىزدىق تۋعىزسا، تىيىم سالىنادى.
بۇل تالاپتى بۇزعان كولىك جۇرگىزۋشىلەرىنە 5 ايلىق ەسەپتىك كورسەتكىش (ا ە ك) مولشەرىندە ايىپپۇل سالىنادى:
ا ە ك (ايلىق ەسەپتىك كورسەتكىش) 2024-جىلى - 18460 تەڭگەنى قۇراسا، 2025-جىلى - 19660 تەڭگەگە جەتتى.
ەگەر كولىك جۇرگىزۋشىسى بۇل ەرەجەنى 12 اي ىشىندە قايتا بۇزسا، ايىپپۇل مولشەرى 10 ا ە ك، ياعني 39320 تەڭگەگە دەيىن ارتادى.
قالاي شاعىمدانۋعا بولادى؟
ايىپپۇل سالۋ ءۇشىن مەملەكەتتىك تىركەۋ ءنومىرى، قۇقىقبۇزۋشىلىق جاسالعان ۋاقىت پەن كۇنى كورسەتىلگەن 5 مينۋتتان اسقانى كورىنەتىن بەينەجازبا كەرەك.
تۇرعىندار كولىك يەسىنىڭ ەرەجە بۇزعانىن دالەلدەيتىن بەينەجازبانى پوليتسياعا كورسەتۋ ارقىلى ارىزدانا الادى. مۇنداي شاعىمدار اكىمشىلىك قۇقىقبۇزۋشىلىق بويىنشا شارا قولدانۋعا نەگىز بولادى.
سونداي-اق جول قوزعالىسى ەرەجەلەرىنىڭ 2-ءبولىمىنىڭ 9-تارماعىنا سايكەستكولىك جۇرگىزۋشىسى قاۋىپسىزدىك بەلدىگىن تاعۋعا مىندەتتى. ال قاۋىپسىزدىك بەلدىگىن تاقپاعان جولاۋشىلاردى تاسىمالداۋعا تىيىم سالىنادى.
ايتا كەتەيىك، 8-قاڭتار قازاقستاندىقتار ەندى كولىكتى 5 مينۋتتان ارتىق قىزدىرعانى ءۇشىن ايىپپۇل ارقالايتىنى تۋرالى حابارلاندى.
