ادىلەت ءمينيسترى «ايكا ءتىزىمى» مەن جەكە دەرەكتەر تۋرالى پىكىر ءبىلدىردى

جەكە دەرەكتەردى جاريالاۋعا بايلانىستى جاۋاپكەرشىلىكتى كۇشەيتۋ ماسەلەسىن قاراستىرۋعا بولادى. بۇل تۋرالى ق ر ادىلەت ءمينيسترى ازامات ەسقارايەۆ ايتتى، دەپ حابارلايدى Kazinform.

«ىشكى ىستەر ورگاندارى رەزونانس تۋدىرعان ىستەردە قازاقستاندىقتاردىڭ جەكە دەرەگىن جاريالاپ جىبەرەدى. مىسالى، قوعامدا قىزۋ تالقىلانعان «ايكانىڭ ءتىزىمىن» الايىقشى. وندا «قىزدار» مەن «كليەنتتەردىڭ» دەرەكتەرى جاريالاندى. مۇنداي جاعداي ءجيى بولىپ تۇرادى. مۇنداي جاعدايدا نە ىستەۋگە بولادى؟ سەبەبى، مۇنىڭ سالدارىن قازاقستاندىقتار تارتىپ وتىر. ءسىزدىڭ ويىڭىزشا، مۇنداي قىزمەت ءتۇرىن زاڭداستىرۋ بولا ما؟»، - دەپ سۇرادى تىلشىلەر ۇكىمەت ۇيىندە وتكەن بريفينگتە.

ءوز جاۋابىندا ادىلەت ءمينيسترى بۇل جاعداي ىشكى ىستەر ورگاندارىنىڭ قۇزىرەتىنە كىرەتىنىن اتاپ ءوتتى.

«مەنىڭ بىلۋىمشە، ب ا ق-تا بۇل جونىندە ءتيىستى تەكسەرىس ءجۇرىپ جاتقانى جاريالاندى. دەمەك، تەكسەرىستىڭ قورىتىندىسىن كۇتۋ كەرەك. ەندى (جەزوكشەلىكتى - رەد. ) زاڭداستىرۋعا قاتىستى - مۇنداي ماسەلەنى قاراستىرىپ جاتقان جوقپىز»، - دەپ جاۋاپ بەردى ا. ەسقارايەۆ.

سونىمەن بىرگە، جۋرناليست جەكە دەرەكتەردى جاريالاۋعا بايلانىستى جاۋاپكەرشىلىكتى كۇشەيتۋ قاجەت پە دەگەن سۇراق قويدى.

«مەنىڭ تۇسىنۋىمشە، ىشكى ىستەر مينيسترلىگى ءتيىستى تەكسەرىس جۇرگىزىپ جاتسا، ولار دا بۇل ماسەلەگە الاڭداۋشىلىق تانىنىپ وتىر. جازانى كۇشەيتۋ بويىنشا ماسەلەنى زەردەلەۋ كەرەك شىعار. بۇل ماسەلەنى قاراستىرۋعا بولادى»، - دەدى ول.